之前報導過今年荔園唔再打懷舊，仲要收入場費。到底仲值唔值得山長水遠就去亞博玩呢？我依莉詩今日就率先試玩，並列出十大之最俾大家參考參考。
▲ 雖然恐龍 DINO 仲係度，不過室內的荔園已經無咗以前遊樂場的風味，唯一好處就係可以嘆冷氣。
今次的遊戲集中俾小朋友玩，室內場基本上只有「充氣大暴走」係啱成人玩，而且需要 130cm 的身高限制。而係呢條佔地約1,700平方米，全長 110 米的競技賽道入面需要跳、爬、隨，衝過重重障礙，真係少 D 體能都唔得。工作人員話最快 2分鐘可以玩晒，不過我去到有一關需要衝上高地，因為手唔夠長次次都上唔到去，結果要 3個工作人員幫手拉我上去呢！如果要同 One Piece 嘉年華的障礙賽比，我覺得呢個唔需要咁大膽都玩到，不過就需要足夠體能。
必玩指數：★★★★★
難度指數：★★★★☆
收費：6個代幣
▲ 明明有冷氣，但玩完都成身汗，好講耐力同體力，不過成功過關又好興奮！
波波池已經買少見少，呢個佔地約 225平方米的波波池入面有 3條滑梯、旋轉滑梯以及不同的小玩意。身高 90至 110厘米的兒童須由成人陪同，相信係七彩繽紛顏色世界內父母同仔女都可以玩得好開心。
必玩指數：★★★☆☆
難度指數：★★☆☆☆
收費：5個代幣、陪同人士代幣收費 (3個)
碰碰車呢 D 經典遊樂場設施唔洗多講都知點玩，就係起勢咁撞向人地部車。不過奇怪的事，我試的車好似唔多受控制，只會向後轉，而且安全帶有 D 界頸，撞得唔太放心啊！
必玩指數：★★★★☆
難度指數：★★☆☆☆
收費：4個代幣
大象 TINO 同上年一樣已經變成機械象，不過今年就唔識噴水，變咗識痾臭臭。今次的距離比較近，所以易拋中過上年呢！
必玩指數：★☆☆☆☆
難度指數：★★☆☆☆
收費： 1個代幣/2隻仿香蕉
蘇飛係由香港著名插畫師林皮創作，而呢個迷宮的牆上印有多幅蘇飛同好友，包括眼仔碌碌的比利兔與害怕寂寞的孤獨熊的公仔，並且有一幅幅昔日荔園的相片。說白點就是相片複印展覽，欣賞價值不太高之餘，趣味亦不高。如果小朋友身高不足 110 厘米仲需要成人陪同，要收費實在有點那個。
必玩指數：☆☆☆☆☆
難度指數：☆☆☆☆☆
收費：4個代幣、陪同人士 所需代幣 (2個)
妖怪手錶係依家的小朋友心目中幾乎紅過比卡超，荔園就捉緊熱潮將妖怪手錶櫻花鎮放係會場一旁。呢個大型影相位參照動畫 1:1 建造，佔地約 600平方米，同平時商場展覽差唔多大，而入口的紅色鳥居拱門有哥瑪先生、哥瑪次郎兩大神獸守戶，值得影相留念。
必玩指數：★★★☆☆
難度指數：☆☆☆☆☆
收費：免費
▲ 雖然呢個櫻花鎮滿地櫻花，睇落好浪漫，不過室內的燈光好奇怪，要影靚相就要帶外置閃光燈啦！
▲ 除咗鳥居，其實場內大部份公仔都係紙牌，感覺上有 D hea，不過入到嚟荔園，而呢個景又係免費入場，就盡情影下相吧！
另一個影相位就係荔園巴士，每一架車新都按新巴同城巴設計，每影一張相都變成直入式廣告，夠晒 hard sell。雖然唔郁得，但小朋友可以走入迷你版的巴士扮揸車，一樣玩得投入。
必玩指數：★★★☆☆
難度指數：☆☆☆☆☆
收費：免費
今次的攤位數目比上年少，所以難度大致差唔多。呢個攤位一局有 6次踢球機會，比起其他大部份得 4次機會的多，只要成功踢中多個指定方格並成一直線就有獎品。加上名改到咁好，平時射慣波嘅朋友應該都知「射波」有幾易吧！一於唔理三七廿一，狠狠地射吧！
必玩指數：★★★☆☆
難度指數：★★☆☆☆
收費：2個代幣
講到今年的攤位獎品，公仔的質素比起東華嘉年華的高，而當中最吸引的有上年的小露寶公仔同今年主角，妖怪手錶。不過呢兩個攤位都好講彩數，想攬隻返屋企就要睇運數啦！
必玩指數：★★★★☆
難度指數：★★★☆☆
收費：2個代幣
▲ 想得到妖怪手錶的公仔就要碌出手上乒乓波，並得到足夠分數。我發覺如果就咁輕輕方過波都會碌向最外的 1分區，所以要碌向中間高分就要大力一點改變方向吧！
▲ 小露寶呢個攤位就真係要講彩數，將球拋進不同的顏色格內就可以得到獎品。
講到整個荔園最吸引的一定係呢個由德國引入的 RiMO 電動高卡車。賽道由米高舒密加的賽道設計師 Michael Kolbinger 所設計，全長 650米的賽道蜿蜒曲折，每個彎位都相當刺激，而高卡車最快時速為每小時 50 公里，只要一踏油就飛到好遠，可以一嘗當車手的滋味。
必玩指數：★★★★★
難度指數：★★★★☆
收費：$280/人/節 (不用購買荔園門票)
▲ 為確保安全，衣著要求好嚴格，我就連衣櫃低條長褲都要出動埋，大家玩之前要好睇清楚要求先啊！仲有每一段都包括登記、安全訓練課堂、穿戴安全裝備 同 XRace體驗，就是說用了差不多 1個鐘的時間就是為了玩 8分鐘，真係會唔夠喉呢！
▲ 講到架車，因為係電動車關係，一踏油就去，一收油就停，剎車掣幾乎唔駛用，純粹踩油，所以操控好簡單。如果揸得唔安全，工作人員會遙控減漫車速，所以就算無車牌的我都可以控制到部車呢！
坦白講，今年荔園比上年令我更失望。雖然有冷氣，不過搬到去亞博真係山長水遠，而且室內好似冇咗室外嘉年華的氣氛，場內燈光又好怪異，令相影相打卡的人好易變鍾無艷。另外，今次大部份都係俾小朋友玩的設施，沒有機動遊戲。學生們應該唔會願意俾百多元的入場費只玩充氣彈床吧！而今次唯一吸引的相信係 XRace，始終無香港小型賽車場，要玩都只可以去珠海或者澳門玩，依家有個近少少的地方，加上唔駛買荔園門票都玩得，可以值得一試！
日期：7月15日 至 8月7日 (早上 11 時至晚上 8 時)
地點：亞洲國際博覽館戶外的貨車調度區以及室內的 8 號及 10 號展館
入場費：
星期一至四 及 星期五至日(早上 10 時至中午 12 時)：成人 $140 (10個代幣)、65 歲或以上入場人士 $70 (10個代幣)
星期五至日 (中午 12 時至晚上 8 時) ：成人 $180 (12個代幣)、65 歲或以上入場人士 $90 (12個代幣)
相關影片: