之前我們都有報導過，任天堂將會在 11 月 10 日正式在日本推出復刻版的紅白機迷你版，令不少老任支持者大呼「必買」！在發售日前兩日，我們編輯部就極速拿到這部為七十、八十後帶來無限童年回憶的電視遊戲機，在為大家帶來開箱後，就等作為八十後的 Edward 為大家分享一下這部紅白機 Mini 的各方面試玩感受，以及有什麼遊戲是必玩啦。
作為八十年代的遊戲，要強求遊戲畫面有 16：9 似乎是天荒夜談了一點吧？事實上今次這部紅白機 Mini 設有 3 種畫面模式：懷舊模式、4：3 模式及增線模式，如果大家想睇番以前在顯像管電視上的，有橫紋線條的遊戲畫面，可以選擇懷舊模式；但如果想畫面靚一點，不妨選擇 Pixel Perfect 增線模式，筆者接駁了 Sony BRAVIA X8500 這部 4K 電視玩，畫面都未有「起渣」情況（即使出來的解像度最高只是 720p），一路玩遊戲時都未見有跳格或者甩 frame 情況，十分暢順，最少比起幾十年前駁住部 CRT 大牛龜電視玩要靚好多！所以如果大家想睇得舒服一點，在畫面選項中選擇最右方的「Pixel Perfect」增線模式會最理想。
▲設有 3 個畫面模式（左至右）：懷舊模式、一般 4：3 模式及 Pixel Perfect 增線模式。
▲以上就是接駁 Sony BRAVIA X8500 這部 4K 電視後，使用 3 個模式的效果，可以見到懷舊模式可以模擬出當年使用顯像管電視玩的感覺，而 4：3 及增線模式，老實說筆者看不到有明顯分別（至少肉眼上）。
▲另外要留意的是，畫面最盡都只是出到 720p 解像度，但都算唔錯了。
筆者當年玩老任紅白機時，真係隨時玩半日都唔捨得離開部電視，尤其是玩一些像 Final Fantasy III 這類 RPG，又或者玩像惡魔城、魔界村、Super Mario 這類橫向動作遊戲，確實是可以十分沉迷，最主要原因除了遊戲性太好之外，手制大細適宜都是主因，即使拿住玩半日都唔會累，最多是要經常 chok 招搞到手指起水泡而已。但今次這部紅白機 Mini，為了遷就機身大幅縮細，令一對手制都細了接近一半！Edward 的手掌都不算特別大（以成人手掌來講），但玩了 15 分鐘都因為手制過細，操控得十分辛苦而感到疲累要宣佈「投降」唔玩住，這可以說是此機的最大致命傷。可以說的是，對於小朋友來講，這個手制大細是剛剛好，但對於已是大人的七十、八十後來講，似乎過於勉強了。
筆者實在想不明白，為何任天堂要盲目「復古」，不採用藍牙手制呢？事實上，如果用藍牙手制，不但可以還原當年相同大細的紅白機手制，而且更可以一機駁多過 2 個手制，這樣玩熱血進行曲這類遊戲時，就可以好似以前咁 4 個朋友一齊玩，而不用好似而家咁，限死只能兩個人對兩個電腦咁玩。
▲拿筆者的手掌與任天堂紅白機 Mini 的手制比一比，大家就知道有幾細了……
▲拿來灰機的手制來比一比，更加見到任天堂紅白機 Mini 的手制實在細得有點離譜……
▲如果講手感，筆者還是較喜歡當年 size 的手制（灰機手制與紅白機手制差不多大細）。
▲另外今年已經係 2016 年，筆者百思不得其解為什麼任天堂要堅持「復刻」得那麼徹底：不用藍牙手制而係用有線手制（其實比當年仲衰，當年條線仲可以拔出來，呢部唔得，連死在機身上），想拿遠少少玩都唔得，如果屋企係用大電視（55 吋或以上），會好辛苦……
