話說已經係數碼世紀既今日，相信都已經無乜人帶紙筆文具跟身架啦，要隨身搵把間尺就更加無乜可能。咁岩就來聖誕節，諗住做 D 小手工送俾身邊既另一半，但係拿起手要把間尺，大鑊！無！咁點畫線？遇著平時，就真係唯有落街文具舖或者超市買把間尺，但好彩最近試用緊部 Samsung GALAXY Note Edge，佢既曲面側熒幕只要開個小工具，手機就即時可以變間尺，得咗！究竟 Note Edge 隨了用來當間尺，仲有咩其他吸引功能？Edward 就試用左佢 7 日，以下同大家分享一下：
快啟 widget 打機都得
Note Edge 最特別既地方，就係佢既曲面側熒幕，有唔同的小工具，例如：間尺、碼錶、倒數器、手電筒開關及錄音機功能，唔洗開大芒，只需要用手指向上同下捽一下，就可以開得到，既實用又方便！除咗這些小工具，仲可以 download 專為這個側熒幕而設的遊戲，簡單 D 的有記憶遊戲（記住有邊 D 啤牌係相同的簡單 game），複雜少少又有漢堡世界（幫客人疊漢堡包快餐的 mini game），呢類遊戲用來攝時候真係一流。當然啦，如果複雜 D 的 game，就無可能透過窄窄的側熒幕玩啦。
▲唔洗開大芒都可以玩下簡單既 mini game，都幾過癮。
▲當然啦，支援側熒幕的遊戲，就只能透過 GALAXY Apps –> GALAXY 專用 –> Edge Specials 入面先可以 download 到啦，暫時見到就唔多啦，得記憶遊戲同埋漢堡世界玩。
▲開著個側熒幕，然後由左向右 slide 就可以見到呢 5 個小工具。
▲可以將手機當間尺用，又可以計時、錄音，仲可以有 shortcut 開著閃光燈當電筒用，好方便。
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
唔洗開芒睇 message
去到今年，唔少手機都已經踏進 2K 芒（QHD）的世代，包括今次呢部 Note Edge 都係其中一部。與以往的 1080p 芒相比，2K 芒手機點都會食電一點，但係對於需要即刻覆 message，驚客人或者女朋友見到 WhatsApp 雙剔又唔即覆的朋友，Note Edge 的曲面側熒幕就可以令大家唔洗開芒的情況下，都可以知道有咩 IM APP 有新 message，仲可以見到邊個send 俾你，見到有需要覆既先至開芒打字回覆對方，咁就自然可以幫部手機進一步慳電啦。
快開 APP 唔驚「迫爆」芒
除了用來快睇有咩 APP 有新 message 之外，個曲面側熒幕其實都可以取代桌面，擺放經常會用的程式，咁就唔洗驚在桌面放得太多 APP shortcut，一來搵的時候麻煩，二來放得太多又會好亂。而且唔止內置 APP 可以擺入去，就連 3rd party APP 都得。第日要開 Facebook 打卡，或者要開 game 打機，又或者要用 HKTV APP 睇電視，都可以直接在側熒幕度啟動，既方便又快捷。
▲可以將常用 APPS 既 shortcut 放入側熒幕，要開都方便好多。
▲可供放入的 APPS shortcut 連 3rd party apps 都支援，只要禁頂既星星按鍵就可以入到呢個編輯介面。
▲另外想睇愛隊公牛最近戰績又得，想睇番買左既股票既價位亦得，功能幾齊全。
▲另外亦有唔少功能，俾大家可以自己設計具個人特色既側熒幕介面添！
▲如果設置夜間時鐘，如果夜晚紮醒想睇番幾多點，唔洗開個大芒光掁掁，只要捽開個側熒幕，就睇到時間啦。
▲實際效果。
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
手感不及 Note 4‧左手用較好
至於手感方面，因為 Note Edge 除左側熒幕，其他規格及功能基本上同 Note 4 幾乎相同，所以難免唔少朋友會將佢來同 Note 4 比較，尤其是機不離手的用家（好似 Edward 就係一個活生生的例子），就更加著重手感。Note Edge 俾到 Edward 的感覺是：真係好大部！雖然熒幕仲要比 Note 4 的 5.7 吋芒細 0.1 吋（5.6 吋），但係它的曲面側熒幕，就令機身橫向加左唔少空間，如果 Note 4 都仲勉強可以單手掌握同埋操控，Note Edge 就最多只能單手掌握，單手操控就算好似 Edward 男仔手比較大都做唔到。
▲Note Edge 無論左手定右手拿，Edward 都覺得有 D 偏大部既感覺，單手操控有 D 難度。
▲至於 Note 4，就感覺舒服好多。
另外，因為 Note Edge 的曲面側熒幕位於熒幕右方，所以在使用 Note Edge 時，就只能左手用機，因為如果用右手，就好容易掂到個側熒幕，所以有心轉會用 Note Edge 的朋友，可能要先訓練下左手的指力同埋腕力啦（笑~~）。
影相可盡用全熒幕
當然，側熒幕亦唔係用來打機、睇 messages 咁簡單，有 D APP 好似內置的影相功能，當啟動後，以往在其他 Samsung GALAXY 手機，就要佔據主熒幕空間擺放影相快門鍵、目錄鍵或其他快速功能鍵，但在 Note Edge 上，這些按鍵統統放到側熒幕的位置，主熒幕就只剩下瀏覽相片的 shortcut，咁就可以盡用全熒幕做 viewfinder，影張相出來個角度都準 D 靚 D 啦。不過有呢種設計的手機，Note Edge 始終係第一部，用起上來真係要點時間習慣，如果大家真係唔習慣個快門鍵放係側熒幕，在相機功能內禁音量下調鍵，一樣可以影到相。
用足一日都仲有電剩
