iPhone 4 行貨仲未出，o係街仲未係人人有部o係手o既時候，如果你有部o係手，肯定你會成為人群中o既焦點。你手中o個部仲要係白色機o既話，嘩！不得了！鬼佬都會望多你幾眼！事關連美國都要年尾先出呀！尋日先之達人經過先達 1 樓，竟然見到有人拎住一部喎，究竟係乜野來歷？唔通係山寨機？
我膽粗粗去問拎機果位哥哥仔，原來佢係專幫人換手機殼o既，果部機個餡真係 iPhone 4 黎，只係哥哥仔自己郁手換左個殼o者！我睇落個殼比一般 A 殼好手工，幾似堅野，到底點黎？連哥哥仔都唔肯定，話有好多傳聞，有人話係富士康流出黎，甚至有人話係由之前搞到滿城風雨o既外洩工程機拆出黎，總之哥哥仔話係好貴入番黎！
佢仲話好多客見到佢個白色殼咁型掍，都想換埋一份，但大部分人問完價都耍手擰頭。喂！哥哥仔你講到咁，引到我好想知個價錢喎！幾錢呀？哥哥仔答：人工包料 $2,800。我聽到呆一呆，成機價一半喎！不過我又咁諗，早排用得天價買 iPhone 4 水機o既人，都唔至在兩千幾蚊啦！就算行貨出左，果 D 想潮想威o既人，肯俾呢筆錢換白殼都出奇喎，個殼堅唔堅亦唔重要，最緊要有得搶先威嘛！