這些年，好多人都流行講番「那些年」，今次專欄，就等小編同大家分享一下小編「那些年」最鐘意玩嘅電腦遊戲《三國志》啦！
其實《三國志》，相信好多好似小編呢種「八十後」都有玩過，而熟悉小編嘅朋友，應該都知道我係光榮《三國志》系列嘅瘋狂 fans，基本上除咗第一代之外，每一代我都有玩過。當然，鐘意嘅原因，除咗係因為小編自細已經鐘意中國歷史（尤愛三國一段時期嘅歷史）之外，仲有另一個原因就係可以感覺親身扮演三國時代嘅君主，與不同著名武將「馳騁」沙場，逐鹿中原，最後一統天下！
細說《三》系列歷史
其實講起《三國志》遊戲系列，小編仲記得細個個時屋企無電腦（小編屋企唔算有錢，要去到讀中六個時，阿媽先買部電腦俾我咋，個時仲要呃佢話用來做功課，實質用來玩《三國志》，嘻嘻……而家諗番都覺得自己好衰），所以好多時都係放咗學之後或者放假個時，去同學或者老死屋企玩。由於《三國志》好多集都係玩回合制，所以就同死黨輪流 control，仲記得個時大家為咗唔想對方知道自己做咗咩指令，當到自己回合個時，另一個人會出房或者做功課，仲要講明唔準偷睇！哦～如此美好的「那些年」哦！
▲仲記得第一個接觸嘅《三國志》系列就係二代，個時只係用 keyboard 係咁打數字指令就玩到，而且畫面簡單到無倫，但都一樣玩得好開心，個時仲笑朋友佢用 keypad 打指令直頭係摩打手，快過係 ICQ 打字添！
▲到後來玩《三國志 3》雖然仲係用鍵盤已經玩到，但係城市多咗好多，仲有好多寶物，同商人買到嘅嘢又多咗好多，呢隻係小編第一隻真心愛上嘅《三國》game！不過當年要玩攻城就好鬼難，所以次次打人都要用壓倒性兵力先敢開戰，因為打城牆真係可以蝕好鬼多兵架！
▲到《三國志 4》，呢隻係小編少數鐘意嘅「雙數系列」《三國》game，愛上它無它：有雷擊！呢樣真係超「屈機」嘅特技，每次出少少兵力打對手吸引對方野戰，再用雷擊打擊對手，只要好彩打中對手嘅主將 + 拿住兵糧個隊，對方就會死梗或即刻走佬，呢招小編用來打過好多場「以少勝多」嘅戰役呢！（打董卓，佢俾雷打中個下真係爽歪歪！）
▲《三國志 5》，第一款可以玩陣形嘅《三國》系列遊戲，個時只係記得唔好俾人用突擊陣「隊屎忽」，同埋守城用「方圓」陣完全係超屈機。
▲之後嘅《三國志 6》同埋《三國志 7》，雖然都加入咗唔少新元素，但小編都唔太 like，到咗《三國志 8》，遊戲入面嘅女人終於「有用」，就係可以結婚！仲要結婚後係可以有唔同能力嘅加增，個下覺得好新鮮架，佢係第二隻小編勁玩嘅《三國志》雙數系列 game。
▲至於最後一隻小編鐘意嘅《三國志》系列 game，就係《三國志 11》，鐘意嘅唔單止係佢終於結合咗城市管理同埋戰爭場面係同一畫面，而且每個城市擁有用來建設「設施」嘅空格數都有限，我可以按城市類別同埋是否處於前線來決定城市用途，仲可以係畫面起好多軍用設施，例如：提升士氣嘅軍樂台、扣除敵方士兵嘅陷阱、投石車等，加埋唔同嘅關口，又可以有唔少「隱藏」秘道玩突襲，係咁多集《三國》系列中小編覺得最近似真實戰場嘅一集。當然，呢集又係小編玩得最開心嘅一個系列。
其實講起《三國志》，小編一直都係鐘意「單數」系列多於「雙數」，當然有人話「單數」、「雙數」係兩條唔同 team 研發嘅，亦有人話「單數」比較著重武將，「雙數」比較著重君主。當然，呢啲某程度上都係事實，但小編覺得真係去分其實唔一定係咁分嘅。不過小編玩過咁多集，「單數」系列確實比較多突破，例如：3 打仗好玩咗好多、5 首次加入陣形、7 就更著重武將培訓同埋更似 RPG、9 就可以主動攻打異民族、11 就將內政、戰場合二為一等。
講番起來，小編鐘意嘅《三國志》系列，包括：3、4、5、8、11，當中確實係以「單數」較多，而且鐘意得比較全面，同鐘意 4 只因為雷擊、8 只因結婚相比，單數系列嘅投入感真係大好多。到咗之前出咗《三國志 12》，雖然明知係「雙數」系列作品，但係顧念佢拖咗咁多年先至出，加上聽聞揉合咗 9、10 同埋 11 嘅元素於一身，所以個時都有買來玩，但最後換來嘅只係失望，因為都真係幾悶，詳情唔多講，想睇 comment 嘅可以睇番下面呢篇小編舊年寫嘅評測文。
