係一間同科技息息相關的公司做野，少不免要學返啲科技知識，除左上次講過的串流之外，今次想同大家講下「定位」。
「車～定位之嘛，咪 GPS 囉，唔係又講 Google Map 呀 ?!」
我未入黎做個陣都係咁諗，GPS 定位好多年啦，有咩出奇。原來 GPS 有一定限制，做導航或者於室外定位是 OK 的，十分準；如果於室內定位，就兩回事，就當係商場入面，首先 Google Map 係唔會劃分舖位，而且 GPS 入到室內誤差可能係幾個舖位的距離，唔夠準確就帶唔到你去想去的地方啦。
恕我才疏學淺，恍然大悟之後，於是就想知有咩辦法可以解決呢個問題或者彌補 GPS 的不足，問下同事同埋聽聽埋埋啲行家講，佢地話而家做室內定位主要有3個較精準的技術：1) Wi-Fi; 2) 超聲波; 3) iBeacon (即係藍牙啲Friend)。
定位的原理其實唔難 (?!)，就係接收訊號再計算位置，上列 3 個技術只不過係運用唔同 signals 計算：Wi-Fi 係電波，超聲波係音頻，iBeacon 就係藍牙，點計就唔好問我啦 。(編按: 要在相應位置裝 iBeacon 收發器) Wi-Fi 就一街都係啦，平時無聊係條街度都 detect 到好多訊號，而且當你熄左 Wi-Fi 開 Google Map 或任何用到位置的 Apps，電話仲會自動 prompt 你開 Wi-Fi「以提高定位準確度」，所以基本上開 Wi-Fi 就已經夠平時搵路用。但如果係啲博物館或者商場入面，以逐件展品或逐間舖頭計的距離黎講，超聲波同 iBeacon 就做得更好嘞。
數碼港有個 Centre 都有用到超聲波室內定位技術，只要裝左隻 APP 就用到。我下載隻 App 走去試下用，其實都幾神奇，因為個 Centre 唔係好大，但佢真係行一步就會郁左，唔同區又有唔同information。其實數碼港咁大，路痴如我就好需要呢啲小工具幫我搵路，唔知佢會唔會考慮成個數碼港都裝室內定位，行到去 DBC 就話，「呢度係 DBC 數碼電台，同 D100 係唔同架，
^食飯時經過入去望兩眼都 OK ^我諗冇乜幾多人知有呢間野的存在
除左上面兩度，我發覺香港啲博物館都愈來愈先進，最近睇兩個專題展覽都有特登整隻導賞 App 俾參觀人士，仲要俾我發現係用 iBeacon（因為佢叫我開藍芽 XD）。其實真係勁好，首先唔使俾錢租導賞器，慳錢又慳左好多排隊時間；另外，一路行會自動 detect 位置同展品，唔使撳黎撳去，可以集中啲睇；最緊要係輕啲又衛生啲，唔使揹住舊野又要個個摸過，有時又要擺上隻耳仔度，污糟邋遢咁…有時未必咁好彩撞到正有真人導賞，有隻 App 就非常自助形式，鍾意聽就聽，唔鍾意就飛。唯一唔好處就係散修修，呢度一隻 App 個度一隻 App，有啲用完即棄的感覺，Down 埋 down 埋成個電話好多野好亂咁…
適逢就黎放新年假，大家可以去親身體驗下定位技術：開 Google Map 用 GPS/ Data/ Wi-Fi 扮唔識路等佢帶你去博物館，入博物館用佢隻 App 帶你參觀展覽。好似都幾好玩，哈哈！
先生小姐埋嚟介紹返：
數碼港移動體驗中心
展城館 City Gallery
香港歷史博物館：俄羅斯宮廷文物展
香港文化博物館：敦煌 ― 說不完的故事
