「板塊移動」呢幾個字當年讀地理嗰陣就聽得多喇，同地震悉悉相關。板塊移動帶來嘅地震除咗會導致傷亡損失，其實大家通常忽略咗最 literal 的改變－－陸地會因此而「郁咗」。而地理位置嘅改變，直接影響 GPS 定位，澳洲就有呢方面嘅問題喇。
澳洲位處嘅板塊郁得都幾快，一年向北移動接近 2.7 吋 （約6.9 厘米），仲有少少順時針轉；而相對上北美板塊就郁得慢啲，一年 1 吋左右啫。我哋呢啲腳踏實地嘅人當然唔會感受到整個大陸板塊嘅移動啦，但 GPS 就唔同講法喇，郁咗少少嘅話，成個座標就唔同晒㗎喇。
紐約時報 就話，其實過去 50 年，澳洲已經先後 4 次更新過成個國家嘅定位座標。而對上嗰次更新已經係 1994 年，亦即係 GPS 系統全面建成嗰一年。每次更新，成個國家入面地標嘅經緯度都會改變，而嗰次郁咗 200 米咁多，差唔多係香港站同中環站嘅直線距離咁遠。
經過咗 22 年，澳洲又開始有偏離 GPS 嘅情況出現，於是當局就決定喺今年年底調整，今次郁大約 1.5 米。雖然對於一般 GPS 用家（即係我哋）嚟講影響不大，因為我哋個電話嘅 GPS 誤差大約有 4.5－9 米，但一啲依賴 GPS 精準定位嘅技術，就好重要喇，因為呢啲技術準確度可以以吋/厘米計。就好似無人駕駛車咁，1.5 米其實足以令架車入錯行車線，唔單止去唔到目的地，仲可能會有意外發生。
香港暫時就未受板塊移動影響，要改過晒啲定位。比起板塊移動，港女反而比較擔心香港會陸沉多啲，因為今年全球氣溫創新高呀，北極溶冰，我哋呢啲沿海城市將會係首當其衝出事嘅地方，到時海水淹埋嚟真係無得避。