迪士尼 x 星球大戰 6 大攻略！依莉詩帶你率先睇

鐵甲奇俠遲遲未到，今日就已經有一大班星球大戰人物率先入侵明日世界，仲將史迪仔趕走，成為反抗軍的秘密基地。呢次行動代號為「星球大戰：入侵明日世界」的暑假活動，相信會再一次掀起星戰熱！依家就等我依莉詩話俾大家知當中 6大亮點啦！

1) Phasma 隊長領兵「行咇」

要管理明日世界，第一步當然要「行咇」，屬於黑暗勢力第一部隊 Phasma 隊長會不定時率領一眾風暴兵進駐明日世界巡邏，搜索反抗軍的蹤跡。要同佢地合照就一定要了解巡邏路線。事關佢地都係軍人，時刻都會保持隊形，唔會亂咁停底架！

▲ 銀色盔甲的 Phasma 隊長入型入格，一舉起支鎗，所有人都要聽佢指令。

▲ 行行下， Phasma 隊長就截查咗幾個懷疑反抗軍。

2) 衝入反抗軍指揮站支援 Chewbacca

有黑暗勢力出沒，當然亦有反抗軍的出現。依家「幸會史迪仔」就化身成反抗軍的秘密基地，身經百戰的 Wookiee 傳奇機師 Chewbacca同英勇過人的機械人R2-D2 就係入面隨時候命，迎接一個個反抗軍的新成員，姐係你同我。

▲ R2-D2 唔單止識出聲，仲識跳舞。佢仲唔捨得我走，係度喊添！

▲ Han Solo 的拍檔 Chewbacca 為感激你的加入，仲會送上熱情的熊抱。

相關文章:

Disney 籌組科技工作小組　針對 AI 和 XR 內部應用進行協調

3) 改裝「飛越太空山」穿梭戰火之間

明日世界入面最刺激的「飛越太空山」曾經係唔少人的摰愛，小編就有個同學可以一日可以 80次。《星球大戰》入侵後就將「飛越太空山」的極速旅程重新演繹成「星戰極速穿梭」。不但投射的影像同音樂改變咗，就連車速都加快咗，刺激度增加最少 10%呢！

▲ 玩「星戰極速穿梭」之前，必定要到輪候區打下卡。事關輪候區已經打造成叛軍的戰機庫，仲停泊咗一架巨型 X-wing 戰機，非常有型。

▲ 以前嚟迪士尼一定會玩一次「飛越太空山」，依家可以話一定要玩兩次「星戰極速穿梭」。雖然路軌幾乎一樣，不過車速快咗，故事性強咗，刺激咗唔少呢！

4) 培訓絕地聖殿小武士

星戰係一個誇代的愛好，係「飛越太空山」旁邊將會有絕地聖殿武士特訓場，由 6月25日起就會招募 4 至12 歲的小武士穿起經典的武士長袍，接受絕地武士的訓練，學習以以光劍迎戰 Darth Vader 同 Seventh Sister 帝國判官。

▲ 雖然今日未有得體驗，不過開幕禮就有一班小武士展示特訓成果，個個都有辦有眼。

5) 自己光劍自己砌

穿梭完戰場之後，係咪好想有支自己的光劍呢？星球大戰精品店入面有個區域，可以親手製作自己的光劍，無論顏色，手柄定裝飾都可以自己揀。一於砌到啱自己的手型為止吧！

▲ 身為武士，點都要有把自己的劍，呢度就有 26款配件俾你揀選擇，($198光劍/ $238豪華光劍)。唔單止有光有聲，質料仲幾好，二百蚊左右可以話係超值。

6) 必買人氣黑武士爆谷桶

大阪環球影城的爆谷桶超級受歡迎，而呢度都推出咗鈦戰機同黑武士爆谷桶，仲有 BB-8 紀念杯，個個都非常有型，相信好快引起搶購潮呢！另外，明日世界「太空驛站」改裝成《星球大戰》主題商店，入面有超過 230款《星球大戰》的主題商品，粉絲們必定大出血。

 

▲ 鈦戰機紀念桶 ($120) 、黑武士爆谷桶 ($98)

▲ 星戰光劍玉桂條($38)、BB-8紀念杯($88)

相關文章:

Disney 籌組科技工作小組　針對 AI 和 XR 內部應用進行協調

依莉詩：「明日世界係時候大變身了」

明日世界由開園已經係度，十年話長唔長，都係時候轉下新嘢。今次一次過將「幸會史迪仔」、「飛越太空山」同「馳車天地」改成星球大戰主題，將星戰迷當然係好事，可以同 Phasma 隊長近距離接觸，又可以同 R2-D2 跳舞，仲有更刺激的「星戰極速穿梭」玩。不過，明日世界就好似唔再係以前的明日世界了。

▲ 原來今日係「馳車天地」最後一日開放啦！之後就會改建成鐵甲奇俠主題設施，雖然好期待，但又好唔捨得呢！

星球大戰：入侵明日世界

地點：香港迪士尼樂園

日期：6月11日起

相關影片:

相關文章:

Disney 籌組科技工作小組　針對 AI 和 XR 內部應用進行協調