當人人都爭住想做宇宙最強嘅時候，偏偏早前（4月9日）喺香港理工大學 Maker Faire到就聚集咗一大班鬥廢鬥得好熱鬧嘅人！唔理係大人定細路，都將自己嘔心瀝血嘅「廢柴機械人」拎出上擂台，務求要贏到「廢柴機械人比賽」 冠軍之名！究竟可以廢到咩程度，又有咩搞鬼創意機械人呢？繼續向下碌就知啦！
其實香港廢柴機械人大戰己經係第三年搞架啦！由兩位理工大學電子及資訊工程學舊生（Tree及Lucas）做搞手，將喺日本發源嘅「廢柴機械人比賽」帶到嚟香港，等大家可以多啲利用身邊嘅野，發揮創意，做出屬於自己嘅機械人！成個比賽嘅精神在於唔好怕失敗，要行出第一步先，即使輸咗亦無乜大不了，互相交換番經驗，一齊進步！
啊～不過都有些少規則要跟番喎！成個機械人嘅重量唔可以重過1公斤，最多只可闊 50cm 同長50cm，而高度就無限制～ 大會亦都講明唔畀用啲高科技野黎整，總之一句講曬，愈廢愈好！
▲一共有32位參賽者！當中仲有唔少小朋友添架！
▲最窩心都係見到親子一齊參賽?
▲依部得兩個轆加塊紙皮，可以話係全場最慳功夫嘅機械人啦！有請「貼地紙皮」??
▲今屆「Somehow 敲多敲」睇得又鬥得，成功將所有「廢柴機械人」推曬出街??
▲仲有以「屎」同「屁股」為題材嘅機械人！仲盞鬼到識跌屎架?
▲依隻「鼠王funz」亦都好得大家歡心，仲好欣賞佢嘅必殺技「咀鑽炮」！
▲以自己鍾意嘅野做靈感都得架～例如動漫?
相關影片:
