之前就同大家分享過 iOS 9 Public Beta 1 點樣安裝，大家係咪好想知道入面有咩新功能，然後再決定係咪參加「白老鼠計劃」試用呢？而家 Edward 就身先士卒，係 iPhone 5c 及 iPad Air 2 上面安裝咗，即時為大家分享有咩新功能啦！
比 iOS 9 developer beta 功能更多•系統更穩定
其實連同今次 iOS 9 Public Beta 1，Apple 自 6 月初 WWDC 起，之前已經推出咗兩個 Developer Beta（或者叫做 Closed Beta，下簡稱 CB），去到昨日就推出了第三個 CB，代號為 13A4293g；而事隔一日，就推出了這個 PB1（Public Beta 1），小編係 iPhone 同 iPad 上一睇，代號同樣為 13A4293g，證實 CB3 與 PB1 是同一個 ROM，所以如果程式開發員昨日已安裝了 CB3，實在無必要再安裝 PB1。
至於使用體驗方面，Edward 之前試過 CB1，發現有不少 bug，例如：會自動重啟、iPhone 會無故突然失去手機訊號，但重新啟動後又回復正常、iCloud 未能備份、在電郵 APP 中使用會好窒等。
而在 PB1 中，發現有不少之前發現的 bug 已經回復正常，最少突然失去手機訊號的情況在安裝了數小時內不再出現，電郵 APP 順暢度亦回復正常，iCloud 亦終於能成功備份，算是頗完整的 OS 了。不過係 PB1 上，仍試過一次 iPad 無故重啟，部分在 CB1 已出現問題的 APP，在 PB1 上仍然出事，例如：LINE 只能開啟鍵盤而不能開啟貼圖介面，而且開啟時鍵盤會歪向一邊，而小編一直有玩的 SD 鋼彈 Battle Station 亦仍然不能玩。
不過這些未必關 Apple 事，應該係相關 APP / Game 未支援 iOS 9 所致。相信隨著 iOS 9 PB1 推出兩、三星期後，各 APP 應該會推出更新支援 iOS 9，屆時相關問題應該會消失。至於 iOS 9 PB1 的功能，其實大部分在 CB1 中已經出現，如果大家想了解多點，可以點按此瀏覽我們之前寫的速測文。
相關文章:
【教學】iPhone 一鍵即開中國支付 App 主要功能 鎖機畫面直接開付款碼、掃一掃、乘車碼 【教學+實測】iPhone 自訂電量切換低耗電模式 實測慳電程度 + 效能影響 【教學】iPad / iPhone 運行 Windows XP 實試 PC 模擬器玩《小朋友齊打交 2》
9 大新功能速測
今次的 iOS 9 PB1，除了早前的功能外，亦加入了 9 大新功能，當中最矚目的自然係 News 新聞 APP。以下就讓 Edward 為大家逐個功能試清楚啦！
1. News
WWDC 中，Apple 已宣佈會推出類似 Flipboard 的新聞瀏覽程式 News，而且它並非像 Flipboard 般只係介面比較靚的 RSS News 閱讀程式咁簡單，而係會與不同傳媒機構合作，擷取他們的重點文章然後重新整理，變身成為 easy-reading 的電子新聞。不過大家要記住：News 程式暫時只是 US-only，所以如果大家揀香港地區及中文介面，News 程式係會被隱藏起來。不過只要大家將地區轉換為 United States，然後語言轉為 English，就可以使用啦。以下就等 Edward 同大家介紹下呢個 News 程式啦。
▲首先 load 一輪之後大家就會見到呢個介面，但可以見到仍然有 bug，文字尾段與相片是重疊在一起的。
▲之後大家就可以揀最少 3 個最有興趣追睇的頻道。完成後點按「Continue」。
▲另外大家可以訂閱「Get News in Your Inbox」，當有重點新聞時，就會傳送內容去指定電郵，大家就一定唔會 miss 了。
▲進入 News 主介面後，大家第一眼見到的就係 For You 欄目，這裡會按時序顯示喜歡了的頻道的所有最新新聞。
▲按進入可以瀏覽內容，可見頁面會自動縮放至符合熒幕闊度，大家只需要向上或下捲動就可以睇完整篇新聞，不過要留意，每段新聞只有大相，其餘只係文字，類似 RSS-feed 新聞咁。而點按心心圖示可 like 相關新聞。
▲如果想睇埋相、片，可以拉到最底，就可以見到 Read Original Story，再向下拉就可以進入主站網頁，瀏覽本身的頁面了。
▲如果按下方中央按鍵，可以透過不同平台分享新聞，又或者在 Safari 瀏覽器開啟。
