日系手機真係出極都有，呢兩日又有新款進駐先達，今次部機仲夠晒特別，識得分體架！
佢係 Fujitsu 生產o既 DoCoMo F-04B，剛剛三月尾先o係日本推出，唔夠一個禮拜就俾水貨商帶到番香港，兼用 Hyper-SIM 破解埋，o係香港用得到，唔似得近排幾部 Sharp 機咁，連 Hyper-SIM 都搞唔掂，香港賣唔到。
部機點樣分體？就係屏幕同鍵盤部分都要插電，跟住就可以分開獨立運作，你就咁拎住個芒o黎篤又得，用鍵盤打字、再透過藍牙無線傳番去個芒度亦得，得左！平時將兩 Part 合番埋一齊，又會變番普通推蓋機樣。加埋部機仲內置左個投影機，又有 1,200 萬像素鏡頭，都幾多賣點o下，所以而家機價叫到 $4,480，都唔算太過份。不過，暫時全先達只得一、兩間手機舖賣緊部機，遲o下多幾間舖賣，機價應該會回落少少，到時入手就更加抵啦！
SoftBank 840SH 就係近排解唔到鎖o既 Sharp 機之一，所以就算有少量現貨到左香港，手機舖都賣唔到。
查詢: 海銳流動（2393 0787）