依家咩都要智能，沖奶要智能、開燈要智能，就連門鎖都要智能。不過今次講的並唔係用指紋、瞳孔開門咁簡單，而係近期 Kickstarter 的熱賣產品 — SESAME 智能門鎖。我依莉詩見最近香港都有得賣所以借來一試。
叫得智能門鎖當然要用智能手機做開關。只要裝個 App 再用藍芽或者 Wi-Fi 連接就可以代替鎖匙，透過手機開啟或鎖上大門。係智能門鎖穩固的情況下，開鎖的反應都幾快，手機襟 unlock 之後大約 3秒就會開到。至於安全問題方面，一個智能門鎖只可以連接一部手機，如果屋企多幾個人，大家都要裝 App 並申請賬戶，而你就要選擇邊個賬戶可以控制門鎖，咁就唔怕有人白撞連上屋企的門鎖了。
▲ 雖然一個智能門鎖只可以連接一部手機，不過你可以選擇多個屋企人能夠控制門鎖。
▲
▲ App 會記錄開關狀態，令你遙距都可以監察有無人打開過道門。
而呢個門鎖最方便又最有趣的是，你唔需要拆除舊門鎖或重新安裝，只需要將智能門鎖用 3M無痕膠貼貼上原有的圓柱體門栓上就可以控制開關，安裝非常方便。如果唔用都可以隨時取走，門上不會留有痕跡。不過，雖然第一次用 3M無痕膠貼十分穩固，但如果取下再貼就會好易甩。好難想像，如果我真係無帶鎖匙出街，而智能門鎖又甩咗，咁我應該要搵定個御用開鎖佬先得。
▲ 大部份圓柱體的門栓都可以支援，兼容性都幾高。
▲ 要做到手機控制，而唔洗換舊門匙，秘密在於智能門鎖內用作套住舊門栓的膠框。
▲ 既然係電子產品就係要用電，而智能門鎖內的電池足夠使用 500天，而電量低時，它會在應用程式上通知你，到時一定要記得換電。唔係開鎖佬又會好開心。
雖然智能門鎖的概念幾得意，唔駛拆舊門鎖就可以用手機控制開關，不過就咁用膠貼貼個智能門鎖上去好似兒戲咗 D，萬一你一個人住，出街個門鎖咁啱甩咗，或者去完旅行番嚟個門匙無電，咁就註定要搵開鎖佬解決了。所以我都係相信最原始的方法，帶條鎖匙出街比較好。
SESAME 智能門鎖
售價：$1,650
查詢：Searching C (2568 2778)