開芭蕉扇嘅時候係日頭，著外套嘅時候就係夜晚。雖然已經到咗秋天，但夏天的尾巴依然未捨得走。面對忽冷忽熱的天氣，我依莉詩最近就搵到呢個遠睇似耳機的 G2T-N1 Plus 隨身冷暖頸箍，不但會發熱，仲會製冷，完全係私人冷暖調節器。
會變冷又變暖的產品並唔算咩新產品，不過 G2T-N1 Plus 最特別就係唔使用手拎，利用 CPU 散熱器的原理，箍住條頸就可以四圍去。亦因為頸部係血管聚集嘅地方，40% 至 50% 熱氣會從頭部流失，所以只要調節頸嘅溫度就更容易達致取暖或者散熱效果。根據官方介紹，呢個頸箍可以提供比環境溫度低 15度或者比環境溫度高 35度嘅溫度，而我喺 25.5度的室溫開啟製冷模式，大約 30秒後感溫板下降至 14.4度，再轉到製暖模式，大約 1分鐘感溫板上升至 44.4度，兩者的溫度放係頸上都算適中，唔會太冷或太熱，不過如果可以有多幾個不同等級調校會更好。始終每個人受熱同凍的程度都唔同。
▲ 頸箍正面有一個可調整冷、暖、關機狀態的鍵，而上方有一個加強按鈕，可以加速製冷或製暖。
▲ 製冷模式下， 頸箍會有藍色指示燈，而製暖模式則會顯示紅燈。
▲ 喺 25.5度的室溫開啟製冷模式，大約 30秒後感溫板下降至 14.4度，再轉到製暖模式，大約 1分鐘感溫板上升至 44.4度，兩者的溫度放係頸上都算適中，唔會太冷或太熱。
▲ 製冷模式因為需要散熱，所以兩旁嘅散熱風扇會轉動，聽到好細聲嘅風切聲同有暖風微微散出。
頸箍之所以令你感覺到溫暖同冰涼，主要係左右兩塊感溫板貼住條頸傳溫，所以 size 啱都好重要。雖然每個頸箍後方都有旋鈕，可以調整頸寬，不過都仲有分男仔版同女仔版等大家揀個更貼頸嘅尺寸。兩個版本都有黃、白、紅 3隻色選擇，不過我就略嫌黃色同紅色太誇張。如果真係要帶出街，有黑色應該會更好。
▲ 男仔版同女仔版外型上差唔多。
▲ 男仔版 (上) 頸箍比較大，而女仔版 (下) 的感溫板就比較厚，但傳熱速度差唔多。
▲ 頸箍有個旋鈕，可以調整頸寬。
▲ 遠睇就好似戴住耳機一樣，不過黃色有啲誇張。
▲ 女仔帶嘅時候要小心，唔好亂校鬆緊，唔係就會好似我咁，夾甩幾條頭髮。(嗚嗚)
雖然頸箍唔使用手拎好似幾方便，大約 370g 亦唔太重，不過機器本身無蓄電功能，所以必須要插住個尿袋先可以出街。官方表示 6000mAh行動電源可以使用約5.5小時，更提議行動電源之輸出電壓需要 5V/2.1A以上。
▲ 要帶埋個尿袋出街，成件事即刻滑稽咗呢！
▲ 頸箍大約 376g 左右，戴上頸唔算太重。
▲ 跟機附送一個布袋，可以隨時袋入手袋。
呢個頸箍其實都幾實用，特別係冬天可以收係頸巾入面隨時幫條頸保暖之餘又唔會太礙眼，而且肩頸痠痛時熱敷都唔錯。不過製冷模式就有點怪，雖然遠睇似耳機，不過現時的黃、白、紅色太搶眼，出到街好易成為焦點。而我覺得最最最需要改善就係無蓄電的問題，搞到要帶埋個尿袋出街，成件事即刻滑稽咗呢！
售價：$999
查詢：JCSHOP Kidults (35778685)
元朗地址：新界元朗青山公路元朗段249-251號元朗廣場1樓139-143號店
