新正頭個個都忙住去親朋戚友屋企拜年，港女都唔例外，開咗爐都仲未拜完，呢個假期真係好充實。拜年同行大運期間，港女就最鍾意同啲細路哥玩㗎喇?，睇下佢地用啲咩機玩啲咩 Game，等自己唔好咁 out，同世代脫節吖嘛。
港女當年仲係小朋友嘅時候，去拜年係同啲表兄弟姊妹連線玩 Gameboy 遊戲嘅，一齊打開心啲吖嘛。而家啲細路哥當然係（最少）一人一部智能電話喺手啦。港女喺同一個場合入面見到嘅小朋友由剛出世到高中都有，每個年齡層有幾個小朋友咁，之但係，港女就從來唔見佢地一齊打機㗎喎，通常都只係坐埋一齊各自打返自己打開嘅遊戲，間唔中?下隔離玩緊乜咁，就比較少一齊打同一款嘅遊戲。
▲ 一班人打機其實真係開心啲喎，各自各玩好無癮㗎嘛。
反而啲大人就仍然咁鍾意組隊打機，咁啱得咁橋，港女有幾個親戚朋友都有用手機玩同一隻 Game，有時拜年真係要坐成日，邊有咁多嘢講，咪連住個 WiFi 一齊上網，幾條友坐埋一邊開局打機。一間屋入面，有人打麻雀，有人玩 Card Game，有人打機，個個都有嘢做，就冇人會悶場啦。
▲新年當然要拎晒全屋嘅「玩具」出嚟招呼人啦，唔係仲等幾時玩呀？
不過最搞笑其實係啲一兩歲嘅 BB 仔女，佢地好鬼醒目，同佢地影相個個都識得望鏡頭笑㗎喎。有啲大個少少嘅 BB 仲會識得擺好甫士 chok 晒表情，主動要求人地幫佢影相。諗返轉頭，當年港女細個嗰陣最唔鍾意就係企定定唔郁㗎喇，所以阿爸阿媽一話幫我影相都黑口黑面皺晒眉咁，不過而家睇返係幾好笑嘅。尤其是過時過節拎返啲以前嘅相出嚟睇，就真係令人笑口常開喇?
▲ 去公園唔係玩，要唔郁定晒格咁影相喎，細細個就識得黑面啦?