好多時見到日本的小家電設計得又靚又多功能真係好想買，奈何電壓唔同，係香港用就要加上變壓器。不過，今次就有好消息啦！因為紅爆日、台的日本煮食神器 Bruno Compact Hot Plate 多功能電熱鍋宣佈 9月抵達香港，而且仲係 220w 的櫻花粉色添！見難得率先借到呢個煲，我依莉詩今日就大展身手煮番幾味啦！
基本上唔駛多講，單單睇個樣就知點解會熱賣，A4 size 的機身線條簡約，加上櫻花粉色的配搭，同 LC 的廚具可以話係絕配，難怪咁多靚太追捧。當然精明的靚太唔會單純睇樣， Bruno 有多段溫度控制，可以控制溫度於 65°C 至 250°C 之間。咁就可以烹調多樣唔同的食物，無論煎蛋等炒肉類都得。不過我用的時候就覺得傳熱比較慢，而且火力集中係中間，所以煮食時要先了解特性。
▲ ▲ 包裝箱都非常精美，粉色配上黑白插畫，可以直接拿來當儲物盒用。
▲ Bruno 大約 A4 size 咁大，放係廚房都唔會有違和感，而鍋蓋把手可以另外購買公雞等公仔，令佢更有個人特色。
▲ 爐溫可以控制於 65°C 至 250°C 之間，左右拉就可以校，容易控制。
▲ 其實 Bruno 的原理都係用發熱線加熱，有男同事就表示唔明點解賣咁貴，不過…品味嘅嘢，係唔明就係唔明架啦！
除咗靚，Bruno 另一個特點就係有多種烤盤，方便煮唔同的食物。跟機的平面烤盤同章魚燒烤盤已經集玩味同實用於一身。將唔同的食物放入章魚燒烤盤都可以變成圓碌碌，章魚燒、燒飯糰、蛋包飯，甚至 Cake pop 都整到，唔願食飯的小朋友見到咁得意都會想食埋一份啦！另外仲可以購買坑紋烤盤燒肉，Bruno 雖然煮食點都有油煙，不過比平底鍋少很多，亦唔會太嗆鼻，細細地放係餐枱邊整邊食都係一種樂趣。而大判燒式的圓型盤可以將唔同的食材分格，咁就可以同時煎到蛋、腸、蔬菜等等，快速整到個豐富的早餐。
相關影片:
▲ 烤盤總面積大概係 37.5cm x 23.5cm，可以煮出大約係 2 至 3人份量的食物，一般家庭都啱用。
▲ 雖然坊間都有唔少兩三百蚊的章魚燒機，不過呢部可以換烤盤，用途就增加了。
日本橫濱測試不收現金巴士 只接受感應式支付或二維碼支付 東京逾 8 成中暑死者無開冷氣 超過 150 名死者明明有裝冷氣但無開 日本 Yahoo 地圖手機程式 犯罪預防地圖功能揭風化案地區
今次第一樣試整的就係用章魚燒烤盤整章魚燒，感覺好好玩，唔黐底，好易就反得到一個個波型。
材料：
燒章魚丸的預伴粉………….. 100g
水…………………………………160ml
冰凍八爪魚粒………………….每粒小丸子放 2 粒
椰菜………………………………3/4個 (切粒)
沙律醬…………………………..適量
Wasabi…………………………適量
紫菜碎………………………….適量
▲ 首先用廚房紙係每一格塗抹生油，再以慢火將鐵板預熱到有香味。
▲ 之後倒入蛋漿到 7分滿，加入八爪魚粒同椰菜粒。再將蛋漿加滿。
▲ 當底部開始成形就要快快趣將章魚燒分割，並嘗試反轉。呢個動作就係要快，而且要從中間的章魚燒反起，因為中間的熱力比較大。
▲ 上碟的時候加上沙律醬、Wasabi 同 紫菜碎就食得。當然仲可以加埋章魚燒醬同木魚碎啦！
如果想煎 Pancake 可以轉用平面烤盤。開細火，倒入蛋漿就可以慢慢等佢熟，煮燶的機率唔高，連我呢個新手都做到，再一次證明買機器送技術係正確嘅！
▲ 呢個牌子除咗出電熱鍋，仲有出矽膠造型模具，配合埋就可以整到心形 Pancake 啦！
最後試用坑紋烤盤炒牛肉粒。雖然跟機送咗支木柄，不過烤盤唔深都幾難炒，所以如果有包咗矽膠的燒烤夾就大派用場了。(我呢個夾會好易整花個烤盤，所以唔建議用，只係公司無所以頂住先咋！)
▲ 煎熟牛肉粒之後加埋椰菜就唔怕油淋淋啦！
好多時買呢類小家電番屋企都係 3分鐘熱度，亦相信大家屋企都應該有唔少夾餅機、飛碟機等等用一兩次就擺係度的東西。雖然話 BRUNO 相比起普通萬用料理鍋的 CP值唔高，不過設計同 LC 的廚具咁夾，煮完味好餸，方上去影張相都威過人，而且 A4 size 的機身放係餐枱唔算大，換個烤盤就可以燒肉或者打邊爐，圍住一齊食都係一份樂趣。最重要係清潔方便，用水沖一沖個烤盤，再用布抹一抹機身就得。相信今次呢個煮食神器應該可以逃過打入冷宮的命運吧！
BRUNO Hot Plate – Hong Kong
售價：$998
查詢：35687885
日本橫濱測試不收現金巴士 只接受感應式支付或二維碼支付 東京逾 8 成中暑死者無開冷氣 超過 150 名死者明明有裝冷氣但無開 日本 Yahoo 地圖手機程式 犯罪預防地圖功能揭風化案地區