食肥咗可以點急救？娜姐偷師 3個動作燒脂增肌

唔止大時大節會唔覺意食肥咗，其實平日放工同朋友「食好西」，飲靚酒，都好容易唔聲唔聲食多咗，加上上班一族做運動嘅時間唔多，啲鬼祟肉呀肥肉呀就有機可乘出嚟say Hi啦！不過，女士們又唔洗即刻驚到嘢都唔食咁唔健康喎！因為娜姐代大家親身向健身教練Daniel 請教咗幾個方法，女士們只要乖乖地keep住做，啲線條應該都仲有得救嘅（娜姐一向都好樂觀的說）！

相關影片:

第一式：波比跳(Burpee)

一次過結合咗深蹲、跳躍，Push Up三個動作於一身！係就係難做啲辛苦啲，不過燒脂效果好，又可以訓練全身70%嘅肌肉，諗落其實係抵做架！

▲記住要有幾高跳幾高！

建議：

一星期可做三至五次
每次四組
30秒為一組
休息30秒後再做
一星期可做三至五次

相關影片:

 

第二式：深蹲(Squat)

練到腿部多組肌肉，包括大腿前側同後側收緊線條之餘，仲可以順便美埋臀，咁就唔怕番office成日坐到pat pat扁啦！

▲動作簡單，同坐無影凳差唔多～

建議：

每次四組
每組15-20次

相關影片:

第三式：掌上壓(Push Up)

雖然掌上壓唔係燒脂最有效，不過對於鍛鍊三頭肌、膞頭同修緊手臂線條就fit曬嘞！如果一開始未夠力做掌上壓，可以由膝上壓開始喎！（實不相瞞，娜姐都未係太夠力）

▲記得要保持腰直啊！

相關影片:

建議：

每次三組
一組10-20次

 

唔洗驚做錯！事關娜姐喺片到經已盡量做曬啲常見錯誤出嚟，希望幫到大家啦！

娜姐：別太衝！循序漸進+毅力=成功

係人都想一下就有完美線條，一瞓醒啲byebye肉就唔見曬，不過真係發下夢好啦～個人經驗就係千奇唔好「絶食」，萬一搞到無曬食慾，營養唔夠就真係連做運動嘅力氣都無。另外，亦都唔好一嚟就挑戰強度最勁嘅workout（除非你有操開），因為一個唔小心整親嘅話就真係乜都唔洗做啦！

引用番健身教練Daniel句說話：「最緊要係注意每日嘅熱量攝取同埋每日消耗嘅份量。」如果每日消耗多於攝取，配合埋健康嘅飲食習慣，就自自然然會收效啦！提一提大家，除咗做帶氧運動去燒脂，增加肌肉量都好緊要啊！因為當肌肉量愈高，即便唔係運動緊，身體消耗嘅熱量同脂肪都會多啲。

其實都係嗰句啦～有毅力有恆心，慢慢加難度去鍛鍊，營養又充足，就已經好足夠，減肥都可以錫住自己嘅！

有興趣同娜姐一齊做運動的朋友，不妨填寫以下表格選擇你最感興趣的運動主題，資料只供參考用作未來運動班題材之用。如想未來收到「娜Sport」運動班最新消息，記得快啲填表啦!

健身教練　Daniel
國際體育醫學學會認可教練
Peak Performance HK創辦人之一

場地提供﹕
Energy Kingdom
查詢﹕2111 4500
https://www.facebook.com/EYKDM/