我諗大家對於「五毛」一定唔陌生，早年當機械式洗版未係好流行的時候，佢地經常出黎喺一啲唔啱聽的 Post 下面洗留言，以圖遮蓋其他留言者的討論。十幾年前就有傳出過留言者係「收錢做野」，計落五亳子一個 Post，所以佢地一度被稱為「五毛」或 「五毛黨」。
其實喺學術界，已經有不少學者研究過「五毛黨」，並發表過學術文章。而上個月，哈佛就有三名學者對於「五毛黨」的研究有新發現！
研究推算，「五毛黨」 一年發表 4.88 億個留言，發言者會扮作普通網民，喺一啲敏感的議題上面，出力發表一啲分散大家注意力的言論、轉移視線及維護政府。由此數字估計，喺中國的社交媒體上，平均每 178 個留言中，就有 1 個係「五毛」寫。
報告亦都指出一般人，包括過往做「五毛」研究的學者、新聞從業員及網民，都對「五毛」有一定程度的誤會：研究學者從洩露出來的文件入面見到，大部分發貼人都無參與喺激烈的討論入面，唔會同人地爭拗批評，亦都唔會出貼嘲笑外國；佢地的貼文內容，大多數都係一啲離晒題、無關痛癢的內容，通常都係一啲正面、吹噓政府功績的內容，目的係要轉移視線，令討論不能暢順進行。所以，如果你見到有人留言撩交嗌，或者激烈討論，咁個啲人好可能係真心的。
其次，研究亦認為無證據顯示「五毛」係逐個 Post 計錢，佢地估計，只要係喺政府入面做野，出「五毛」 Post 就係工作的一部分。因為佢地從洩露文件入面，見到嗰啲所謂「五毛」，係要向上級報告，而「五毛」更加係分散係各個部門，分佈亦非常廣範。除左喺網宣辦（國家互聯網信息辦公室/Internet Propaganda Office）見到有「五毛」的蹤跡之外，仲係「體育局」、「地稅局」、「法院」等地方見到有「五毛」 。
有學者認為，叫「五毛」用呢啲離晒題、無關痛癢的內容黎轉移視線，係一個好聰明的做法。因為一分散左注意力，「O2O 社會運動」就冇咁容易形成。「五毛」會在敏感議題出現的時期，更加「努力工作」，以減低「出事」的風險。
唔知大家睇完，會唔會感到一絲心寒呢？我地一直以來對於「五毛」的想像，原來同真實有咁多出入。先不說中國與外國政府引導輿論上的不同，當知道他們原來一直都非常了解自己國家網民的心理，繼而作出相應的措施，弄得沒有人輕易看得出來，反為我們經常嘲笑「五毛」低智、被人識破的，原來大部份都是真心的，這才是心寒之處。
分享到 :
最新影片
