譚仔改名叫「TAM’S EXPRESS」就立即升 lv，咁滿記係銅鑼灣希慎的最新旗艦店叫做「de avenue」又有咩特別呢？答案就係多咗輕餐小食，而當中最吸引到我依莉詩就係味道濃郁，極度邪惡的榴槤芝士粟米！
原條上的栗米係台灣夜市就見到多，成碌揸住刨真係幾爽。今次滿記旗下的「HONEYMOON DESSERT de avenue」就特別推出 6款驚喜口味的原條烤粟米，鹹食的有「傳統墨西哥烤粟米」、「番茄醬蜜糖烤粟米」及「香草醬芝士烤粟米」，款款惹味香濃，而甜食的「吉士焦糖醬烤粟米」、「朱古力棉花烤粟米」及「榴槤芝士烤粟米」，更令人一試難忘！
▲ 榴槤芝士烤粟米 $58
聽個名明明覺得榴槤、芝士同粟米應該溝唔埋，但食落先知原來味道出奇地夾，清香的金枕頭榴槤肉混合吉士芝士醬，creamy 得嚟又有粟米的爽口，再加上Mozzarella 芝士的拉絲效果，睇到都覺得邪惡！
美味指數 ★★★★★
▲ 朱古力棉花糖烤粟米 $58
Nutella 朱古力醬同棉花糖鋪滿成條粟米，未食已經感到滿滿的幸福感。粟米的清甜爽口減低了朱古力醬同棉花糖的死甜感，帶來不同的甜蜜層次。
美味指數 ★★★★☆
▲ 吉士醬焦糖烤粟米 $58
係粟米上塗上吉士芝士醬同砂糖，烤過的砂糖變成薄脆焦糖，雖然黑色並不討好，不過香脆口感十分特別。
美味指數 ★★★☆☆
▲ 傳統墨西哥烤粟米 $58
粟米表面塗上厚厚的一層蛋黃醬及芝士，最後灑上墨西哥辣椒粉。香甜帶有少少辣，為味蕾帶來層層變化，充滿墨西哥風情。
美味指數 ★★★★☆
除咗粟米，沙律都都係不可少的輕食代表。當中的「烤羅馬生菜凱撒沙律」由原棵生菜配以芝士烤焗後微暖上碟，再按自己喜好加入脆香煙肉、Parmesan 芝士、麵包方脆同凱撒沙律醬，比起已經整好上碟的沙律，多了一份互動。
▲ 烤羅馬生菜凱撒沙律 $58
暖的生菜加上芝士變得更易入口，再上脆香的煙肉同麵包粒，就算平時唔食菜的人都會嘗試。
美味指數 ★★★☆☆
▲ 煙三文魚雞蛋芝士窩夫 $88
假日大家都會瞓到好晏，呢個窩夫就啱晒做 all day breakfast。 切開窩夫的同時，夾係中間的流心蛋蛋汁慢慢流出，極具視覺效果。連同煙三文魚及沙律菜一齊食充滿飽肚感，為休閒的假期帶來好的開始。
美味指數 ★★★★☆
滿記上一次出榴槤芝士 pizza 的時候已經覺得好特別，估唔到今次仲要將榴槤芝士放上粟米，聽落配搭超級奇怪，但原來味道又超夾，唔知仲以為粟米本身就係榴槤味。而朱古力棉花糖粟米都好特別，唔同層次的甜唔單止唔會覺得膩，反而粟米的爽口令罪惡感大大降低，感覺健康咗添！雖然一條粟米要 $58 有 D 貴，不過咁創新的食法點都要試下啊！
HONEYMOON DESSERT de avenue
地址：銅鑼灣軒尼詩道500號希慎廣場3樓317-319號鋪
營業時間：11:00am-11:00pm
電話：3580 1697