串哥上黎 unwire.hk 收到唔少回應，事源係因為我之前果篇講老闆 Block MSN的文，連我朋友都問我點算好？其實方法好簡單:唔用咪得囉！我朋友竟然話萬萬不能，皆因佢話用 MSN 追緊個女仔。呢個理由又真係幾諷刺．．不過見好多網友都有呢個要求，我又不妨講下點「破解」公司的監察系統
方法 1:加密 MSN
公司監控你 MSN，對話內容老闆話睇就睇，但加左密之後，老闆睇到只係一堆無意思的垃圾碼。要加密的話，你同你 Honey 兩個的 MSN 都要裝一套叫 MSNSHELL 的軟件，裝好之後兩邊都要打開個加密功能就 okay，成功加密的 message 成句會唔同左色，好易分！由於其他人無裝呢套軟件，同佢地對話依舊會比公司監察到。所以只要你同你 Honey 唔好狂 MSN ，攪到舊監視器紀錄成版都係垃圾碼的話，一般都可以過骨。不過你要自私啲唔好教同事用，個個都加密的話，你地準備集體照肺啦!呢個方法只係適合公司比你 MSN用 但怕被監察的打工仔用，如果公司 block 左msn，可以試下面的方法。
加密左就唔驚比人睇到對話內容
方法2 :用屋企部腦上 facebook/MSN
Block得你msn,你都唔使再試乜鬼 ebuddy , msn online，一般 block 得msn都識block 埋呢d online msn 網站。可以用另一個方法，簡單講就係公司 connect 番屋企，然後搖控用屋企部腦做野，例如 MSN、玩Facebook、上其他網站等等全部交由你屋企部機做晒，咁樣的話公司部監察戲就無紀錄了，不過你屋企部電腦就唔閂得機喇。方法好簡單，屋企部機上 www.logmein.com 網站申請個戶口，免費的唔使擔心！佢會係 Broswer 教你裝舊野，好簡單咁幾粒制就攪掂。返到公司用 IE/FireFox 登入 www.logmein.com ，打番你自己戶口資料就會比你連接屋企部腦。呢個網站最堅的地方係可以破到好多公司防火牆，又唔使安裝軟件。不過各位要留意，因為你不停連接緊屋企部電腦會令你流量提升，好易比 IT 發現。所以連接時候去設定一下解象度，有咁低得咁低，色彩有咁少得咁少，最好行黑白，唔用時斷左佢，咁樣流量就會大大減低，無咁礙眼。不過串哥唔保你公司都 block 埋 logmein 網站，咁就唔洗玩喇。
remote connect 返屋企，去邊都無人阻你又無人知，不過最好set番黑白同低解象度
以上兩個方法，基本上好容易攪掂，如果真係唔識就問下朋友啦。 其實各位打工仔又唔係過份擔心，老闆唔會咁得閒下下昅實個監察器，同埋九萬幾個對話紀錄佢都無心機逐個睇，一般老闆只係粗糙睇下你 MSN 多唔多，如果唔太多一般都唔理你，同埋佢地會 search 一啲 keyword 去查你有冇洩露公司機密或講佢壞話。其實仲有好多招，不過要對應各公司的網絡環境同埋設定太難唔係度講喇，呢兩個方法係最易又有效的。其實做老闆，如果員工唔係太過份的話，咪算囉，有時 relax 下反為 keep 到工作效率，吊頸都要抖下氣啦，你唔比佢地msn，班友仔咪成日去廁所，pantry 飲水咁 hae，時間又係番度。
相關文章:
Facebook 關鍵數據改為觀看次數 取代原先的曝光數 澳洲禁 16 歲以下少年使用社交平台 社交媒體需驗證用戶年齡 Meta 或將開發 AI 搜尋引擎 減少依賴 Google、微軟
分享到 :
最新影片
