年年中秋食雙黃蓮蓉月食到喊？想搞搞新意思又怕中伏？我依莉詩就搜羅咗今年 7款特別味道的月餅，仲搵咗幾隻 unwire 白老鼠試食，睇吓佢地有無食到嘔先？
▲ 沒有最邪惡，只有更邪惡。今次所揀的月餅除咗傳統的蓮蓉月加咗料之外，仲有一些中西合壁的內餡，聽到個名都知未必人人啱口味。
縱使冰皮月餅幾流行，傳統的雙黃蓮蓉月總係有市場。而呢款黑松露蛋黃白蓮蓉月餅就係由傳統的月餅中加料炮製。幼滑的白蓮蓉中加上黑松露醬，變出獨特的香氣，與充滿油香的鹹蛋黃交織，係一新舊結合的體驗。如果唔鍾意黑松露的朋友，同一盒月餅仲有崧子仁豆沙月餅、鳳梨奶黃月餅 及 欖仁芋蓉月餅各一，總有一個啱口味。
賣相：紫、綠兩色絹面包裝盒非常優雅高貴，加上月餅的大小適中，送禮夠晒大方。
外觀：不同深淺的金黃色充滿傳統月餅的味道，餅面印有會展的標誌，充滿香港特色。
味道：具蛋黃香，並帶淡淡黑松露香氣，同傳統月餅多了一份新衝擊。
口感：不太油膩，外皮厚薄適中，白蓮蓉相當幼滑。
售價：$388/4個
查詢：香港會議展覽中心 (2582 7728)
▲ 雖然加入咗黑松露醬，不過矇住眼的水哥就以為只係普通傳統月餅。
蓮蓉配黑松露的味夠夾，咁英式傳統茶加入蓮蓉中又如何呢？緋紅的 Ruby 月餅將Ivory Palace Tea (象牙宮殿之茶)注入蓮蓉中，加上散落的檸檬皮與芒果乾，口感十足。同一盒仲有用朱古力色外衣包住，融入Paris-Singapore Tea (巴黎-新加坡茶)茶香和櫻桃果香的 Jewel月餅、混和 Blue Lotus Tea(藍色蓮花香茶)、杏仁醬、黑加倫子粒及蔓越莓乾的 Midnight 月餅，應該會大受愛茶人士愛戴。
賣相：深紫色的紙盒包裝印上古典的英文，好有西洋風格，一點都不像月餅的包裝。
外觀：月餅的顏色相當出眾，鮮紅色的外皮加上英式的印章，恰似一個立體的火漆印。
味道：淡淡的氣香，味道複雜有層次，偏甜。
口感：檸檬皮與芒果乾中和白蓮蓉的黏口，提升質感。
售價：$348/4個
查詢：Tea WG Hong Kong (26863902)
▲ 女神 Bowl 矇眼食 Ruby 月餅都偏晒嘴，見到個樣就更加大吃一驚。
玫瑰花係女士們的摯愛，但變成月餅就… 玫瑰醬洛神花迷你月餅以全天然的玫瑰花醬拌入幼滑奶皇，再加入養顏健康的洛神花顆料增加口感，每一口都流露迷人的玫瑰花香。
▲ 迷你月餅滴滴骰骰，不過整體比較鬆散，好易裂開。
賣相：不同深淺的金色卡盒好華麗，不過放了迷你月餅後，內裹有點空洞。
外觀：滴骰的月餅印上玫瑰花圖案，十分可愛。不過外皮鬆脆易裂，未必個個完整。內裹亦有點鬆散，切開後中間有空窿。
味道：淡淡花香，但奶黃味不太出，而且有點過甜。
口感：整體不油膩，酥皮夠香，不過過於黏口。
售價：$398/8個
查詢：國金軒 (2315 5885)
相關影片:
榴槤月餅已經唔係新口味，不過榴槤雪糕月餅口感就更似榴槤的質感，更加邪惡。3款貓山雙王 Gelato 月餅不但用貓山王果蓉製成雪糕，雙黃更是原粒貓山王果肉。當中貓山王三重奏天以厚厚一層純貓山王果肉作餅面，啖啖都係榴槤。而黑朱古力口味及綠茶朱古力口味以朱古力脆片做餅面，加多一點點甜味。
▲ 厚厚一層純貓山王果肉印成月兔圖案，十分吸引。
賣相：卡盒印上榴槤 BB 的 Logo 非常可愛，不像其他月餅走高貴路線，但盒的 size 比較大，不方便送禮。
外觀：厚厚一層純貓山王果肉印成月兔圖案，十分吸引。淡黃色的月餅亦好有月亮的感覺。不過切開後雙黃不明顯。
味道：榴槤味濃郁，甜度適中。貓山王榴槤果肉「蛋黃」甘甜不膩。
口感：整體質地幼滑，就好似食緊貓山王一樣，啖啖滿足。
售價：$580/4個
查詢：榴槤BB (37088732)
▲ 數碼港女以為自己食緊原粒貓山王果肉呢！
今年奶皇月餅當道，不過傳統奶皇月食得多都會膩，或者好似呢兩款咁，加咗柚子同蜜餞子薑入去可能更醒胃。蜜餞子薑奶皇月加入粒粒的蜜餞子薑肉係幼滑香濃的奶皇，而柚子奶皇月加入柚子係幼滑的奶皇中，雙重享受。
▲ 餅皮印有「柚子」兩個字，簡約清新。
賣相：用黃色雙層卡盒包裝，未至於太矜貴，不過細細盒易收藏。
外觀：餅皮印有「柚子」兩個字，簡約清新。
味道：具蛋黃香，但不算太濃，甜度適中，帶柚子香氣，油而不膩。
口感：外皮厚薄適中，奶皇幼滑，一啖一個。
售價： $198/8個
查詢：奇華餅家 (27856066)
好少月餅會特登搵代言人，而呢款「悅原月餅」就由古天樂參與包裝設計。激新黑芝麻味月餅由黑芝麻製成加上原粒蛋黃，甘香味濃搭配香滑口感，是一項新嘗試。
賣相：黑紅金三色包裝十分型格，走新派路線。
外觀：餅面中式印花清晰，不老土。
味道：黑芝麻同原粒蛋黃互相衝擊，又甜又鹹，百感交集。
口感：月餅結實，有質感，不過芝麻未算太滑。
售價：$198/ 8個
查詢：悅原月餅 (2797 9967)
抹茶同紫薯都係大熱食材，加入麻糬餡料製成月餅又有另一番感覺。抹茶紅豆 Mochi 月餅以抹茶味外皮包住紅豆餡及麻糬，而紫薯 Mochi 月餅內有紫薯餡中間一層麻糬餡料，令月餅多一種層次。
▲ 粉紫配粉綠色幾時都咁靚！
賣相：日本和菓子禮盒的包裝，深淺紫色的長身紙盒印有日式花紋，充滿和風。
外觀：粉紫色的紫薯皮同粉綠色的抹茶皮相當襯，內裹的逐變色同麻糬亦十分優雅，不過餅面的圖案只是品牌名，過於普通。
味道：紫薯月餅啖啖紫薯香，不會過甜，而抹茶月餅紅豆餡甜香滲出少少抹茶香，沒有苦澀或回甘。
口感：外皮煙煙韌韌，加埋中間 Q 彈麻糬，口感十足。
售價：$288/ 6個
查詢：東海堂 (27391328)