一到夏天，卡通人物就會走晒出嚟同大家放暑假，今日我依莉詩就去咗銅鑼灣食船梨精、探海底奇兵多莉啦！
日本的吉祥物點止熊本熊，船梨精 Funassyi 人氣都不相伯仲，受唔少女性歡迎。今個暑假佢就嚟咗 WIRED CAFE 及 ROSIE’S CAFE 同大家見面，仲噴出大量梨汁俾大家解渴添！今次 Pop-up Cafe 的 Menu 唔多，得 3款食物、2款飲品，而且賣相都未算特別精緻，不過味道有番咁上下，而且大部份材料由日本空運來港，確保品質新鮮。
▲ 船梨精漢堡包 $98
3款食品入面性價比最高應該係漢堡包，兩個大漢堡分別夾住厚厚的福岡牛肉同照燒雞肉，配合熊本番茄同香濃芝士，既邪惡又清新，仲有埋厚薯條伴碟。$98 mos burger 都未必食到，可況佢仲有船梨精加持呢？
▲ 吉列豬扒蛋包飯$118
呢碟蛋包飯睇落普普通通，唔講唔知食材都係用熊本縣的米同蛋所造，以茄汁炒過的飯美味可口，非常開胃。至於吉列豬扒香脆鬆化，配上牛肉醬汁風味濃郁。
▲船梨精熱香餅$88
熱香餅以外貌取勝，軟綿綿的熱香餅畫上可愛的船梨精，仲有藍色忌廉、法國蜂蜜、鮮甜雪梨伴碟，色彩繽紛。不過兩粒士多啤梨有點怪怪的。
▲ 船梨精鮮奶咖啡 $58
鮮奶咖啡採用 3.6 牛乳及新鮮磨製而成的咖啡豆沖製，奶味濃郁，再灑上可可粉做成的船梨精圖案，試問點捨得飲呢？至於另外一款飲品係檸檬梨汁，飲落非常清甜，消暑解渴。
除咗食，pop-up cafe 點少得精品，Tote Bag、3款杯子 同 碟 都係今次限定精品，其他地方都無得賣，粉絲們一定唔可以錯過。
▲ 更好的消息係只要點指定船梨精食品就可以免費得到一個襟章。一共六款，要儲齊就要一星期食一次啦！
船梨精係香港未必咁受歡迎，不過就非常搞鬼，動作多多，識佢一定鍾意佢。今次食物選擇唔多，貌相都唔算太精緻，不過漢堡的性價比都幾高，味道都唔錯。唯獨餐廳的裝飾唔多，得門口一個影相位，不過今次短暫登陸可以話超難得，所以粉絲們一定要去啊！
船梨精 Pop-up Cafe
日期：2016年 7月 1日 至 8月 31日
地點：
WIRED CAFE (銅鑼灣軒尼詩道500號希慎廣場14樓1403-04號舖)
Rosie’s Cafe (沙田正街18號新城市廣場第三期3樓A305號鋪)
電話：23318315、25981233
只帶女朋友食完船梨精，可能唔夠相比囡囡放閃光彈。一於帶埋佢去時代廣場睇《海底奇兵2》展覽。馬倫和 Mo 仔兩父子再度登場，更有一眾搞鬼好玩新角色加盟，陪同多莉一齊再闖深海展開尋親大冒險！今次展覽有 32隻 3D 模型，當中除包括一眾主角外，更有長達 4米的巨型新角色七爪魚阿亨及魔鬼魚和海龜，係仿如置身海底的世界影靚相。
▲ 位於露天廣場鐘樓區域有多莉、馬倫同 Mo仔的溫馨珊瑚礁之家，小朋友仲可以騎著長達兩米的大海龜開心合照！
▲ 至於大電視區域，電影中的全新角色七爪魚阿亨以長達4米的搞鬼造型登場。
▲ 地面有蓋廣場就設有長達 5米的巨型觸摸池，大小朋友可以同電影故事一樣，伸手到水中觸摸各式仿如真實的有趣海洋生物。
今次的裝飾就好似仿如置身海底世界，一座座珊瑚礁配合背景非常靚，不過如果有人經過就會大大扣分，好彩有一個展區係排隊影，保安仲會幫手揸機，咁就確保影到無其他人經過的靚相。我好鍾意呢個安排。
迪士尼．彼思《海底奇兵2》
日期：即日起 至 2016年7月31日 (每天早上10時至晚上10時)
地點：時代廣場 (露天廣場、地面有蓋廣場、二樓大堂)