我諗唔少朋友呢個星期都留意到 Facebook 有個 Comment 好爆，幾乎個個爆紅的 Post 度除咗文生之外，都會見到佢嘅縱影。港女作為 Facebook 重度用家，當然走在潮流的尖端，事無大小，都喺人地個 Post 度留隻揈頭鴿賀一賀佢先。
呢隻揈頭鴿其實個真名係 Trash Dove（垃圾鴿），一套有 24 款唔同動作，除咗揈頭仲有滿腦子問號、心心眼、流淚等，係由一名來自美國嘅插畫師 Syd Weiler 喺上年 9 月嘅時候創作。最初佢只係喺 Twitch 做直播嘅時候畫過，然後擺咗上 Twitter 之後好受歡迎，佢就試下畫多幾款，放埋入 iOS 10 嘅 Sticker Store 度賣（1.99 美元）。由於喺 App Store 上都幾受歡迎，Facebook 就邀請佢將個套 Sticker 放幾個過去畀人免費用，殊不知 2 月 1 日 launch 咗後就突然一夜爆紅！
▲ 插畫師 Syd Weiler
▲ Trash Dove 於 Facebook 上的 Sticker 款式
事源泰國有個網友就將 Facebook 上兩個識郁嘅 Sticker 合併，形成一個非常「有趣」嘅效果，及後網友就不斷使用呢款 Sticker 洗人版喇。由於短片遭到網友瘋傳，Syd Weiler 當日就已經畀人 Tag 爆咗，佢自己都表示始料不及。佢嘅個人 Facebook Page 仲喺一個星期之內由 700 個 Like 增加至超過 3 萬 5 千個 Like。Syd 表示，如果唔係泰國嘅網友咁樣玩個 Sticker，都唔會有咁大嘅回響。由於套 Sticker 喺泰國爆紅之後迅速令整個亞太區都瘋狂使用，佢仲即刻推出同款嘅 Line Sticker 㖭。
▲ Syd 仲出咗個 Post 多謝泰國的 Fans。
亦有唔少惡搞版本出現…
連真人扮演都有呀…
至於你問港女，呢隻揈頭鴿係代表咩意思，港女覺得佢實在太多詮釋空間喇，我試過用佢表示「強烈同意」（猛點頭），「唔係呀嘛」（狂撼頭埋牆），「唔制呀」（揈頭）等等，而代表無意思，純粹想留個言其實係佔大多數，哈哈，都好視乎讀留言嘅人係點理解嘅。咁你地又會點用呢？