最近城中話題，大概都圍繞著 3HK 在街免費派大量 5GB data 一月 SIM 連任睇 myTV SUPER 內容，更有人拿完後放上網炒賣，認真瘋癲！不過作為真正用家，拿了卡後可能會問：究竟 5GB 可以點玩 ? 仲要玩盡一個月？今日 Edward 就取得此卡，為大家實試一下！
插落手機未能上網 + 打電話
筆者拿來 Samsung S7 edge 來進行測試，3HK 的 5GB 免費 SIM 實際上同一般 SIM 卡無分別，不過真係插落手機度大家就知道：一般上台出 SIM 或者買儲值卡，都係即刻可以上網同埋打電話，但今次呢張 3HK 免費 5GB SIM，一放落電話度開機，不但未能上網亦未能打電話住！咁點樣先可以上到台？大家需要按包裝內的指示上網進行登記，完成後唔單止可以睇到一個月免費 myTV SUPER 內容，亦可以用到 SIM 卡所有功能了。至於登記步驟，大家可看以下教學：
▲大家可見未登記前，手機的電話是不能打出的。
▲就連上網都上唔到。
Step 01：
拆開包裝，你會看到 3 件物件：包裝紙、SIM 卡及說明書。
Step 02：
點按此登入 3HK 網站，然後選擇「啟動數據卡」。
Step 03：
你會在 SIM 卡頂部條碼下方或 SIM 卡上找到一個 18 位數字的號碼，在此頁面輸入，然後下方輸入你自己本身的電話號碼（因為此 SIM 卡的電話號碼還未開通，你是不會知道的），再輸入你的電郵地址及驗證碼，最後勾選「本人同意和記電話……」，再按「下一步」。
Step 04：
此時你上頁登記了的電話號碼及電郵，應該已收到一個密碼。然後大家就將該密碼填在此頁面，再按「下一步」。
Step 06：
如果密碼正確，就會出現此畫面，再按「下一步」，再填上大家的名稱、選擇稱呼、電話號碼及電郵地址（剛才登記的那兩個），最後可以選擇不勾選底部兩個選項，然後按「下一步」。
Step 07：
跟著會列出各項條款細則，大家有興趣可細睇。看完後勾選「本人謹此確認…..條款及細則。」的選項，再按「下一步」。
Step 08：
SIM 卡登記至此完成！大家在此頁會終於看到大家的電話號碼，而手機的通話功能亦會被開通。此時點按「完成」，就可完成此登記步驟。
Step 09：
在 2 至 4 小時內，大家會在剛才登記的電話號碼上收到短訊，當中會有 myTV SUPER 的登入帳號及密碼。將它們記下來。
Step 10：
然後下載 myTV SUPER APP（iOS / Android），再在登入後輸入剛才的登入帳號及密碼。
Step 11：
登入完成，你此時會收到短訊確認免費試用 myTV SUPER 30 日，此時大家已可以一個月內免費任睇 myTV SUPER 了。
5GB 唔限只睇 myTV
之前坊間一直有話，今次 3HK x TVB 推出這張免費 SIM 卡，5GB 用量就只能用來睇 myTV 同埋 myTV SUPER，但實際上筆者試過，用來睇 myTV 或者 myTV SUPER 自然無問題，但用來睇 Netflix、ViuTV、YouTube 等都無問題，甚至用來 share 網絡俾電腦用都一樣得，今次合作只是多了一個月免費試睇 myTV SUPER 而已，大家就不用擔心了。此外，今次這張免費 5GB SIM 亦沒有限速，與一般上台簽的 4G Plan 一樣，用 OFCA 測速軟件在牛頭角 unwire office 附近測試，上、下載速度都有 39.3Mbps 及 70.5Mbps，對於追求極速用家來說，都肯定夠用了。
▲用此免費 SIM 睇 YouTube 完全無問題。
▲睇 myTV SUPER 煲劇當然無問題啦，送架嘛！
▲但用來睇 Netflix 一樣得！
▲用來上 Viu APP 追劇同樣 no problem！
▲用 Spotify 聽歌同樣未見問題，超級暢順！
▲當然用來 tethering 俾電腦上網用亦無問題啦。
▲速度方面，用 OFCA 測速軟件測試，獲得 70.5Mbps 下載及 39.3Mbps 上載，可見與一般無限速有限 data 量月費 plan 是一樣快的。
5GB 睇到幾多嘢?
