荔園重開之後好多人都係度想當年，原來日本都有好多網民鍾意想當年。近日日本就有人發佈了一個《互聯網老人大會》既比賽，只要大家係 Twitter 放一些 2000年係電腦世界的事物，再加上 #インターネット老人会 就可以參加。小編就揀左其中 10個俾大家睇下，唔知你又記得幾多個呢？
自從光學滑鼠既出現，滑鼠墊好似變得可有可無。唔知大家仲記唔記得以前既滑鼠後面有粒波，一定要有滑鼠墊先行得順，而已上堂既時候總會有一兩個同學鍾意拆粒波出嚟玩呢？
記得以前既機箱大多都係白色，而且好易變黃。一個機箱唔單止有磁碟機，後來又有 CD機、DVD機、藍光碟機，愈來愈多。但現在既電腦莫講話磁碟機，就連 USB頭都就嚟消失了。
想當年既螢幕大多都係白色大大舊，七彩 iMac 既出突然令電腦變得唔再死板呢！
以後既 CRT 螢幕停留係一個畫面太耐就會有殘影，所以就需要螢幕保護程式。小時候就係鍾意開住螢幕保護程式不停睇，奇怪既係，果陣又唔會覺得暈。
唔知點解，明明已經好耐無用 ICQ，但個 ICQ no. 到現在都可以背得清清楚楚。不經不覺，原來由 ICQ 到 MSN 再到現在既 Whatsapp 已經過左十幾年了。
雖然 Windows Me 既評價很差，不過大家都應該會記得可愛既 Windows Me娘，睇睇下又有幾分似初音。
記得以前開電腦既速度非常慢，好唔容易等到 Windows 98 既開機畫面出現，轉個頭又變左藍畫面。總之就係要搞好耐先開到機，熄左機就唔會想即刻開番。
現在一開部電腦就已經連左線上到網，記得 56K既年代，一上網就打唔到電話，成日俾屋企人話呢！
有時上唔到網玩小朋友齊打交同夢遊先生，唯有玩下內置既彈珠台。有聲有畫，已經夠玩一個下午架啦！
接龍同踩地雷同樣係以前消磨時間既好玩意，據說有唔少打工仔就係因為番工玩接龍俾老闆發現，結果…
資料來源：twitter
