相信在上年 Windows 8 推出之前，大家對於 Touch Screen 的認識只限於智能手機、平板電腦及部份高階的 AIO 一體化電腦和商用 Tablet PC。而大部份用戶對於 Touch MON 均顯得十分抗拒。事隔差不多一年，最近筆者和場中的 Sale 哥哥「吹水」，便發現電腦用戶已經對 Win8 作業系統和輕觸屏幕這對配搭相當受落，連店長都話反應比起預期好呢！
仲記得剛剛推出 Windows 8 的初期，各界對於這個新系統的操作普遍劣評，除左冇左大家用慣用熟的 Start Menu 啟動鍵之外，Modern UI 動態磚介面亦被踩得體無完膚。歸根究底，當時電腦用戶大部份仍在使用 Win 7 作業系統，要適應一個新的作業系統從來都是一件十分麻煩的事，再加上首批登場的新 Notebook 因為成本問題，普遍都唔會配備 Touch 芒，攪到要用 TouchPad 黎玩「動態磚」真係難上加難！
雖然當時不少用戶想盡辦法都要由隨機預載的 Win8 降返落去 Win7 OS，不過當過左幾個月，大家發現用緊既人冇咩大投訢、軟件的支援性比起當年 Windows 7 好得多，而且當大家身邊又有越黎越多朋友升級的同時，自己慢慢地亦都開始接受新系統，情況就好似當年 XP 升 Win 7 一樣。
另一方面，腦場所賣的輕觸筆電亦由以往因為成本較高導致售價比起一般「非輕觸」筆電貴近 $1,000-$1500，差距漸漸收窄至不足 $500，部份筆電甚至為了追加輕觸 MON 而選用成本較低的硬件規格（所以大家係腦場可以見到好多用左 Intel Core i3、Pentium、AMD A6 等成本較低處理器的機種出售），售價下調亦是輕觸式 Win8 筆電獲得更多用戶支持的主要原因之一。
其實手勢操作大家已經係智能手機、平板電腦用慣用熟，伸延到 PC 上面只係時間既問題，而當大家接觸過 Windows 8 之後，唔怪發現新的 Modern UI 介面真係 TouchScreen 十分之夾，用過就好難返轉頭。當然，筆者所講既就只限動態磚介面同埋一 d專係為輕觸屏幕而編寫的程式。而用慣左輕觸筆電的朋友，只要見到 Win8 個操作介面就會自動波用隻手去「篤芒」，腦場 Sale 哥哥更話，唔少國內的同胞一見到 Win8 機就起勢篤個芒，完全唔理部機有冇 Touch 功能，比佢地整壞幾部攪到最後賠錢收場咁就真係樂極生悲了。
由各大電腦廠商下半年的 Road Map 可見，配備 Touch Mon 已經成為主流筆記簿型電腦的標準裝備，比起光碟機更加重要，而隨著 Windows 8.1 快將推出為 Win8 補飛，可以預期 Windows 8 x Touch 芒呢個組合將會成為電腦必備的配搭，而且手勢操作係 Windows 上面的應用將會變得越來越廣泛，相信唔少人就好似筆者咁係度等一個契機升級手頭上老舊的筆電，唔知 Windows 8.1 會唔會比到藉口大家呢！？
