是咁的。話說小編 最近公司部某某牌 Notebook 壞咗，部機仲有保養，但拎去整一整都成個星期冇得用。正當諗住用返自己部 10 吋 Yoga Tablet ，我就發現 Intel 最新 Compute Stick 終於到港，既然都冇機用就梗係借來試用返一個禮拜喇！以下有更多資料：
Desktop 點先叫細部？我諗一般人都會好快咁答 Mac Mini，雖然體積比佢更細都「大有機在」，但設計仍然離唔開一個外置盒（主機）。不過，想唔到 Intel 這款 Compute Stick 設計已經細到一支 Chomecast 手指咁，雖然體積都頗大，佢用法同 Chromecast 一樣駁落電視或顯示器的 HDMI (須駁 USB 電源) 就用得！
▲ 只要把 Compute Stick 直接駁到電視 / 顯示器上 HDMI 再須駁 USB 電源就可「著機」。
近期見到超薄 Tablet 及 Notebook 都冇乜擴充可言，但大家毋須擔心因為 Compute Stick 都有 1 個 USB 頭 (大頭) 及 MicroSD 讀卡器，機內亦備有 WiFi n 及藍牙 v4.0，最簡單 USB 接駁無線鍵盤滑鼠就用得！
▲機內儲存空間唔多，但可透過 MicroSD 增加儲存空間。
▲ 提供 1 組標準 USB 接口，可接駁無線鍵盤滑鼠套裝。而旁邊 Micro USB 屬電源輸入。
▲ 可以串手機繩。
台積電 2 納米晶片尚未量產 Apple 與 Intel 已搶先預訂 傳 Samsung 跟隨台積電做法 停止向中國供應 7nm 以下製程 AI 晶片 Intel Core Ultra 200 效能災難性欠佳 官方預計年尾前推更新改善問題
▲ 配件有 HDMI 延長線、USB 火牛及 USB 線。
Compute Stick 手指咁細，其實裡面都用了當代 Tablet 規格，包括 Intel Atom Z3735F 處理器、2GB RAM 及 32GB 儲存空間，配置跟 T100TA 或 Yoga Tablet 差唔多，單純上網及文書處理性能已很足夠，而小編 亦嘗試播 Youtube 1080p 串流短片都很順暢 （夠睇波..）。功耗方面，隨機跟來的 USB 火牛屬 5V / 2A 規格，但 Compute Stick 閒置時只有 5.2V / 0.4A；負載時最高約 5.15V / 1.5A，換言之「尿袋」其實都應付到。
▲ 搭載 Intel Atom Z3735F 及 2GB RAM。
▲ 內建 32GB 儲存空間，實際可用大約有 19GB。
▲ 在 Youtube 睇 1080p 串流影片過程都很順暢。
▲ 程式集全部都係 Windows 原裝軟體，非常「乾淨」。（不包含 Office 365）
▲ 用原裝 USB 火牛可以量度到 Compute Stick 閒置時只有 5.1V / 0.3-0.5A。
▲用電視 USB 都可以對動 Compute Stick，雖度唔到輸出值，但見到電壓僅 4.86V，若然負載可能會唔穩定。
▲ 如果你接駁藍牙滑鼠鍵盤，剩返個 USB 可否接駁外置硬碟 (2.5 吋)？答案係「可以」，但穩定性一般，因此唔太建議。
對一般人來講 Compute Stick 可能都係一部「長插」顯示器 / 電視的 Mini PC，但小編 就覺得佢更有潛質做「終極輕！出 Trip 方案 」（流動 Desktop）。原因係酒店多數都會有電視，只要把它接駁電視你就有 30 吋或大屏幕工作（唔做野睇下 Youtube 都方便），就算旅行你都可以將相片及影片抄到 MicroSD 內，用途同你帶部 Notebook 相同。第二點係重量，這支 Compute Stick 僅重 54g，即使你自攜鍵盤滑鼠夾埋都係 400g 左右，重量比一般 10 吋 Tablet + 鍵盤都輕，而且電源僅須 USB，就算冇帶當地「轉插」都可駁「尿袋」用住先。
這個時候有人會提出「冇電視 / 電視冇 HDMI 咁點？」最後，小編 就諗到呢個「終極輕！出 Trip 方案 究極版！」，當然我唔會叫你帶個顯示器出 Trip，但要知道世上仲有「流動 Projector」，只要把它跟 Compute Stick 組合起來，就算冇電視冇顯示器你自己都可以投影到牆上繼續使用，當然解像度唔會好高，但去到咁極端環境，冇電視冇電你仍可靠「尿袋」維持運作，而多了「流動 Projector」負重會額外增加 300g，但總數仍低於 700g，重量才跟 Surface 3 差唔多。
▲ 冇電視點算？帶埋「流動 Projector」投影到牆上，再加埋「尿袋」供電，莫講話冇電視、冇電都夠捱一陣。
▲ 帶埋「流動 Projector」重量會增至 614g，重量才跟 Surface 3 差唔多。（可選擇更輕鍵盤滑鼠，甚至用手機 (裝 App) 當鍵盤滑鼠）
Intel Compute Stick 係小編 目前見過最細 Mini PC，毋須外置盒（主機）設計佔用最少空間，當然在必須顯示器的前提，大家會拎佢同「AIO PC」比較，性能雖弱，但好處係任何尺寸或款式顯示器 / 電視只要有 HDMI 就用得（有錢 80 吋曲面電視都得！） 。至於性能，日常應用不過不失，重點係定價 $1,499 已包括 Windows 8.1 with Bing，雖然價錢會比其他 Mini PC 貴少少，但除了慳位，用作「流動 Desktop」才是 Compute Stick 最厲害之處。
售價：$1,499
查詢：聯強國際（2753 1668）
台積電 2 納米晶片尚未量產 Apple 與 Intel 已搶先預訂 傳 Samsung 跟隨台積電做法 停止向中國供應 7nm 以下製程 AI 晶片 Intel Core Ultra 200 效能災難性欠佳 官方預計年尾前推更新改善問題
