薄機賣平向來都唔睇好！不過 Alactel 最近推出一款 Onetouch Idol 3 就以「薄機」為題，性能唔差之外，佢仲內置 Clari-Fi 技術及跟埋 JBL 耳機，想知實際使用感覺如何就要留意喇！
機身好薄 前置喇叭夠大聲
Onetouch Idol 3 算係少數 5.5 吋「薄機」，雖然數字上都厚 7.4mm，「薄機」來講唔算好薄，但拎起會發現已經薄過好多 5.5 吋手機。設計方面，機身比較圓身，外殼全數膠製，但感覺都算紮實，而且都幾輕。薄機冇得插卡換電係預料中事，除了配備 Dual SIM（4G+2G），佢吸引地方仲包括前置立體聲喇叭，唔帶耳機睇片已經有唔錯效果，音量亦很充足。
▲ 5.5 吋屏幕加上薄身設計，單手操作毫無難度，但手感舒適就一般。
▲ 以 5.5 吋屏幕及內建 2,940mAh 電池來說，Idol 3 機身都算幾薄，
▲ 機旁僅設可容納 2 張 Micro SIM 的卡槽。
▲ 前置喇叭效果肯定唔及 BoomSound，但最起碼佢都有立體聲及夠大聲。
冇插卡 但內置 32GB 容量
今年好多薄機設計都放棄 MicroSD 設計，雖然 Idol 3 都唔例外，但佢比人聰明係內置 32GB 儲存空間（小米4i），基本上裝 Game、聽歌、睇片都夠用。其次，機內搭載 Qualcomm Snapdragon 615 八核處理器及 2GB RAM，於 Antutu 成績都有約 33,000 分，性能都不過不失。此外，機內預載了 Android 5.0 及很似 Google 的原裝介面，操作都順暢。不過，我最唔鍾意係機內預載一堆遊戲（9 成唔會玩），大家要花點時間逐款 Uninstall，但其他都大致滿意。
▲ 預載 64bit Qualcomm Snapdragon 615 八核處理器及 2GB RAM，於 Antutu 成績大約有 34,000 分。
▲ 2GB RAM 閒置時大約有 1.2GB Free RAM。
▲ 內建 32GB 儲存空間，實際可用大約有 25.5GB 左右。
▲ Idol 3（左）屏幕跟 LG G4 （右）顏色會比較偏黃，而且幅度都唔少（比 S6 Edge 還黃），但唯一好處係畫面夠光。
▲ 預載 Android 5.0 及自家簡潔介面，但問題係預載太多無謂遊戲。
▲ Idol 3 另一個有趣賣點係倒轉部機都可照常通話。
▲相機介面選項唔算好多，但依然提供手動模式，還可調整 ISO 及快門速度（只可惜最慢得 0.5 秒）。
▲ 相片質素唔算非常突出，尤其夜間拍攝「油畫」都頗明顯，其次對焦反應亦只是普通，而按實屏幕即等同一按拍攝。（可按下收看原圖）
支援 24bit / 192KHz！跟機 JBL 耳機感覺普通
Idol 3 仲有一個容易被忽略嘅賣點就係 Hi-Fi Audio，能播放 24bit / 192KHz 音效檔，而且還有 Harman Kardon 嘅 Clari-Fi 音效優化加持，音效規格唔差得過貴價機。不過，小編 用佢跟來的 JBL 耳機試聽，結果係開 Clari-Fi 令 Bass 太重，因為耳機屬動圈結構，唔開 Clari-Fi 重低音都頗強，至於音質，我覺得偏重人聲及低音，感覺比一般「原廠耳機」好少少。
▲ 跟機會有 JBL 入門級的 In-Ear 耳機，支持單鍵線控。
▲ 音效選項內有 JBL (Clari-Fi) 的強化功能。
▲ 內建播放器還支援 DJ 打碟玩意，都幾有趣。
小編 ：薄機玩內涵 有驚喜！
起初見到 Onetouch idol 3 以為佢只係一部平價「薄機」，但試落才知道佢都有唔少驚喜，例如 1080p 屏幕、內建 32GB 儲存空間及 Hi-Fi Audio 等等，售價 $1,999 或許規格未不及 Zenfone 2，但我認為佢唔輸蝕太多比「小米 4i」 ，總括來說這部機都算有驚喜。
售價：$1,999
查詢：ALCATEL（3180 2777）
