近排先達仍然係「除左 iPad，都係 iPad」，好彩早幾日新到左部 Android 水機 Motorola MB300，佢仲有特別o既 Back Flip QWERTY Keyboard 設計，有d Talking Point，先令個場冇咁悶。
Back Flip，顧名思義係個 Keyboard 向後反咁解，有別於一般向上或向右推出 Keyboard o既機款，的確係幾新穎，唔怪得先達都幾多人講佢。但真係得個講字，我聽聞買o既人好有限。點解？因為貴囉！成 $4,980 呀！就咁睇個銀碼，大家可能意識唔到佢有幾貴，等我列埋Ｄ Spec 出黎，大家就會明架啦。部機只得 528MHz CPU、256MB RAM 同 512MB ROM，所以Ｄ人玩完都插佢勁慢；鏡頭又得 500 萬像素，連影相o既賣點都唔係突出。最慘係佢仲係行 Android v1.5 OS，嘩，真係 HTC G1 之後都好似未見過，雖然有得 Upgrade o者，但原生係咁都唔好睇啦！
呢鋪仲要唔係舖頭賣得貴，部機o係歐美都賣成 5 百幾美金，計番點都要四千幾港銀，即係冇得撈喇定價o既問題。咁o既 Spec，唔通冇得撈喇真係諗住靠個特別設計就可以賣咁貴！連暫時獨家賣佢o既G-World Ｄ Sales哥哥，都暗示佢應該好快跌價，但因為來貨價唔平，所以減都應該減得有限度。如果都係去唔到貨o既話，班大哥話可能唔會再賣添！
Keyboard 即係機背，Ｄ掣同鏡頭擺埋一齊。
反番個 Keyboard 上黎，就可以拎住黎打字。
反完 Keyboard 後，背面就係咁o既樣，芒背仲有塊 Touchpad，俾人操控部機。
反到個芒成 45 度角，就變成座檯睇片o既款。
分享到 :
最新影片
