文: 先之達人
快人一步，唔只理想達到，你想賣機賣幾貴都得！講緊既係先達剛剛到貨的兩部Sharp手機DoCoMo SH-03B同Sharp 7118c，前者係正宗解鎖日系機，後者係大陸行貨（落到香港其實都係水貨）。
SH-03B 加了鍵盤，部機叫做比其他日系機特別少少。
先講功能，SH-03B 雖然係今季新機，但鏡頭仲停留在 500 萬像素水平，Out 左唔只一季，可以sell 的賣點，就係有Wi-Fi 俾人上網，有個鍵盤方便人打SMS，仲有個3.7 吋 Multi-Touch 屏幕俾人捽，過一過手癮。至於 7118c，雖然係大陸最新機款，不過就新到連中國「夏普」都未正式發佈，但其實佢部原版 SH-06A，已經係出了八、九個月的舊機。7118c 仲要將原版個 1,000 萬像素鏡頭「降呢」到 500萬，老實講句，除了唔使解鎖同完全支援中文外，我寧願玩番 SH-06A 好過啦。
7118c 的造型同SH-06A似足九成，係爭在一部係中國機，一部係日本機。
講到最到肉的價錢問題，SH-03B 賣緊 $3,780，而7118c 就盛為$3,980大元。喂，出左唔算好耐、兼有 1,210 萬像素鏡頭的 DoCoMo SH-01B，都係賣緊 $3,780 左右咋喎，呢兩部機究竟憑乜賣咁貴呀？咪就係快人一步囉！而家兩部機各在一間先達舖做緊獨家，老闆咁快拎到機返香港賣，中間緊係俾人托起個價架啦，所以咪要賣咁貴囉。正所謂早買早享受，遲買平幾舊，你想玩呢兩部機、又想平D既話，咪等下囉！
分享到 :
最新影片
