正當大家期待港版築地即將係灣仔碼頭開嘅時候，突然殺出個程咬金。其中一間係築地嘅海鮮批發搶先登陸灣仔，試業期間海鮮丼仲要半價發售！唔使去日本都可以食到新鮮直送嘅刺身啊！
豊洲水産係喺築地市場以批發為主，老闆伊藤紘明跟隨父親經營水產生意，更喺 20 歲開始自立門戶，至今已經營咗 13 年，日本一直做海鮮批發，係無餐廳㗎！而今次嘅豊洲水産海鮮丼専門店就係佢嘅第一間料理店，所有材料都係日本築地空運來港，保證新鮮。
▲ 最令人興奮就係試業期間有 6 款海鮮丼半價供應，仲要免加一，最平 $60 就可以食到鹽味牛脷丼！
▲ 未正式開業，店門口已經大排長龍，要差唔多排兩個鐘先有得食！(情況就同一蘭開業時一樣呢！)
▲ 店內面積唔算大，只有 40個座位，已經不設電話訂座，所以真係要睇你「為食」可以去到幾盡啦！仲要提提大家，試業期間只收現金，記得帶足夠彈藥啊！
專門店提供所有海產都經嚴選，大部份都由日本築地直送，當中使用的漁港三崎港鮪魚(MAGURO)，肉質肥美，比起非平時食到嘅吞拿魚(Tuna) 更適合做刺身。鮪魚係捕捉後會以攝氏零下 60 度急速冷凍，保存魚鮮味。另外，店內 20款不同口味嘅海鮮丼均使用日本山形縣生拔米，米粒分明，每粒都晶瑩通透，配合自家製醬油及日式高湯，鬆軟可口，就算只係食飯都唔會厭！
▲ 豊洲海鮮丼 $368/2人份量
Menu 內有成 20款海鮮丼，對有選擇困難嘅朋友，呢個豊洲海鮮丼就好啱大家！一個海鮮丼包括多種海鮮，包括牡丹蝦、甜蝦、帆立貝、鮪魚（赤身及腹身）、香蔥鮪魚腩、油甘魚、醋鯖魚、海膽、山芋粒、鮮海草、三文魚子及皇帝蟹肉，口感不同但款款新鮮甜美，食完會超級滿足呢！
▲ 黑鮪霜降腹身丼 $188
鍾意食刺身嘅朋友必定要食黑鮪霜降腹身丼，6 大片腹身肉肉質肥美，入口即融回甘，而魚蓉使用近骨嫩肉，魚味濃郁，油香味重，一丼兩食，將水揚黑鮪嘅味道提升到最佳。
▲ 蜜餞梅干香蔥黒鮪火炙丼 $168
炙燒後嘅黒鮪腩魚不但香噴噴，逼出魚油嘅魚肉更有咬口。油脂滲飯粒，再將和歌山紀州蜜餞梅干碎拌飯內，加入 wasabi、葱粒及一味粉，令丼物層次十足。
▲ 美人丼 $118
七彩繽紛嘅美人丼以秘製香蔥鮪魚腩、三文魚籽 混合 青瓜粒、蕃茄、山芋粒、蜜餞梅干及黃蘿蔔，不但貌相一流，更口感清爽，十分開胃。
▲ 美人丼 $118
另一個美人丼除了使用秘製香蔥鮪魚腩，更加入肉質嫩口具彈性嘅韓味醬鮪魚臉珠，配合青瓜粒、蕃茄、山芋粒食用令丼物更濃味香口。
▲ 名古屋風鰻魚丼
鰻魚飯聽落好普通，不過用名古屋風嘅鰻魚飯就十分講究，一丼三食。先品嘗烤得焦香入味嘅醬燒鰻魚，再加入白蔥、柚子及山椒拌食用，增加味道層次，最後加上特製嘅高湯拌成湯飯，更易入口。
▲ 蜜餞梅干鹽味牛脷丼 $108
呢度未必一定要食海鮮丼，牛脷丼都係特色之一。薄燒牛脷口感爽嫩彈牙，加上蜜餞梅干，中和油膩感，最啱食肉獸。
日本投放 10 兆日元發展先進科技 半導體生產與 AI 產業將受惠 日本橫濱測試不收現金巴士 只接受感應式支付或二維碼支付 東京逾 8 成中暑死者無開冷氣 超過 150 名死者明明有裝冷氣但無開
除咗丼物，專門店連鮪魚每一個部份都唔放過，魚眼、魚頭、魚鮫等刁鑽位都有得食，連酒一流！
▲ 汁煮鮪魚眼 $98
拳頭咁大嘅鮪魚眼見到都覺得震撼！其實主要係食魚眼外圍嘅骨膠原及魚肉，煙韌嘅肉質加上甜醬油，十分惹味！
▲ 鹽燒鮪魚鮫 $98
鮪魚鮫係魚鰓對下、兩邊魚鰭對入位置，每條魚得兩條，十分珍貴。鹽燒處理非常香口，係送酒佳品。
▲ 鮪魚鮫有成隻手臂咁長，超誇張！
雖然豊洲水産由築地開到香港被人熱捧，不過其實師傅都係香港人，而且日本直接材料嘅餐廳其實好多，見到排長龍，恐怕會成為下一間一蘭。不過呢間專門店都唔係無可取嘅地方，特別係鮪魚，一來係香港都算少有得食，二來鮪魚的新鮮肥美，入口即溶回甘，絕對一試難忘呢！
豊洲水産海鮮丼専門店
地址：灣仔謝斐道415-421號積福大廈地舖B
電話：2808 0292
營業時間：中午12時正至下午3時正、晚上6時正至11時30分
相關影片:
日本投放 10 兆日元發展先進科技 半導體生產與 AI 產業將受惠 日本橫濱測試不收現金巴士 只接受感應式支付或二維碼支付 東京逾 8 成中暑死者無開冷氣 超過 150 名死者明明有裝冷氣但無開