宮本茂談遊戲設計精髓 寄語任天堂新人：「不用工作最好 所以做事要有效率、設法讓作品成功」 Nintendo Switch 後繼機支援向下兼容 官方承諾 Switch Online 服務延續 Nintendo Music 串流平台登場 月費 31 蚊任聽經典遊戲配樂
至於效能方面，當年的遊戲其實都不需要太高硬件規格，著重的反而是遊戲性，所以今次即使內置了 30 個遊戲，但所有遊戲玩起來都未見有窒、甩 frame、死機等情況（當然都唔洗再吹帶啦，因為根本無帶可吹 lol），相信玩個三、五、七個月，都唔會有任何問題。另外，由於它最高只能輸出 720p 畫面，所以大家都不用太強求要高畫質電視先至玩到，一般電視都夠了。不過較令筆者喜出望外的，是它的供電方面只需要 5V，即是說求其拿個外置充電器（俗稱：尿袋）為它供電都無問題，咁大家來緊聖誕、新年、農曆年，要拿部機去朋友屋企玩就方便得多了：一部機連手制，再加一個「尿袋」已經行得，去到朋友屋企接條 HDMI 線，再駁尿袋拿電，玩得！作為大眾娛樂，完全無問題。
▲ 整體玩落都好暢順，筆者試玩過熱血物語，完全無窒畫面都算靚。
▲介面都好易上手（雖然係日文……）。
▲而且可以隨時按 Reset 制 Save，玩 FF 呢類遊戲好緊要呀！
至於遊戲方面，紅白機 Mini 內建了 30 款遊戲，而且沒有網絡連接功能，所以不但只能單機玩，而且相信未來不能再增加遊戲數量了。而這 30 款遊戲又是否全部值得玩？筆者覺得不少的可玩性都很高，但如果真要挑選最好玩的，筆者就推介以下 8 款（排名不分先後）！
推出日期：1990 年 2 月 2 日
遊戲類型：橫向動作
相信這款遊戲，都不用筆者多介紹了吧？雖然它亦有推出 iPhone / iPad 版，但玩起來始終沒有在紅白機上玩般親切。重點是：它連「30 條命」的秘技都有移植過來，只要大家在遊戲開始畫面按下「右左下上 AB」，之後兩個人都可以有 30 條命，更可以無限 Continue，要爆機就無難度了。
▲魂斗羅，當年男生們應該無人不玩吧？
▲繼續有保留 chok 30 條命的秘技，而且可以無限 Continue，咁就唔驚死咗要由頭玩過啦。
推出日期：1990 年 4 月 27 日
遊戲類型：RPG
筆者當年喜歡 FF 系列，正是由這一集開始！難得今次老任在紅白機 Mini 不是單純放動作 game，而放了這類較靜態的 RPG 遊戲，絕對是筆者最愛推介！不過遊戲只有日文語言，想知道角色們講咩？睇來大家要搵番本已封塵的攻略出來了（還找得到嗎？）。
▲好懷念這種戰鬥場面哦！
▲除非你識日文啦，否則看來要找回攻略先知道角色們說什麼了。
推出日期：1986 年 2 月 21 日
遊戲類型：
又是一隻十分經典的遊戲，屬於動作冒險類遊戲，簡單來講既要打怪，又要解謎，耐玩度十分高！不過當年爆機後會有的「第二世界冒險」關卡，在紅白機 Mini 中會否被完全移植過來？就唯有留待筆者玩爆機後先同大家講到了（大概應該都有掛？）。不過玩呢隻 game，重點仍然是：熟悉兼感動的音樂哦！
▲這款遊戲，單是聽音樂已值回票價！
▲十分自由的遊戲世界觀，有排玩！
推出日期：1986 年 6 月 13 日
遊戲類型：橫向動作
