仲有一個星期就開學啦！做咗成個暑假暑期工，相信各位準 freshman 都賺到少少錢，唔知大家有冇打算買番部新手機慶祝入 U 呢？咩話？無諗過？因為旗艦機貴得滯，平價機又驚唔襟用？最近香港手機品牌 NUU Mobile 就推出了平民化手機 Z8，唔止外形見得下人，而且仲打機上網睇片瓣瓣掂，售價仲好合理添！而家就等我哋同大家分享下係校園入面部 Z8 點幫到大家啦！
外型唔失禮手感幾好
相信唔少後生仔都對買入門手機有啲保留，因為唔少入門手機個樣都好普通，甚至有啲都幾「薯」，即使貪平買咗，拿番學校用真係俾同學笑到面黃都似。而呢部 Z8 外型就幾具時尚感，拿上手幾舒服之餘，機背殼仲採用咗拉絲設計，配合灰黑色機身，無論遠望定近睇都一啲唔失禮。
▲機背加入咗拉絲設計，感覺都幾靚。
另外，拿住部大芒手機，有時要按個開關鍵先至用到，都幾麻煩，Z8 就內建「雙擊喚醒」手勢操控功能，只要用手指係熒幕度敲兩下，熒幕就會著番，單手用電話其實不難。
▲係熄熒幕狀態下雙擊熒幕，就可以開芒用到，適合單手操控時使用。
上 lecture 去「拉把」有電話入唔驚嘈到人
有時去上 lecture 之前，又或者去「拉把」搵資料做功課，唔知大家有冇遇過唔記得熄電話鈴聲，然後有人突然打電話來，結果就搞到勁尷尬。Z8 就內建幾種手勢操控功能，當中反轉靜音同埋手勢靜音最就啱成日唔記得熄聲嘅大頭蝦用啦，只要有電話打來個時，將手機熒幕反轉向下，又或者係熒幕右上方的距離感應器位置移動手掌，就可以進入靜音模式，咁就算有電話都唔洗驚阻住大家上堂啦。
▲本身已支援唔同手勢操控，當中反轉靜音及手勢靜音就最啱成日唔記得較震機嘅大頭蝦使用。
▲只要有電話打來個時，即刻反轉部手機，就可以即時靜音。
時尚提示燈避免錯過重要訊息
另外，NUU Mobile Z8 係機身設計上都好有特色，尤其是它內建的指示燈，設計於機身正面底部位置，會有藍色燈展示有冇未接來電、訊息等。有咗佢，大家就算較咗靜音模式，都唔驚錯失任何重要訊息啦。
熒幕夠大色水好睇片上網都一流
時下後生仔都興用大芒手機，貪嘅自然係芒大睇得舒服之餘，成班朋友一齊睇感覺都爽好多。Z8 本身都擁有 5.5 吋熒幕，而且具有 1080p 解像度，無論係用來上網、睇片或者打機都幾唔錯，清晰度高之餘色水又偏向自然，靈敏度又高。加上本身 Z8 就採用了 1.7GHz 八核心處理器及 2GB RAM，就算玩白貓都唔驚窒機或者彈 APP 啦！
▲採用八核心處理器 + 2GB RAM，打白貓都唔驚會窒。
▲用來上網色水自然之餘，清晰度都好高，唔洗放大都睇到細字！
另外值得一提嘅係，Z8 本身嘅內置喇叭，音量都真係幾大，筆者試過係 City U 嘅 canteen 開住聲睇 MyTV，就算四周圍都幾嘈，都一樣聽得清楚對白，呢一點真係值得一讚！而且音效入面，仲有幾項音質選項俾大家揀，當中就連用藍牙耳機聽歌都可以享受無損格式質素，呢一點相信唔係好多入門手機做得到呢，抵讚！
▲係 canteen 用內置喇叭追劇，就算四圍好嘈都好夠聲，不過筆者建議為免嘈住其他人，如果係自己「獨享」嘅話，都係戴耳機會好啲！
▲如果大家驚係室外太嘈聽唔到電話鈴聲，只要係「音效與通知」入面設定為「戶外」，就唔驚聽唔到啦！
▲另外音效上仲支援無損 BT 模式，就算用藍牙耳機都可以聽到高質素音樂呢！
總結：千八唔洗抵買夠用有凸
學生哥搵到嘅錢唔多，就算係做足 3、4 個月暑期工，搵埋儲埋可能都只係一萬幾千，而且入到 U 乜都要洗錢，唔想養成大洗嘅習慣，就唔好下下都諗買旗艦手機啦，始終 7、8 千蚊部手機，莫講話作為學生哥嘅大家，就連筆者都覺得幾唔捨得。今次為大家介紹嘅 NUU Mobile Z8，千八蚊唔洗嘅售價，就可以買到部功能全面又質素幾好，而且可以插卡（仲要係支援雙卡雙待）換電同支援雙 4G 的智能手機，網上買仲要附送埋兩年保養，計落真係好合理！如果各位準 freshman 預算有限，但又想買番部新手機慶祝入 U，呢部 NUU Mobile Z8 真係值得考慮！
售價：$1,790
查詢：NUU Mobile (電話: 2725 0161， 更多資料點按此)
香港品牌 NUU Mobile 撐學生！
除咗為香港學生哥推出一部咁平民化又符合佢哋需要嘅手機之外，NUU Mobile 係產品以外嘅地方都一樣咁撐香港學生架！之前佢哋就贊助咗香港教育學院學生會屬會學生電視，唔止贊助佢地 Soc Tee，仲會贊助佢哋來緊十月舉行嘅拍片比賽，真係超有心。
分享到 :
最新影片