▲而點按右下角按鍵，就可以將新聞 bookmark，之後在 Saved 欄目中就可以搵得番。
▲去到第二個欄目 Favourites，就會顯示之前在設定時揀選咗的最喜歡頻道的總覽，大家可點按入不同頻道，瀏覽該頻道的新聞。不過最值得留意，應係左上角的 Apple News Selections！
▲呢個就係 Apple 之前係 WWDC 提及，會與不同傳媒機構合作，將他們的新聞重製，並加入圖片、影片等。
▲進入 Apple News Selections 的新聞後，就可以見到與之前在 For You 介面入面見到的新聞，排版完全不同，完全唔係 RSS News，而係真係似份電子報紙 / 雜誌。
▲報導有相亦可以向左右捲動瀏覽。
▲點按相片可以睇全相，亦可以放大縮小瀏覽相片細節部份。點按黑色位置亦可以睇到相片 captions。
▲至於 Explore 介面，就會展示所有 Apple 建議大家訂閱的頻道或主題。
▲而係 Search 中，大家可以瀏覽到唔同的頻道，點按「+」號就可以加入至 Favourites。
▲不過由於 News APP 仍然係 US-only，所以亞洲區的媒體暫時唔覺有，Edward 試過搜尋 Unwire，都無發現。所以大家要睇 Unwire，都係用番 Safari 睇，又或者用 Flipboard 訂閱啦！
▲Saved 就可以睇到之前 bookmark 咗的新聞，而 Saved 中的 History 就可以睇番之前睇過咩新聞，而且可從 iCloud 擷取紀錄，即係話：係 iPhone 上睇過的新聞，想係 iPad 度繼續睇，唔一定要 bookmark，係呢度一樣搵得番。
2. 全新 Two-Factor 認證介面
PB1 亦加入了全新的二步認證介面，當中包含了兩個部分：二步認證及二步身份認證。先說前者二步認證（Two-Factor Verification），相信大家還記得之前的 iOS，如果大家要在新裝置上使用早已設定好的「iCloud 鑰匙圈」，就需要從已登入 Apple ID 的 Apple 裝置中輸入 Apple ID 的密碼，才可以成功。不過此方法據知會令部分 Apple 用家遺失了自己的 Apple ID（雖然未明原因），所以在 iOS 9 PB1 中就加入了這款新的二步認證介面，功能上與之前的無分別，不過除了之前的「以其他 Apple 裝置認證」的辦法外，還可以用「安全碼」進行認證，方法就類似 Google 的二步認證般，輸入 iCloud 安全碼後，裝置會自動向預先設定好的電話號碼傳送一個 6 位數字的隨機生成認證碼，之後輸入此組密碼就可以了，對於並非同時使用 iPhone、iPad 或 Apple 電腦其中兩部裝置的用家來講，（尤其是像小編這種同時是 Android 手機及 iPad 平板的用家）真係方便好多。值得留意的是，如果你設定的電話號碼是本身 iPhone 使用的號碼，亦同樣可以做到二步認證，輸入 iCloud 鑰匙圈密碼後，就會收到 SMS，輸入 SMS 中的 6 位數字認證碼就可以了。
▲進入 iCloud 中的「鑰匙圈」，點按「開啟」。
▲之後會見到「使用安全碼進行許可」選項，點按它。
▲首先輸入預早設定好的 6 位 iCloud 安全碼。
▲然後系統會向預先設定的手機號碼傳送一個 6 位數字的驗證碼 SMS，收到後輸入它。
▲完成設定！
▲點按「進階」，大家可以隨時開關「使用安全碼進行許可」的方法或更改安全碼，亦可以更改用於驗證的電話號碼。
另外一部分就係二步身份認證（Two-Factor Authentication），呢種方法亦可以應用於在 App Store 或 iTunes Store 上購物時使用，購物時輸入密碼或進行指紋認證後，手機會收到一個 6 位數字認證碼，大家要在購物的 i-Device 上輸入此組密碼，才可以完成購物，變相進一步減低錯手買錯嘢的情況。不過在 PB1 中，Edward 似乎仍未看到二步身份認證這項功能，可能要等之後的版本才會出現。
3. iPad 終有 4 直行 APP 文件夾
第三個新功能只出現在 iPad，升級至 PB1 後，大家會發現 APP 文件夾由以前的 3 x 3 頁面，變為現在的 4 x 4 頁面，亦即係大家唔洗捲動文件夾頁面已經可以睇到更多 APP icon，雖然係微小的改變，但都好有用，尤其是習慣一個 folder 裝好多 APP 的用家。
4. 照片終於識分類！！
