佢地終於齊腳開枱喇！港女之前又睇美國選戰，又睇台灣選戰，而家到 2017 特首選舉，都要關心下嘅。雖然香港 99.9% 嘅市民都只可以抱住食花生嘅心態觀戰，理論上係左右唔到結果，但係一日香港有資訊自由，網絡輿論嘅作用就不能忽視。你地睇下琴日咩事先，薯片叔叔一出黎話選，個個拍晒手掌歌舞昇平咁喎，做咩啫，佢好似都有話為 23 條立法係憲制責任、重啟政改以 831 為基礎喎～
Anyway～唔講政治取向，唔講政治取向，唔講政治取向（好重要，笠返個大頭盔先）！不得不承認，薯片叔叔團隊嘅公關手段相比其餘幾位候選人團隊暫時係較好。唔好講佢先前上黎 unwire 做 Facebook 直播，淨係睇佢琴日宣佈參選個記招嗰啲細微位，咁先似係有備而戰㗎嘛。不過港女比較關心各個候選人點樣運用網絡影響力，雖然戰幔才剛揭起，都可以先睇睇。
首先，一定係佢地各個候選人嘅 accessibility－即係除咗傳媒報道之外，點先睇到佢地啲嘢。打網絡戰無非都係想主導輿論及拉近同年輕人嘅距離啫，所以 Facebook 已經係基本嘢，IG 先係手段呀，因為如果你要畀年輕人睇得出你有心同佢地溝通，就要同佢地同聲同氣。好可惜，無論係 Facebook 呢個網絡平台，還是 IG，都係三缺一。
▲ 搞網絡選戰真係要好多人力物力心力，多隻香爐多隻鬼，無人 update 無嘢睇。
▲ Google 聯想係最正路嘅搜尋方法喇啩？
然後，係佢地反應夠唔夠快。網絡係 UGC 嘅世界，個個都有 say。琴日薯片叔叔宣佈參選之後，Facebook 馬上跟住出宣言 soft copy，網頁同時開張，雖然未有政綱睇到，但都睇得出佢個團隊精心部署呢啲動作，對於網民嚟講絕對係好事。而胡官都不甘示弱，馬上來個正面抽擊，拍片抽佢水，擺到明係衝著佢而來，亦是值得一讚。相比起另外兩位只簡單表示歡迎競爭，希望選舉公平公正，就略嫌花生唔夠多。
▲ 港女都想公平啲，但林鄭無自媒體，網頁又未開，cap 唔到圖。不過，佢係有回應嘅，內容同葉劉差唔多。
網絡除咗容許大家發聲，亦賦予網民起底、翻舊帳、Fact Check 的能力。你睇星期三公佈施政報告就知道，有人唔理三七廿一，為求抽水，再一次今日的我打倒昨日的我。港女都係一個好奇心好重嘅網民，無聊嘅時候就會「回到過去」，相信而家唔少傳媒行家都已經掌握咗四位候選人嘅過去喺手，會唔會出醜就睇佢地造化喇。
但講到尾，今次特首選舉，四位候選人要取悅嘅點會係一眾網民。正如一開頭講到，香港市民，係 99.9% 都無票投㗎嘛。喺呢個選舉制度下，網絡充其量只係一個公關手段。雖然黃子華講得好啱：「做人無公關，食屎㗎喇。」但如果喺網絡呈現出嚟嘅模樣同現實係兩碼子嘅事，有冇公關，其實最後咪又係大家食屎，只係大家開心啲咁食同怨恨咁食嘅分別。