最近蛋黃哥好鬼忙，無論便利店定快餐店都有佢的蹤跡，所以佢就決定將一田 Gudetama Café 店長的大任轉交俾紅遍日本及台灣的日本療癒繪本《小熊學校》主角「治癒系女孩」小啡熊 Jackie。雖然香港未必個個識佢，不過見佢咁可愛，我依莉詩就去會下佢。
可愛小熊陪你開餐
今次 The Bears’ School Cafe 同上次 Gudetama Café 風格完全唔同，以柔和的草原色系作為主調，每張凳都掛上 Jackie 大愛的藍白間蝴蝶結，而牆上貼滿小熊們在森林及學校所發生的生活趣事圖畫，令整間舖洋溢著溫馨放鬆的氣氛。雖然影相位唔多，不過幾乎每一張枱都有一隻 Jackie 公仔陪你食飯，自拍呃 like 之餘，仲可以抱住佢地食飯，非常治癒！
▲ 門口相信係不可錯過的影相位，頭戴大大隻藍白間蝴蝶結的 Jackie 超級可愛。
▲主角「治癒系女孩」小啡熊 Jackie 同佢男朋友小白熊 David 、11隻性格各異的熊哥哥係牆上的圖畫內過著優閒的生活。
▲ 另一幅牆有大大隻 Jackie 空降餐廳。
▲ 每張枱都有毛公仔俾你攬住食飯，好似番咗小時候咁。
▲ 3款唔同嘅餐墊好打耳架！不過粉絲們唔好係食飯前偷偷拎走啊！ 
▲ 杯墊同樣都有 3款，係咪好想即刻叫 3杯凍飲呢？
▲ 咖喱飯都會用呢 D 碟裝，食乾淨就會見到 Jackie 架啦！
▲ 跟餐飲品都會用呢兩款杯裝住，不過同以住唔同，呢 D 杯係唔可以買走啊！
治癒小熊食落肚
講到食物，IZUMI CURRY 本身就離唔開日式咖喱，今次都唔例外，有幾款熊仔頭咖喱飯。而比較特別的是日式便當，每個飯糰都有保鮮紙包住，唔怕整污衊手，十分細心。
▲ 奄列吉列豬扒咖哩飯 $129
IZUMI CURRY 的日式咖喱一定唔少得，而今次的熊仔頭咖喱飯夠晒份量，唔會唔夠飽。咖喱經過改良後，唔會太辣，小朋友都食到。
▲ 白汁雞肉飯 $109
白汁雞肉飯中間的飯帶少少酸，非常開胃。如果唔鍾意酸又想食白汁的話，可以將中間改成咖喱飯啊！店員仲大力推介改後的版本呢！
▲ 漢堡扒咖哩飯 $109、日式便當盒 $99
兩個便當中，我食咗日式便當盒 ， 3舊飯糰都係唔同味，有雞肉、蘑菇同明太子，對於唔鍾意食白飯的小朋友，呢個會係幾好的選擇，而且每個飯糰都有保鮮紙包住，唔怕整污衊手，十分細心。
▲ 朱古力慕絲 $49
熊仔樣的朱古力慕絲超可愛，濃濃的朱古力相當幼滑。
▲ 香蕉班戟 $59
香蕉配朱古力永遠最夾，加埋灑上熊樣朱古力粉的班戟，可愛度急升！
▲ 朱古力咖啡 $49
主題餐廳唔可以無一杯有公仔圖案的咖啡，今次呢杯係朱古力咖啡。雖然唔算好香濃，不過外貌滿分。
▲ 巨峰梳打特飲 $55
巨峰梳打入面有一粒粒爆爆珠同星星啫喱，爆爆珠爆開的時候酸酸的，解渴醒胃。
稀有精品唔買唔得
餐廳旁邊有間 pop-up store，售價 Jackie 的各種精品。 係香港有 Jackie 精品賣的地方唔多，相信要一次過見到咁多款應該唔容易呢！好似話，7月仲有限量精品推出，機會難逢啊！
▲ 精品方面，除咗公仔，大多都係主攻小朋友的產品，當中文具佔了不少位置。
▲ 水樽 $55、餐盒 $128
▲ 簿 $48
▲ 簿 $120
依莉詩：「未必好多人識，不過好可愛」
雖然 the bear’s school 未必好多人識，相信今次應該無以住咁多人排隊。不過戴上藍白間蝴蝶結的 Jackie 真係好可愛，入到去以柔和的草原色系作為主調的餐廳，就好似入咗繪本世界一樣，好自然就有被治癒的感覺。食物方面，比起上次蛋黃哥 cafe 來得簡單，不過就著重咗份量同質素，加上可愛的熊熊造型，女孩子應該無法抗拒。
YATA the bear’s school café by IZUMI CURRY
地點： 一田超市(觀塘) apm LG
開幕日期： 2016年6月10日上午11時
分享到 :
最新影片
