Samsung 今個月新推出了 Galaxy Note 5 及 S6 edge+，連同上半年推出的 S6 及 S6 edge，今年算係頗積極。不過作為銷量最高的手機品牌，他們似乎仍不打算放過排第二的 Apple。他們最近就係美國推出新「試用」優惠，以 1 蚊美金成本引誘 iPhone 用家轉用 Note 5、S6 edge 或 S6 edge+！
做法好簡單，用家只需要用 iPhone 登入指定網站，然後選擇自己想試用的機款，就可以試玩 30 日，然後再決定係咪堅轉會。另外，「試用」套裝唔止有部機，仲會連埋張 SIM 卡，即係包埋 30 日 plan 俾大家自己試，真係好體貼。如此吸引，難怪筆者寫呢篇文個時，個試用優惠已經額滿。
不過要留意嘅係，個試用條件都唔容易，如果大家試用期個時，唔小心整花機身（較明顯個種）、整壞手機（包括：鏡頭、喇叭、不能充電、實體按鍵、熒幕、入水）等，係需要付出 US$100 維修費，對於大頭蝦用家來講，隨時「拿到粒糖，輸咗間廠」。另外，Samsung 更寫明如果測試裝置從來沒有開啟，又或者沒有歸還，就會收取「Replacement Cost」，但未有講明金額。但既然 Samsung 今次嘅係「試用」優惠，有呢兩個 terms 亦屬正常吧，最少可防止試用者拿手機去賣賺錢。
事實上為求係新 iPhone 推出前盡搶顧客，各手機廠商都盡出奇謀，希望可以爭取消費者支持，但今次 Samsung 呢個 offer 只係於美國推出，唔知他們會唔會考慮推廣來香港呢？如果會，唔知有幾多 wire 民會考慮用 8 蚊港紙試下 Samsung 嘅最新手機呢？
來源：Samsung
【評測】Samsung Galaxy A55 外形 手感 屏幕 相機 效能開箱評測 Apple 承認 iPhone 鬧鐘無聲問題 將推系統更新解決 挖角多名 Google AI 專家 Apple 瑞士蘇黎世設神秘實驗室