以前的 i-Devices，Edward 覺得最麻煩嘅地方，就係相片同埋 screenshots 撈埋係同一個 folder 入面，搵相個時真係好鬼麻煩。iOS 9 PB1 內的照片 APP，就終於識得將相片「分類」：喜好項目、全景、影片、慢動作、連拍等固然有，就連相片、自拍相（用前鏡拍攝的照片）及 screenshots 都分開唔同文件夾，呢個改變簡直係一流呀！
5. 全新 Music APP 介面
其實係 iOS 8.4 個時，Music APP 已經採用全新支援 Apple Music 的介面，不過之前的 CB1 同埋 CB2，就仲未更新，Music APP 介面仲係好粗糙。去到 PB1，就終於用番 iOS 8.4 的 Music APP 介面，順眼好多。不過頂頭大題仲係有 FUSE.NavBar.XXX 呢啲 coding 嘢，證明又係未執好就趕住推出街，唉……
6. 終於可以 4G 聽高質音樂！
之前係 iOS 8.4 試 Apple Music，要用 Wi-Fi 先可以聽到高音質的音樂，如果用 3G / 4G 網絡的話，音質會明顯下降，原因好簡單：慳 data。去到 iOS 9 PB1，就可以俾大家揀用 data 網絡時都可以享受高質音樂！當然，代價係會比以前用多咗 data，同埋 load 歌個時會慢啲。所以 Edward 建議如果大家嘅月費只有 6GB 或以下 data，就唔好開啦，因住未到月尾就爆 plan！
7. 搜尋顯示 Siri 支援 APPS
在 PB1 中，搜尋功能亦有加強，不過並非準繩度（其實本身都已經幾高），而係在頁面向下輕拉一下喚出搜尋頁面時，會見到空格下方出現 Siri APP 建議，展示可以用 Siri 的程式。大家亦可以當呢度係 APP shortcut，因為會展示出最近使用的 APP / games。
8. 全新 Siri 與聽寫圖示
大家在 PB1 中，只要進入「一般」–>「取用限制」，就會發現 Siri 與聽寫更換了全新圖示。另外，如果你設定地區為美國 ，亦可以在此菜單見到 News 的選項。
9. 一表睇盡邊隻 APP 最耗電
最後一項 PB1 新功能，就係電池設定入面，多咗一個時鐘 icon（如下圖右邊位置），只要點按它變反白，就會看到邊隻 APP 在過去最多 24 小時內最耗電，亦可以睇到在熒幕上及背景時的耗電情況。邊隻 APP 最耗電？唔洗 ghostbuster 都知啦！
暫時發現 bugs
介紹了 iOS 9 PB1 的 9 大功能，唔知大家有冇興趣升級試用呢？請等等，其實 Edward 試用咗半日，iOS 9 PB1 本身都似乎有兩大 bugs，大家睇埋先決定啦。
1. 不能以音量鍵拍照
一向所有 i-Devices 的音量鍵，都可以用來當做快門鍵影相，但係在 iOS 9 PB1 上，無論係 iPhone 定係 iPad，音量鍵都唔可以再拿來影相啦！係咪代表 Apple 以後會取消呢個功能？Edward 我就覺得唔會，只係 bug 來唧，估計下個版本應該會被解決掉。
2. 電池 icon 變方？
另一個 bug，Edward 認為係電池選項的 icon 上！大家有冇發現係設定入面，所有 icon 都係用 Apple 一貫的圓角風格 icon，唯獨電池一項是用方角 icon？明顯應該係 bug 啦？不過呢個 bug 只係影響視感唧，對使用體驗無乜影響嘅。
相關文章:
【教學】iPhone 一鍵即開中國支付 App 主要功能 鎖機畫面直接開付款碼、掃一掃、乘車碼 【教學+實測】iPhone 自訂電量切換低耗電模式 實測慳電程度 + 效能影響 【教學】iPad / iPhone 運行 Windows XP 實試 PC 模擬器玩《小朋友齊打交 2》
未來新版本點更新？
最後大家應該會問：如果第日有新 PB 版本，又應該點更新呢？唔通又要好似今次裝 PB1 咁咁麻煩？其實大家唔洗擔心，Apple 表示第日如果有新 PB 版本推出，大家只要點按「設定」–>「一般」–>「軟體更新」，就可以架啦，即係好似一般升級 iOS 的方法一樣！咁樣大家就唔洗擔心啦。
相關文章:
【教學】iPhone 一鍵即開中國支付 App 主要功能 鎖機畫面直接開付款碼、掃一掃、乘車碼 【教學+實測】iPhone 自訂電量切換低耗電模式 實測慳電程度 + 效能影響 【教學】iPad / iPhone 運行 Windows XP 實試 PC 模擬器玩《小朋友齊打交 2》
分享到 :
最新影片
