睇少幾場戲唔換手機唔去日本，是否就上車有望，你同我心知肚明。贏在起跑線的意思，其實係投胎投得好，成功需父幹大概如是。無論你唔玩唔食零娛樂依舊無法上車，其中一個原因，專業知識和技術不再被尊重。
早陣子勞工處的 IT 人招聘廣告、保險公司幾百蚊的上太空短片都是活生生血淋淋例子，別說這是個別案例，我可以肯肯定類似剝削每日都發生。昨日健吾的 Facebook 有一則更新內容是這樣的：「聽到隔離枱一對做 Marketing 夫婦『我襟到有個人，免費幫我做 FB Strategy，你話而家 D 細路，幾 X 傻仔』」以剝削他人上位，以讓人無啖好食為樂，試問努力肯搏肯捱唔怕蝕底真係有用嗎？
Designer 做設計好容易美圖秀秀都得啦！你寫稿咁簡單打幾隻字之嘛！這等難聽過粗口的對白幾乎日日都聽到。還記得有個因老闆恐懼錯判而摺埋的網站曾經四出邀稿，編輯無錢俾之餘，還大條道理說俾個地方你寫嘢喎（同飲東江水要感恩異曲同工）。最近又親身經歷有旅遊網站找翻譯，提供薪酬只得市價十分一，微薄到不足以買一套老麥 Nanoblock。曾經被剝削的人現在成了老闆，將剝削技倆十倍奉還到下一代，專業和技術不被尊重，無形的奴隸制度就此成型。
這些人下次去澳牛食炒蛋多士，不妨同伙記講句炒隻蛋焊塊多士咁 Easy，不如收五蚊算數啦！