其實我腦中一直有疑問，我我深信好多人都有：Hacker（黑客／駭客）究竟係好人定壞人？係咪可以用忠同奸黎分辨佢地呢？佢地其實做啲乜？
點解我會有呢啲問題？因為係我印象入面，Hacker 的形象都係負面（本身黑／駭呢兩個字就睇落好奸啦…），佢地咪就係會「入侵」人地個電腦／網絡／數據庫…盜取資料或者破壞系統等等（可能係睇太多電影，哈哈）。但後來返工，有人同我講 Hacker 唔一定係衰架喎，佢地可以好有建設性架，因為 hacker 有分好多種：有黑帽白帽灰帽紅帽藍帽綠帽仲有樣叫 Growth Hacker… 嘩，聽到我頭都大埋。
仲有樣野令我更加一頭霧水：Hackathon。Marathon 就係人都知係跑步個啲馬拉松啦，我第一次聽「Hackathon」呢個字，我以為係長時間不停輪流入侵人地個系統，鬥快攞人地啲資料的比賽，結果俾人笑到傻左，話我對於「Hacking」的 Concept 錯晒…哈哈哈，so sorry!
於是我返屋企嘗試揭開 Hacker 的面紗，我有兩個好朋友，佢地好叻，亦都好樂意解答我的白痴問題，佢地就係維基同谷哥（哈哈，好爛）。
維基話：
駭客通常是指對電腦科學、編程和設計方面具高度理解的人。
在資訊保安裡，「黑客」指研究智取電腦保安系統的人員。利用公共通訊網路，如網際網路和電話系統，在未經許可的情況下，載入對方系統的被稱為黑帽駭客；偵錯和分析電腦保安系統的是白帽駭客。
「駭客」一詞最早用來稱呼研究盜用電話系統的人士。
在業餘電腦方面，「駭客」指研究修改電腦產品的業餘愛好者。
「駭客」是「一種熱衷於研究系統和計算機（特別是網路）內部運作的人」。
谷哥好鬼長氣，佢俾左勁多資料我，叫我自己揀黎睇。我消化完之後，一句講晒：Hacker 就係可忠可奸，睇佢地如何利用自己的知識。正所謂「水能載舟，亦能覆舟」，Hackers 本身就非常熟悉電腦系統的操作，佢地可以選擇提升／改良系統保安，精益求精；又或者好似我之前理解咁，盜取人地的資訊，作奸犯科。
而至於 Hackathon，我冇諗錯嘅係呢個字等於 Hack+Marathon，亦都係長時間進行 Hacking 活動。但 Hacking 係呢度的意思，係在活動當中，電腦程式設計師以及相關開發人員相聚在一起，以緊密合作的形式去做 Project，包括揼 Code，寫 Programme 等等。
維基話：
精髓在於很多人，在一段特定的時間內，相聚在一起，以他們想要的方式，去做他們想做的事情——整個程式設計的過程幾乎沒有任何限制或者方向。
即係你腦入面有個 Idea，但基於好多原因，例如公務繁重，夾唔到時間等等，你平時做唔到。而 Hackathon 就俾個機會你，將你腦入面的 idea 於密集的時間表內與拍檔實現出來。
開頭 Hackathon 真係針對電腦應用程式相關的 project 同項目，我見而家演變到有啲 hackathon 入面的 Project 同電腦冇乜關係，鼓勵大家用任個方法將你腦入面的「屎橋」變成入得廚房，出得廳堂的「產品」，旨在激發思維同創意，有時都幾有趣。
我而家搞清楚 Hacker 同 Hackathon 啦！唔好再笑我 😛
有錯有補充可唔可以留個言話我知，等我唔好成日好似個傻仔咁，哈哈哈！
黑客針對遊戲玩家 免費作弊工具暗藏勒索程式 FB、IG、Threads 全球大死機 三個黑客組織認頭負責網絡攻擊
