相信好多有玩 FIFA 既 wire 民肚入面都有好多問題想問，例如：點解成日交失波？射極都入唔到波？自己電腦鬼咁蠢！甚至係幾時有香港隊揀黎用等等。今次 unwire 終於有機會當面問問 FIFA16 製作團隊的核心成員同埋參觀神秘既 Motion Capture Lab，想知多啲關於 FIFA 背後一切既 wire 民就唔可以錯過啦！
EA Sport 位於加拿大溫哥華 Burnaby 既總部！
FIFA Gameplay Producer, Samuel Rivera 專訪
簡單黎講 Samuel 負責一切同 FIFA 遊戲 Game Play 有關的開發，對於 FIFA 每個細節都瞭如指掌。Samuel 由 2009 年開始加入 EA，已經參加左 7 年嘅遊戲開發工作，而家成個 FIFA 開發團隊有大約 300 人，當中包括咗 programmers、designers、同好多唔同嘅技術人員。其實每集新 FIFA 推出嘅同時，下一代 FIFA 部份嘅研發工作亦都已經同期進行緊，所以大家千祈唔好以為一年時間就可以做到一隻 Game 出黎咁簡單！小編最想知就是開發人員日日都要對住隻 game，係咪一定要好鐘意足球呢？Samuel 就話自己係墨西哥人，波由細踢到大，技術仲唔錯添（笑~~），而成個團隊個個都係足球 Fans，日日都會一齊係公司踢波（EA Sport 公司就有人造草同室內足球場），如果唔鐘意足球都幾難做好呢份工！
FIFA 越真實、操作越複雜
至於每年都要出一隻令所有足球 Fans 乖乖比錢買嘅遊戲其實一啲都唔容易，Samuel 指出每次準備下一代新遊戲嘅時候，開發團員都會參考好多唔同因素，當然包括全球數以十萬計玩家嘅意見啦。當中最困難的地方就係要「Balance」，好好係各方面平衡成個遊戲。大家都知道 FIFA 基本上可以以假亂真，無論是球場、動作、表現、畫面都以逼真為大前題，無可避免令遊戲操作變得越來越難（單是 Skill Moves 就有 7 頁介紹、慶祝動作都一樣咁上下多），想要完全操控遊戲一啲都唔容易，甚至只有專業 Gamers 先可以做到！當小編問 Samuel 係咪全部 skill moves 都用熟嘅時候，佢竟然偷偷地同小編講自己平時其實一招都唔會用喇～（暈！）
遊戲平衡最困難亦最重要
Samuel 話，開發團體成日都會搵職業 Gamers、唔同背景嘅普通玩家返黎同 Developer 開會同埋對戰，不斷尋找一個「中間位」，先可以全方位咁照顧超級足球 Fans、職業 Gamers、甚至令第一次玩嘅人都可以好好享受足球，唔會因為遊戲太難 / 太易而令某一班玩家失望。遊戲期間（GamePlay）的開發更是最複雜嘅地方，因為要顧及比賽時嘅流暢度、進攻、防守、戰術、球員嘅動作、反應等等之間嘅配合。係今集 FIFA16 射門系統亦有相對提升，球員的慣用腳、位置、跑動速度、射門時與足球嘅接觸點、力量、角度通通都會計算在內，所以唔好諗住禁完射波制就一定整個猛虎射球出黎，如果亂咁係唔適當既時間作出唔適當既決定，咁隨時會射個「痾尿」波甚至撻 Q 架啦！係 Samuel 眼中 FIFA 就絕對唔只係一隻遊戲咁簡單！
小編睇住 EA 職員落住雨都照鬥波個個身水身汗，雖然技術就一般啦，不過都好佩服佢地對足球嘅熱情！
團隊觀察各地球員評分
相信好多玩家都想知道球員數據點得黎，Samuel 透露開發團隊入面有專門一 Team 同事飛去世界各地唔同地方去觀察球員，係好多數據入面分析出一個大家都覺得合理嘅 Rating。而且玩家成日都會見到遊戲有 Update，就係因為呢班同事定時（每 1 – 2 星期）就會因應球員的健康、狀況去調整數據，咁樣先至可以帶比玩家最真實的遊戲體驗。
新系統改善電腦 A.I
另一方面，有讀者就同小編表示過電腦 A.I 好蠢、旁證、球員表情等等問題，Samuel 就話，足球比賽往往在一剎那改變，電腦 A.I 仍然有極大的提升空間，而今集 FIFA16 就加入左「Defend in an unit」系統，防守 A.I 會有明顯嘅進步，玩家一定要親自試試。而球員情緒、表情、動作係由背後一系列好複雜嘅系統計算得出，會因應唔同嘅情況而自己配搭唔同組合出黎，例如：旁證舉越位旗後怪笑、球員高興、憤怒等等，佢仲肯定咁表示開發團隊每日都努力咁優化遊戲，正是每一集新 FIFA 都有令人驚喜嘅地方。
未來可用香港 / 南華隊？FIFA16 未夠完美！