除了手感同埋側熒幕，相信都有讀者關心究竟 Note Edge 粒電究竟襟唔襟用，因為佢只係配備左 3,000mAh 電池，比 Note 4 的 3,220mAh 仲要少 220mAh，而且仲支援 4G，又擁有 QHD 2K 芒，如果用來睇 HKTV 直播，又或者打機，容不易半日就無哂電？
其實大家都唔洗太擔心，Edward 都算係半個 HKTV 粉，每日就算係 unwire office 都會追住佢地既直播來睇，又會玩下好似 Clash of Clans 呢類都幾曬電既 online game，亦會玩下近期大熱但係又好食電的 Civization Revolution 2。做齊呢幾樣野，加埋一般使用，例如：Facebook、LINE、影相、打電話、上 forum 睇網頁等正常用途，由朝早 10 點左右拔走充電器返工，到凌晨 12 點半左右就來訓覺先再差電，都仲有大約 37% 電剩低，可以見到用左 Qualcomm Snapdragon 805 處理器的 Note Edge 粒電真係好襟用。如果你自問用量比 Edward 仲要低，相信大家可以用既時間肯定會更加長。
加上 Note Edge 採用可換電設計，如果買多粒後備電，用一粒差一粒，基本上係使用時間 no limit，而且佢同 Note 4 一樣設有快速充電功能，如果用原廠充電器，半個鐘已經可以差到 50% 電，咁大家就唔洗擔心唔夠電用啦。
▲Note Edge（左）同 Note 4（右）一樣可以換電。
▲Note Edge 同樣支援快速充電功能，半個鐘可以充到 50% 電，咁樣就算幾大用量都唔驚啦。不過要記住，要用原廠充電器同充電池，先可以用到快速充電功能架！
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
使用暢順無投訴
由於 Note Edge 其他功能同 Note 4 其實分別不大，所以最後就俾 Edward 講講整體用落的感受啦。過往 Edward 曾經有一段時間長用 Samsung 手機，但後來就轉投其他陣營，最主要原因係預載的 APPS（尤其是 Note 系列）太多，就算手機有再多 RAM 都唔夠用（試想像 2GB RAM 但開機後只剩下不足 1GB 可以用，真係可以用到火滾！！）。但今次呢部 Note Edge，有 3GB RAM 之餘，開機後仲有接近 1.9GB RAM 俾大家用，基本上無論用咩 APP，就算同時係背景開左 game、LINE、Facebook、MPlayer（睇片 APP）等 6、7 個 APPS，部機都仍然運作得好暢順，無任何唔夠 RAM 帶來既窒窒下或者彈 APP 的情況，呢一方面，小編覺得係近年 Samsung 改善了的地方。
▲開機後都仲有接近 1.9GB RAM 用，對於 Edward 呢種「花心男」，成日開 6、7 個 APPS 在 background 既人來講都唔覺窒。
至於影相方面，Edward 覺得還算唔錯，雖然像素未及得 Sony Xperia Z 系手機咁高，但 1,600 萬像素其實都好夠大家用，而且無論日頭夜晚影相，相片質素都算唔錯，而對於女仔來講，佢既後置相機自拍功能，只要揀左佢然後將主鏡頭對住自己，佢就會識得辨識臉孔而自動啟動自拍功能，真係好方便之餘，又唔洗局用像素低好多的前置鏡頭來自拍，算係幾體貼。以下就俾 D 試相俾大家睇下啦：
試相區
至於熒幕來講，以 Super AMOLED 材質來講，Note Edge 同 Note 4 質素都差唔多，色彩都算準確，就算白色都可以真實呈現到出來，其他顏色亦無以前咁「味精」，在熒幕色彩調較上感覺好左好多。
▲熒幕同 Note 4 屬同級質素，感覺都真係幾唔錯。
▲可視角度都好高，側面睇都唔覺變左色或者出現反光情況。
Edward：俾多千二蚊買條邊……
總結來講，Samsung GALAXY Note Edge 其實係一部幾唔錯既手機，功能全面熒幕色準相機唔錯之餘，個曲面側熒幕其實既實用又好玩。不過對於唔習慣左手用電話，或者手掌唔係好似小編 咁大既話，用起來會感覺辛苦 D。而另一缺點，不在手機功能設計，而在於售價，高達 $7,498 的定價嘛……比一部 MBA 仲要貴呀！買部手機要咁貴，其實除非上台出機，否則真係唔係好捨得……或許視乎大家覺得值唔值得為左條曲面側熒幕，而俾多 $1,200 蚊去買佢啦（Note 4 官方定價為 $6,298）。
Samsung GALAXY Note Edge 規格簡介：
- 處理器：Qualcomm Snapdragon 805 2.7GHz 四核心
- 記憶體：3GB RAM
- 儲存空間：32GB（支援最高 128GB microSD 記憶卡擴充儲存空間）
- 熒幕：5.6 吋 QHD 2,560 x 1,440 + 160 Super AMOLED 特大曲面熒幕
- 鏡頭：1,600 萬像素 OIS 及支援 4K 拍攝（主鏡頭）+ 370 萬像素 F/1.9（前置）
- 電池：3,000mAh（可替換）
- 作業系統：Android 4.4 KitKat
售價：$7,498
查詢：Samsung（3698 4698）
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 【評測】Samsung Galaxy Buds / Buds3 Pro 開箱評測 外形具時尚感 + 佩戴感舒適 + 音質表現理想 + 夠「長氣」可三日一充
分享到 :
最新影片
