唔知大家點睇個標題呢？係咪想話港女係標題黨，喺度呃 click rate 呢？少年你太年輕了！港女從來都唔係啲咁嘅人，我點會欺騙親愛的讀者呢？況且 click rate 已經唔入流了，而家係睇 Engagement 同 Unique page views 㗎嘛！
話說港女上星期六參加咗個活動，有 CapTV 仝人出席（心心眼），請來猛人 Ken Chow （曾任職 9Gag）教大家製作「至爆內容」。港女當然唔執輸，即刻報名參加。果然不失所望，當日港女 Get 到 3 大重點同大家 share 下。
其實都講咗一段時間㗎喇，而家做媒體，唔單止係製作內容－－搵啲人去寫嘢、影相、拍片咁簡單，媒體公司最需要花錢嘅部分應該係「數據分析」。當日嘅活動就簡單咁講咗幾個做數據分析的方法。
大家千祈唔好以為出一個 Facebook post 係一件好簡單嘅事，打幾粒字就得。要吸引到人 Click 入去睇詳細內容其實有好多嘢要做，而呢啲亦係做數據分析的地方。就以下面一個 UNWIRE.HK 的 post 做例子：
淨係紅色框入面的標題已經有好多嘢可以拆出嚟研究：
－放時間入去係咪多啲人睇/時間要放標題嘅咩位/幾多分鐘先最吸引到人 Click 入去…
－「特點」呢個字好啲定係「賣點」好啲定係「功能」好啲…
－使唔使提個品牌名稱呢？
－標題有冇動詞好呢？（可以變成 Google Pixel 10 大特點㗎喎）
－問題好定陳述好呢？
（仲有 Caption、同撮要呢，問題 List 下刪 1000 個…）
淨係一條題咋！要拆嘅話可以話係沒完沒了。拆嚟做咩呢？就係要睇下讀者的反應，睇下讀者對咩字眼敏感，並轉化為行動，Click 入去睇、Share 出去、留言等。
當有咗呢啲數據之後，下次做同類型的內容，就有得參考喇。
之但係，你點知你下嘅判斷啱唔啱呢？而家就係做實驗嘅時候！
係文章內容無變的情況下，如果以不同的 標題/大相/Caption… 推出去，邊個包裝形式係最好呢？如果你係大媒體，有好多唔同嘅專頁，你可以用唔同嘅形式發放出去，試下反應；又或者同一個內容出兩次，睇下邊個反應好啲，咁就驗證到你喺數據分析入面得到的假設。
不過，通常呢啲實驗唔係做一兩次就得，要做多幾次先驗證到。但當你成功左，其實係一勞永逸㗎喇。
如果大家係讀理科，或者大學的時候讀過下 Research（港女嗰陣係必修㗎），其實上面講嘅嘢大家上堂一定學過。只係你有冇恆心個個 Post 都咁樣做，又要記錄低結果，又要分析，又要修正… 不停重覆又重覆，直至搵到一 set 屬於你個媒體嘅規律，再跟住做，咁你就離成功不遠矣。
由於篇幅及形式所限，港女係簡化咗部分內容。如有興趣知道更多，不妨自己搞一個媒體試下，咁你就明㗎喇（大笑）。