好多人可能會問：「3HK 的 5GB SIM 雖然係免費唧，但究竟睇到幾多嘢？我真係無乜概念喎！」而家就等 Edward 用幾個大家現在及將來會比較常用的平台，各自都以串流模式播放各種多媒體檔案一段比較長的時間，讓大家對 5GB data 可以睇到聽到幾耐嘢有一定認知吧。
▲未測試前已用了 191MB，此 part 不計算在今次測試用量內。
一. YouTube 睇 1080p 影片
第一回合就以大家最經常用來睇片的 YouTube 測試，筆者找來 1080p 版本的《Les Miserables 10 周年演奏會》，連續播放 1 小時進行測試。過了一小時後，用了 593MB 用量。到此時，5GB 用量還剩下 4.5GB 左右。
▲睇 YouTube 片是採用 1080p 畫質的。
▲睇完後用了 593MB 流量。
二. 睇 myTV SUPER 直播一個鐘
第二回合，筆者就登入 myTV SUPER，並以高畫質欣賞韓劇《龍八》第一集（該集長度：59 分鐘 44 秒）。播完第一集後，用了 630MB 用量。到此時，5GB 用量還剩下 3.78GB 左右。
▲睇 myTV SUPER 劇集設定畫質為「高」。
▲睇完後用了 630MB 流量。
三. Netflix 追 House of Cards
近月 Netflix 這個平台備受不少 wire 民喜愛，尤其是外國已開始上映 House of Cards 第四季，不少人也會上 Netflix 煲番 House of Cards 頭三季。筆者在第三回合，就以 Netflix 播放 House of Cards 第一季第一集（該集長度：56 分鐘 26 秒）。播完第一集後，用了 770MB 用量。到此時，5GB 用量還剩下 3GB 左右。
▲至於睇 Netflix 是不能讓用家在 APP 內手動設定畫質的，但欣賞時基本上都是高清質素，用了 770MB 流量。
四. 煲 Viu 節目一小時
全新電視台 ViuTV 將會在 4 月初首播，相信大家都等得好心急吧？究竟睇 Viu 節目又會用大家幾多 data 呢？筆者就特地登入 Viu，睇了近期大熱的《太陽的後裔》第一集（該集長度：59 分鐘 39 秒）。播完後，用了 510MB 用量。到此時，5GB 用量還剩下 2.5GB 左右，即是已經用了一半！
▲至於 Viu APP 方面，設定畫質為「高質」。
▲播完後用了 510MB 流量。
五. 聽足一個鐘 Spotify
最後，筆者就登入 Spotify 平台，並用「極緻音質」串流播放五月天的《諾亞方舟演唱會》。筆者聽了一個鐘後，用了 180MB 用量。到此時，5GB 用量還剩下 2.3GB 左右。
▲設定串流音質為「極緻音質」。
▲聽完一個鐘串流音樂後，用了 180MB 流量。
未必可玩到 1 個月
其實今次測試，皆在為大家計算一下 5GB data 究竟可以睇到幾多內容。如果以上面的測試來睇，大致每項可以欣賞到以下時間的內容：
- 8.43 小時 1080p 畫質 YouTube 影片，或；
- 7.94 小時高畫質 myTV SUPER 節目，或；
- 6.49 小時 Netflix 節目，或；
- 9.8 小時高畫質 Viu 節目，或；
- 27.78 小時極緻音質 Spotify 音樂。
從上面可見，大致上影片上，以每集節目大約 1 小時計算，大家可以看到 6 集至接近 10 集不等的節目，或者連續聽足一日以上高質素串流音樂。大家留意，這只是計算單一程式的用量，還未計算大家會用 data 來玩 WhatsApp、Facebook、收 email 等，所以 5GB 用量看似很多，但在今時今日這個串流影片質素愈來愈高的世代，對於超高用量用家來說，5GB 用量實際只夠半個月使用。
換你個人資料宣傳
不過話又說回來，今次 3HK 與 TVB 合作推出這個 5GB 免費 SIM 卡，畢竟無須大家付出分毫，已能享有 5GB 流動數據用量，筆者覺得都算係賣大包啦。不過嘛，大家要留意「魔鬼在細節裡」，大家可以選擇不提供個人資料予 TVB 作促銷不同商品之用，但就一定要同意可用你的個人資料作促銷他們的電訊產品及服務之用。所以這世上確實「沒有免費午餐」，據聞 3HK 見上次反應熱烈，有機會再推免費 SIM 活動，大家是否參予？在決定前就要考慮清楚是否願意「出售」個人私隱這一點了。不過筆者認為，今次 3HK 只是要大家填寫電話號碼及電郵，未有要求填寫身份證號碼或其他個人資料，還算是可以接受的。
最佳平衡應點玩 ?
set 得太靚又快玩完，太差又難睇，到底點玩先最好呢?
- 畫質可以的話不要設定為「高」或 720p 以上，聽歌時音質亦不要設定為「極緻」或「最高」，其實在街聽歌或睇片，中級左右已經足夠。
- 盡可能不要在使用 data 環境下下載 APPS、電郵附件、WhatsApp 或 Facebook 中相片、以及其他音樂或影片，最好在 Wi-Fi 環境下上網時才做。
- 盡量不要做直播，例如：Facebook Live、17 等，因為極耗流量。
- 雖然 3HK 容許用家分享網絡給電腦使用，但如果你想節省流量，如非必要就最好不要了。
分享到 :
最新影片
