食親沙嗲王，你可能第一時間就會叫白咖喱豬扒飯。但由今日起，你可能就會變心啦。事關全線沙嗲王由 7月23日至 10月25日俾寵物小精靈佔據左，入面唔單止有 7款新菜式，仲有 6款小精靈精品添！我依莉詩今日就率先到銅鑼灣店品嚐一下代表水系小精靈既藍咖喱先！
▲ 每逢星期六日同公眾假期你隨時會係餐廳見左佢呢！記得帶定相機去捕捉野生比卡超啦！
今次小精靈主題餐廳既新菜式雖然唔多，只有 3款食物同 4款飲品，不過就樣樣都相當有小精靈既影子，而且落足料，一 D 都無偷工減料。特別係比卡超咖喱豬扒飯，黃甘甘既比卡超飯，配上 3種勁鮮艷既咖喱汁，真係睇得又食得！而最正既係只要點主題菜式或飲品，都會送上一個寵物球信封，入面可以係其中一款既小精靈 Memo紙或者杯墊。
▲ 雖然店內既佈置唔多，但單看每隻枱上既比卡超餐牌已經覺得超級 kawaii！
▲ 比卡超咖喱豬扒飯 $78
單睇比卡超造型既飯已經夠晒可愛，仲可以配上代表 3大屬性既炎系番茄咖喱、水系藍咖喱 同 草系菠菜咖喱，玩味十足！
講明豬扒飯又點可以無豬扒呢！切開比卡超個頭，就會見到入面有大大塊豬扒架啦！但望住佢又點捨得一刀切落去呢？講番 3種咖喱汁，小編覺得番茄咖喱汁，有少少酸比較開胃，菠菜咖喱汁就有淡淡菠菜味，感覺清新，而顏色最奇怪既藍色咖喱汁反而最好食，有 D 似白咖喱既味道。對於唔太食得辣既小編嚟講，3個辣度都可以接受。以 $78 嚟講，呢個份量、呢個味道，仲要係比卡超樣，簡直超值！
▲ 比卡超辣肉腸 Pizza $48
比起比卡超咖喱豬扒飯，呢個 Pizza 既外型可能輸蝕左少少，上面只有一塊薯片印有比卡超圖案，唔太突出。至於味道方面就係一個普通 Pizza，無太大驚喜。
▲ 雲尼拿雪糕千層搭 x 比卡超布甸 $58
▲ 火狐狸士多啤梨梳打配啫喱 、哈力馬龍奇異果梳打配啫喱、 呱呱泡蛙藍桔荔枝梳打配啫喱 HK$32，比卡超芒果冰沙 $38
紅綠藍三色係諗起既可能係同小火龍、車厘龜奇異種子，但呢 3杯代表既係依家個個星期日播緊既《寵物小精靈XY》入面既火狐狸、哈力馬龍同呱呱泡蛙。
▲ 紅色飲落有少少藥水味，而綠色比較甜，小編同樣覺得藍色最好飲，清新既荔枝味，加上一塊塊寒天，非常消暑解渴。
▲ 芒果冰沙上面既比卡超啫喱同閃電曲奇相當吸睛，加上上面厚厚既忌廉，相當飽肚。
▲ 只要點每款主題食品都有其中一款 memo 紙送呢！不過係邊款就要自己投啦！
▲ 點精靈飲品就有精靈送，不過都係要抽呢！
除左主題美食，每間店都會有一個細細既商品區。架上面有 6款全球獨家既限定寵物小精靈商品，有文件夾、行李牌、環保袋等，唔貴得嚟又非常實用。
▲ 商品區唔算大，但入面既精品就好得意。
▲ 小精靈匙扣/座枱 $49
小精靈匙扣/座枱除左有原版比卡超同沙嗲王版比卡超外，仲有熟悉既小火龍、車厘龜奇異種子，同新加入既火狐狸、哈力馬龍同呱呱泡蛙。匙扣不但可以扣係袋，仲可以放係枱面做擺設。
▲ 限定比卡超行李牌$59
著住沙嗲王制服既比卡超化身行李牌，等你帶埋佢去旅行。
▲ 表面係普普通通既小精靈 file，但背面其實係超進化圖鑑，以前日日背小精靈命既感覺即刻番晒嚟。
▲ 比卡超書籤連糖果套裝$49
表面上呢包只係有比卡超卡紙做包裝既糖，其實隻比卡超可以用嚟做書籤架！
8月仲會有比卡超抱抱攬枕發售添！咁可愛，唔係唔帶番屋企嘛？
雖然佈置方面真係唔太吸引，只係得門口既影相位同間唔中有一兩隻細細既小精靈公仔，不過 D 野食真係唔錯。特別係個比卡超咖喱豬扒飯，一樣有白咖喱豬扒飯既水準，而且點每個餐或都飲品都有紀念品送，雖然小小地，但同平時比較又唔係特別貴，都幾值得去架！
