警告驚告！沙田新城市廣場再一次出現大量情侶聚集，各位單身狗避免來到沙田市中心一帶！事關今年聖誕，愛神係天空灑下戀愛種子，散落係星光花園，瞬間幻變成璃光星河，守護及見證著浪漫美滿的愛情故事！引來戀人們係星河放下星願球，許下一生一世的承諾。
今年星光花園再接再勵，以迷人燈飾吸引情侶同人像高手拍攝。當中的 300呎的璃光星河，水面泛著七色斑斕彩虹的光影變奏，非常浪漫。而星河旁嘅「聲」光幻鏡屋由多角度玻璃鏡面組合而成，光影有如銀河星雲瞬息萬變，見證愛情祝願成真。
雖然大部份的燈都熟口熟面，只係擺放位置唔同咗，但呢條 300呎嘅璀璨星河就係第一次出現。河水會絢爛奪目嘅彩虹七色緩緩地交替變色，呈現出傳說中嘅浪漫星河，相當唯美。戀人們仲可以放下星願球，讓星願球隨著潺潺流水係愛河上彩繪出動人軌跡。
▲ 河水會絢爛奪目嘅彩虹七色緩緩地交替變色，呈現出傳說中嘅浪漫星河，相當唯美。
▲ 旁邊有多個小型星願球，只需於場內即日消費任何金額，戀人們就可以放下星願球許願。
▲ 星願球隨著潺潺流水浮走，相當感動。
星河嘅源頭來自粉色嘅波波燈海，不同高度嘅波波，粉藍、粉紅相間，猶如置身相片中嘅迷人散景。
▲ 不同高度嘅波波，粉藍、粉紅相間，相當迷人。
▲ 旁邊看好似一朵朵蒲公英。
▲ 係通道之間，猶如置身相片中嘅迷人散景。
星河下嘅「聲」光幻鏡屋由多角度玻璃鏡面組合而成，晃然置身係光影幻變嘅世界裡，光影有如銀河星雲的瞬息萬變。
▲ 今年多個商場都以鏡做出萬花筒效果，相信會係聖誕必影相片之一。
▲ 每一個水晶球內都係一個小世界，收藏每個動人嘅故事。
係浪漫嘅氣氛中，大家都想得到愛神祝福，只要係場內即日消費滿 $800，就可以到上游嘅玻璃屋製作獨一無二的璃光星願球，將心中嘅烏托邦拼砌出來。
▲ 玻璃屋內有多款不同顏色及形狀嘅膠片選擇，砌出心中嘅烏托邦。
▲ 每一個星願球都有遙控可以控制燈光顏色。
有靚人靚景都需要攝影技巧，只要即日消費 $1,500 就可以報名預約參加 80後女攝影師 Carrie Chan 親自教授嘅滴攝影工作坊，透過水珠獨特嘅折射原理反射出有如置身微距世界中嘅璃光星河，拍出不一樣嘅景色。
▲ Carrie 利用玻璃上嘅水珠拍出不一樣嘅效果。
▲ 水珠獨特嘅折射下，所以都變得好微型。
講到聖誕燈飾又點可以唔提沙田新城市廣場嘅星光花園。雖然年年都有人話佢抄六本木嘅燈海，又話佢唔夠日本嘅壯觀，但對無時間去外國嘅小情侶嚟講，呢度已經係一個每年拍拖嘅聖地，係燈海穿梭，再一齊放星願球，你話幾浪漫呢！就算無女朋友，只要你有攝影技巧，帶個囡囡去影輯靚人像，一定冧啦！
聖誕氣氛 ★★★★★
必影指數 ★★★★★
璃光星河 Milky Way In Town
日期： 2016年 11月29日 至 2017年 1月 15日
地點： 新城市廣場 1期 7樓星光花園