悶爆之三國志！三國志 12 試玩後感：http://unwire.hk/2012/04/23/sans-12-first-taste-feeling-share/headline
首次加入「戰國」元素好玩咗
好啦，到咗最近光榮終於出咗《三國志 12 威力加強版》，仲要係繁體中文版，不畏死嘅小編雖然理智上不停同自己講記住舊年出《三國志 12》嘅悶爆經歷，但最後都係抵受唔住心癮買咗番來玩。最終結果係：確係比 12 好玩咗，不過仍然係覺得操控方法悶爆（無辦法，每次加強版都只係加強元素，而唔會改變個遊戲玩法）。
好啦，如果你未玩過，就等小編同大家講講今次加強版加咗咩新功能同元素入去啦。首先就係每次出加強版例牌加入嘅新劇本，今次就終於唔洗大家 unlock 已經玩到「呂布討伐戰」、「潼關之戰」呢啲經典戰役，亦加入咗史實劇本「漢朝騷擾」（黃巾之戰）、「徐州變遷」（劉備入徐州幫陶謙拖）、「漢中王劉備」（劉備做咗漢中王後未同孫權開拖、關羽未死個時）同埋「五路侵攻戰」（劉備死咗曹丕搵五路大軍攻劉禪前），亦加入咗虛構劇本「霸王袁紹」（曹操係官渡之戰前夕親征徐州劉備，而袁紹趁呢個時候進攻兗州並成功壓制，張繡亦背叛了曹操，孫策亦對北上攻略中原虎視眈眈）同埋「戰國七雄」（亦即是時光倒流番去公元前 246 年玩戰國七雄！！），而幾個新劇本入面，小編最 like 就係「戰國七雄」，因為終於可以係三國志嘅遊戲世界，體驗戰國年代群雄並起嘅年代，當中好多歷史事件，好似「負荊請罪」、「一鳴驚人」、「完璧歸趙」等，全部都會出現，個感覺好新鮮呢！
▲咁多個新劇本，小編最 like 呢個戰國七雄，感覺好新鮮！
▲好多戰國經典史實都會全部出現！
▲當然唔少得嘅就係戰國年代嘅人物啦，好似「韓信」、「劉邦」、「英布」等。
要迎擊異民族！
另外，《三國志 12 加強版》都加入咗異民族嘅元素，唔單止大家可以用錢同佢地買糧買軍力，仲可以請佢哋打對手！當然，你咁諗得出人哋都一樣識諗，都會搵異民族攻擊你嘅城池，大家呢個時候就可以出兵去討伐佢哋！記住，俾異民族打千祈唔好拖，因為你一日唔趕走佢哋，佢哋就會一直係你嘅城市騷擾你，會扣好多治安值，仲要損兵扣錢同糧架！
▲呢一集多咗會有異民族打你，對住呢啲外族自然係早打早著啦！
加入育成元素‧可發掘培育武將！
另外，《三國志 12 加強版》仲加入咗育成元素，不定時會有人同你講係邊度邊度會有人才發掘，大家就要去自己搵出呢啲人才，然後再透過唔同嘅培訓、甚至出外遊歷去提升佢哋嘅能力，從而作為自己一員大將！唔好睇少呢啲人呀，尤其是如果大家玩新君主，手下人才無董卓、曹操、袁紹個啲咁多，呢種係增加手下嘅最有效方法！最重要係：佢哋多數都會對你忠心耿耿架！
▲去唔同地方，都可以遇到唔同能力或潛質，或許可以成才嘅人才。
▲搵咗佢地番來，就要透過唔同訓練，或者出外遊歷去提升佢哋嘅能力。要記住，成為正式武將前，呢啲人才只有一次遊歷機會，要好好選擇合適地區去提升佢哋嘅能力，例如：軍師就應該派佢地去荊楚、武將就應該派去西北等。
▲培訓成功後，會有報告顯示武將提升能力嘅進度，如果揀啱訓練同埋地區，能力可以提升好多架！
總結：算變得「可玩」
舊年光榮出《三國志 12》，小編覺得成個 game play 真係好悶，玩咗半個月已經無心機再玩落去。今次出加強版，加入咗有趣嘅新劇本同埋育成元素，令成個遊戲好玩咗，都算提升咗小編玩嘅意慾（雖然仍然要忍受每個月無乜嘢好做嘅悶爆 game play）。小編希望可以盡快統一戰國天下啦，大家呢？有冇讀者都有玩？不如大家一齊分享下你哋用咩君主同埋對呢集加強版嘅感受呀！
