以往花展都係一家大細去賞花，共聚天倫的好地方。但唔知由幾時開始，花展變左攝影器材展，變左人性行為展、攝影器材展。只要你講得出的相機鏡頭，基本上裡面都差唔多搵得到，可能仲好過去博物館或鋪頭。好多人儲儲埋埋好多野，會係呢個一年一度的活動一次拎晒出黎曬太陽。鍾意睇攝影器材的朋友，不妨入場參觀一下，同師兄們吹吹水可能會獲益良多。
人性行為展，都係近年先開始的。先係講無公德心的事情，有影友為左影靚相，不停對花噴水造水珠，有唔少花都因為咁樣而燶左。亦有朋友帶埋個唔知女朋友定係model 入場留倩影，跟住一個唔覺意成個人訓左或坐左落花到，一起身成個人形，底下的花當然跟住死啦。又有唔少人摘花落黎戴係頭到做裝飾影相，或者摘幾朵放係B女個身到裝飾影相。以上行為都有違公德。
另外，有女士的地方，自然有短裙；有短裙的出現，自然有春光窄洩。舊年都有某d 不道德龍友，趁女士們坐低影相或者擺pose 時偷拍春光，果位仁兄好似比人捉到正。亦有龍友因為搶靚位發生碰撞，係場爆粗內鬧交收場。以上行為都算係在公眾地方行為不檢。
當然，有邪惡既地方，就有正義既朋友出現。正義朋友不外乎睇佢地唔過眼，影相post 上網等大家評理，或者當面勸喻邪惡既朋友。三幾十蚊入花展，有相機鏡頭睇，又有人生百態睇，有機會仲有靚花睇添。真係好值得入去行一行。
其實，好多時大家都係影張相，有咪有無咪無，做乜要搞到犯晒規犯眾憎。想有超越一切不可超越的境界既大作，一定唔會係呢個眾志城城既地方影到。而且攝影本身就好講究個人修為同眼光，如果連少少公德心都無，影響到其他人，比你影到張靚相又如何。
嬴左張相，輸左人格，值得嗎？
相片來源 :
Profile :
小明 – 五年 wedding photography 經驗，現職於 <MiCe Photography> 攝影師,熱愛攝影，WPJA, WPPI, WPHK 會員及 英國皇家攝影學會會士.對於香港這個用金錢扭曲的攝影世界常常有感而發