至於魔界村，玩法就好似魂斗羅，都係橫向攻擊對手，不過目的就以拯救公主為目標。難度其實當年都已經好高，而家配合個咁細的手制，筆者都覺得超難，唔知大家又過唔過到哂 7 關，將公主從惡魔手中拯救出來呢？
▲可以兩個人一齊玩。
▲魔界村係出了名難玩的，兩個人合作都未必咁易過到關，被鬼攻擊搞到無咗件盔甲係等閒事吧？
推出日期：1986 年 9 月 26 日
遊戲類型：橫向動作
其實玩法同魔界村差不多，不過就只有單人玩，未能協力。同魔界村一樣咁難玩，不過係另一種難法，同「波斯王子」有少少似，惡魔城入面又要上樓梯又要跳，一開始未習慣真係以為樓梯係跳上去，原來係按個上制已可以。另外，既有近攻武器又有遠攻武器，玩起來好玩好多。至於故事上，就同尼古拉斯伯爵，即係吸血殭屍家族有關，而且音樂都幾好聽。
▲相比魔界村，惡魔城只可以一個人玩，難度大增！
▲又要跳又要上落樓梯，唔容易玩架！另外，大家係畫面見到的蠟燭台，全部都可以攻擊，會掉下不同的物件，包括：武器、心心、錢等，不要錯過哦！
推出日期：1985 年 9 月 13 日
遊戲類型：橫向動作
相信都不用多解釋了這款遊戲，當中筆者最喜歡玩反而是 Super Mario Brothers，即是最經典的一款，當年除了在紅白機外，在 GameBoy 亦玩得不亦樂乎。今次重回紅白機，又是另一番味道，而且過時過節，呢款遊戲肯定是接待親友必備的吧？
▲熟悉的畫面哦！！！
▲隱藏的「快速過版」關卡，唔知大家仲記唔記得係邊度入來呢？
▲好，過版！
推出日期：1990 年 10 月 12 日
遊戲類型：競技
其實看似是大運動會，但其實玩的是「非一般」的障礙賽。為什麼是「非一般」？當然是繼承「熱血」系列那種「黑社會爛仔」風格啦，在玩障礙賽時，你可以無所不用其極，利用路上遇到的物件或武器攻擊對手，令對手減慢速度。當然最終自然是爭取第一名過終點啦，這款遊戲可以最多兩人一齊玩，玩起來十分有趣呢！
▲呢款遊戲加上咁細的手制，簡直係對大家手指公耐力的最強考驗……
推出日期：1986 年 4 月 25 日
遊戲類型：飛行射擊
有些人會叫做「宇宙巡航艦」，但筆者還是比較喜歡叫 Gradius，顧名思義就是打飛機的遊戲，玩法有點兒像「沙羅曼蛇」那種橫向飛行射擊遊戲，上手都唔算難，亦似乎是 30 隻遊戲中唯一一個飛行射擊遊戲。
▲玩法同沙羅曼蛇有少少似，唔知當年大家有冇玩過呢？
好多人會覺得：嘩！得 30 隻遊戲，之後又無網絡去後加，會唔會玩得一排就悶架？老實講：想當年玩紅白機，買一盒遊戲帶都要百幾蚊（最少），而家幾舊水可以玩番 30 隻遊戲（仲要唔洗吹帶！！），畫質仲要唔錯，其實真係好抵架啦！而事實上，可能大家會覺得遊戲唔夠多，但呢度 30 款遊戲，可以講係老少咸宜，如果大家有心逐隻玩，都可以有排玩，尤其是好似 Final Fantasy、惡魔城呢類遊戲，無得幾個星期不眠不休咁玩，都唔係咁易爆機。唔知大家又有冇興趣入手番部，來緊長假期約齊一班老友仔一齊緬懷童年呢？
宮本茂談遊戲設計精髓 寄語任天堂新人：「不用工作最好 所以做事要有效率、設法讓作品成功」 Nintendo Switch 後繼機支援向下兼容 官方承諾 Switch Online 服務延續 Nintendo Music 串流平台登場 月費 31 蚊任聽經典遊戲配樂
