近期 SE 好興玩突襲，所有新機都係現場派左落場後，代理先郁手搞發布會同宣傳，真係落先達收風仲快過望天打掛等 PR 比料！相信大家已知最近兩部新機 Vivaz Pro 同 Xperia X10 Mini o既情況都係咁，佢地o係上星期先後開售，但 X10 Mini要到今個星期二先搞發布會，Vivaz Pro 更冇打算搞添！D 機唔聲唔聲咁賣，先達班大佬話唔係好事喎！
佢地點解咁講？因為買行機同買水機係兩班客，玩開水機 D 人，多數熟晒黎緊有乜新機出，又會成日睇實先達，見到睇中o既新機出左就即買，D 機緊係愈快到步愈好！之但係好多行機客未必好熟 D 機款，通常見到傳媒介紹同代理谷宣傳先會考慮買機。而家 Vivaz Pro 同 X10 Mini o既曝光率仲未係好高，就算上星期俾 D 人o係先達見到佢地，都唔知係乜機黎，又唔知好唔好用，自然唔會買。所以行機唔聲唔聲推出，對先達舖唔係好事，仲要 Vivaz Pro 同 X10 Mini 都未有水貨到港，結果搞到呢幾日黎，佢地o係先達都唔算好賣。
Vivaz Pro 係之前部 Vivaz 加入鍵盤o既進化版，主打功能繼續係拍到 720p 高清片。
講番兩部機o既價錢，定價分別係 Vivaz Pro $3,780 同 X10 Mini $2,480，所有大舖仲未開始劈價，先達亦只有舖小減 Vivaz Pro $100 去到 $3,680，但 X10 Mini 都一樣冇舖減價，咁 D 客緊係走去幫襯大舖啦！
X10 Mini 反而係 X10 o既入門版，主打輕巧機身同多色機背。