相信所有香港嘅 FIFA 玩家都想知道下一代 FIFA17 仲有咩突破同埋進步空間？同埋幾時有香港隊用、甚至香港聯賽可以玩呢？Samuel 就大笑話唔講得住叫小編下年再問過！而球隊同聯賽呢個問題其實有另一組同事負責進行調整，並會視乎返球隊嘅世界排名、同埋球迷嘅歡迎程度而決定，Samual 仲表示開發團隊一定會聆聽大眾玩家嘅意見咁話！小編最後問到 FIFA16 比 FIFA15 進步咗咁多，如果 10分滿分 Samuel 覺得隻 Game 值幾多分呢？佢諗左一陣就比咗 9.9 分高分，咁仲有 0.1 分係邊呢？Samuel 就話 FIFA17 一定會更勝 FIFA16 ，仲有進步空間，所以各位香港玩家一定要拭目以待啦！
除左 Samuel 之外，小編亦都訪問左 FIFA 另一個重要人物，佢就係主管 Motion Capture Lab 嘅 Production Director – Blair Leckie。
Motion Capture Lab Production Director, Blair Leckie 專訪
過百鏡頭記低球員動作
在 EA 工作近 10 年的 Blair 向小編介紹位於加拿大溫哥華 EA Sport 總部嘅 Motion Capture Studio，呢度佔地近 18,000 尺，整個 MoCap 團隊現有約 30 人，而 Motion Capture（下稱：MoCap）系統現在已經發展到第 3 代，全個 Studio 設有 135 個攝影機捕捉球員一舉一動，運動員身上穿著嘅特製衣服掛上 68 – 74 個反射標籤（Marker），分別放在身體的主要部份及關節，記錄低最真實的動作。而每次拍攝可以一口氣拍攝 8 – 10 位運動員，再多的話系統就唔能夠準確辨認啦。當為 FIFA 拍攝時場館會鋪設人造草，而拍攝 Ice Hockey 時就會放上特製嘅仿雪地白色物料，球員同樣可以 Full Gear 在上面滑行進行拍攝，務求將最真實的一面反映比玩家呢！
EA Motion Capture Lab
美國女足之前就黎到呢個 Studio 進行 MoCap 喇。
飛巴塞為美斯親身拍攝
Blair 以 FIFA16 為例，MoCap 團隊專程飛到巴塞隆拿為美斯進行 MoCap，記低由佢親身示範嘅帶波、扭波、慶祝等一舉一動，所以係遊戲入面見到嘅美斯基本上就係佢係球場上面 1:1 嘅動作喇。當小編問到，其實大部份宣傳片上面都只係見到為美斯拍攝，係咪就只係用佢去模擬哂所有球員呢？Blair 就指當然唔只美斯一個啦，因為 MotionCapture 團隊專門飛到世界各地為運動員拍攝，而且亦會為打唔到位置嘅球員拍攝先至夠真！EA Sport 就會搵好多包括美國等北美地區既職業球員做 MoCap，近年已經為過百隊波拍攝，不過隨住系統升級，技術進步，團隊仍然要周圍飛周圍拍，咁先夠 update 呢！
除左球類運動，相中仲可以見到槍，劍同盾牌等，一樣要係度做 MoCap 架！
人面、身體比例同樣重要
除左 Motion Capture 球員嘅動作，又點可以漏左 Facial and Body Scanning 掃描呢？Blair 指 FIFA 上面可以憑面容認出不同球員就係靠哂呢個系統，而且球員嘅身體比例、大細、表情都是靠 Facial Scanning 系統近 200 部相機黎拍低，希望可以帶比玩家球員更真實既畫面，當然仲包括佢地贏波開心慶祝、輸波失望、被犯規時憤怒等體驗，而佢就透露 FIFA17 將會用到更多 Motion Capture 技術，喜歡足球既朋友一定會鐘意！
EA 職員手上嘅頭盔就係用黎做 Facial scanning 架啦！
呢度就係為球員進行 body scan 掃描的地方，設有大約 200 部數碼相機，全方位拍攝球員的身體比例。
FIFA Ultimate Team 大佬親授 Draft Mode 排陣心得
FIFA FUT Creative Director , Adam Shaikh 專訪
最後，小編仲同左 FIFA Ultimate Team（FUT）大佬 Adam Shaikh 傾計，佢話聽完玩家意見之後特別為 FUT 加入左新嘅 Draft Mode，比玩家有更大嘅挑戰，同埋可以玩足一年都唔會悶嘅體驗。新加嘅抽牌模式可以令玩家有風險大回報大嘅感覺。另外 FUT 又加入咗經典球員 Legend Players，又打破咗球員國籍、球會之間的限制，玩家肯定可以好好享受遊戲。
至於點抽人同埋點排先至最著數呢？Adam 透露自己鐘意先排攻擊球員嘅組合，因為好大程度影響進攻發揮，所以一定會揀先！佢建議大家可以視乎自己覺得前鋒 / 中場 / 後衛、甚至是替補球員嘅重要性黎排陣同揀人，咁樣就會最有化學作用同埋易控制喇！而當小編知道佢原來係利物浦 fans 之後梗係要問佢利記嘅球員有冇特別高 Rating 先！佢就笑住話隻 game 好公平，自己雖然好想幫佢地 Level Up 但係都冇計，即使抽左中雙曼、車仔或者阿仙奴球員都要局住用呢～
分享到 :
最新影片
