《Gears of War 4》出咗街啦，作為忠心Fans嘅Jack當然即刻玩，請假玩添呀！我未有咁神速爆到機，但都應該可以講下呢幾日嘅感受。
首先講下個故事模式，我覺得《GOW4》終於有返陣Gears除，與《～Judgment》相比簡直好得多，極有《GOW3》嘅感覺。而好明顯今集係用作世代交替，由已成老豆嘅Marcus Fenix交俾阿仔JD Fenix呢一代，我覺得整個交接都算順利，而且仲感受到(個)份父子情，我冇諗過玩Gears會有呢個得著。敵人方面除新獸人，仲有機械人，我個人覺得機械人難搞啲，因為感覺硬啲，不過有EMP彈的話成件事就舒服好多。槍方面就有幾款新槍，亦可以於戰鬥中整槍，呢個系統係幾特別，但我就唔覺太有用。
其次想講就係個多人模式，我最鍾意嘅「五十波」返嚟喇（持久戰Horde 3.0）！3.0有咩新嘢？繼續分Class，5個人小隊入面每人要以一個工種進行遊戲，期間唔可以轉職，規限比Horde 2.0時更加緊。我就唔太鍾意呢做分工玩法，因為職能限制咗可用嘅武器種類，玩法彈性細好多，加上A.I.真係好癲，如果出去大海求其撈人組Team的話，冇合作性嘅小隊好快就全滅，超冇癮！所以有心玩Horde 3.0的話，搵朋友組隊啦，仲要一路打一路講住嘢提場呀。
我好想講A.I.於《GOW4》係進步咗好多！以往咁多集我都係玩獨狂難度（其實已玩到唔覺得好難），之前玩《Gears of War Ultimate Edition》時已發覺難度係調高咗，嚟到《GOW4》難度並冇調返低，敵人識得包抄你，識得自我掩護，係難打咗，不過亦因為咁重拾返「難打到喊」嘅感覺，絕對係好事！
之前幾次試玩，我都覺得隻Game個畫質唔太得，但而家玩呢個製品版，又發覺畫質好咗好多，加上60fps呢個流暢度，用Xbox One玩都達標有餘，一定靚過之前隻《～Ultimate Edition》，冇投訴。若然昇閣下部電腦有返咁上下，又係用緊Windows 10的話，大可以透過Xbox Play Anywhere玩返。據聞隻Game嚮PC上面可以推到4K解像度，我部PC真係做唔到，唯有求高人指教～
作為一位Gears粉，《GOW4》冇令我失望，但你話係唔係好完美呢？目前真係唔敢講，如果廠方之後放出嚟嘅Update唔會令遊戲平衡失衡的話，《GOW4》應該可以重捨《GOW3》嘅光輝，甚至超越《GOW2》都唔係冇可能。
