港女科技一週:唔係樣樣題材都啱出書㗎

讚好此文:

三月 16, 2017 •數碼港女週記, 獨立評論

港女琴日睇到單新聞,話有位人兄出咗本書教人「搭盡港鐵」,攞盡啲優惠。港女第一個反應就係:點解要出書而唔放上網公諸同好?

港女覺得呢位人兄出書教精人搭港鐵,目的應該都係 for charity 多過想從中賺錢啦,因為呢個時勢賣書真係賺唔到錢,以前就話睇地圖要揭書、搵電話要睇黃頁啫,而家一人一手機嘅年代,點解佢唔選擇寫個 blog、寫個網或者寫隻 app,仲走去寫本書做樹精呢?

港女咁諗,港鐵啲優惠一年更新幾次,連續推出幾年嘅第二程八折都可以突然無咗,轉咗做其他優惠;就連港鐵優惠站(俗稱 「嘟兩蚊」)個位置都會轉㗎。而除咗教人攞優惠,書入面仲教人「用盡玩盡設施」。認真,個個人都話你離開香港一年,街上啲舖頭都唔同晒,樓都起多咗幾幢。香港啲嘢變得咁快,住喺度都追唔切,寫本書出嚟真係咩玩法?本書好快就會 outdate 㗎喇喎,而家寫書真係要揀啲無時效性,歷久不衰嘅題材,揭兩揭就不合時宜,簡直係違背咗佢出書教人慳錢嘅原意。

如果佢或者出版商諗住可以靠香港人貪小便宜的心態,將本書賣出去,sorry,我諗大家也太睇小香港人。識睇一定去書局睇完放低,或者去圖書館借,同旅遊書有異曲同工之妙。

其實用呢個題材寫隻 App 都幾 make sense 吖,可以實時更新資訊,又可以 reach 到多啲人,何樂而不為呢?

不過講到尾都係港鐵嘅錯,佢地都唔開個 api 出嚟,developers 想用佢啲數據又用唔到。港女早前同過一個 startup founder 傾開,佢正正就係做呢啲本地交通優惠嘅 App,試過同呢啲大公司 deal open data。佢話一定要預咗唔得先,就算佢肯開放畀你,都會係限時限刻限量,因為佢地根本唔明 open data 嘅原則。相反,佢地喺台灣嘅業務就得心應手得多,因為多個交通企業都有開放數據。

既然大家都見到市場上有呢個需求喺度,書又出咗, App 又有人寫,點解呢啲大公司仲唔與時並進,開放啲數據出嚟,等個社會一同進步呢?

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: ,

讚好此文:


Comments are closed.

unwire TV



更多同類文章:

最新文章