【萬聖節敢死隊】一啲都唔驚！籮文 + 依莉詩勇闖樂富廣場「恐懼心戰室」

年年萬聖節除咗去兩大主題公園鬼屋之外，都會諗起樂富廣場嘅窮人版鬼屋。雖然驚嚇程度比較低，勝在免費入場，好啱膽小鬼一嘗被嚇滋味。身為 Unwire 【萬聖節敢死隊】嘅我依莉詩當然同隊員籮文急不及待為大家試玩啦！

恐懼心戰室

由 9 月 18 號至 10 月 31 號，樂富廣場露天平台就以「恐懼心戰室」為題將多個貨櫃串連成超過 70 米嘅鬼屋，衝擊你嘅五大感官。只要喺指定商場或街市消費滿 $400 或以上就可以換到「心慌慌套票」一套，俾你帶埋個 friend 入去壯下膽。

荒廢堆填區

呢個貨櫃貨櫃佈滿腐爛嘅垃圾同小強，就好似會隨時爬上你身一樣。如果你有潔癖、怕小強，恐怕入到去會周身唔自在，正好考驗你對密集環境嘅恐懼。

迷魂漩渦

到達下一個貨櫃，將會考驗你嘅視覺觀感。入到鏡子迷宮，喺燈光同鏡的倒影下，隨時會產生錯覺，望不清前路又舉步為艱。

黑暗森林

鬼片嘅情節好多時都會出現樹林嘅場景，呢個貨櫃就佈置成黑暗森林，考驗你喺黑暗中嘅聽覺。當旁邊傳來怪聲，其實你不經覺間已成為對方嘅獵物。

變態實驗室

呢個貨櫃原來喺變態科學家嘅實驗室，當你誤闖入去嘅時候佢已經打算活捉你做科學實驗。如果想逃走，就會快快趣搵到鎖匙啦！

幽閉凶間

喺空無一人嘅幽閉房間，每一幅紅牆都印滿白手印，心緒不安之餘，窗邊更有黑影閃過，真喺要快快搵出口逃生！

方程迷陣

喺最後一關嘅方塊密室，你必需要同隊友同心協力破解牆上數字嘅玄機，先可以安全離開。

 

慌失失樂園

除咗鬼屋外，只要喺樂富廣場同街市累積消費滿 $200 或以上就可以換取「慌失失樂園遊戲劵」2 張，俾你玩同食。

 

電鋸驚魂

電鋸狂人困你喺鋸木廠內，要你用電鋸刻字。如果唔打醒十二分精神，觸怒到狂人就會鋸斷你嘅手腳洩憤啦！

骨肉相連

有人誤打誤撞將木乃伊大王嘅妻兒骨架撞散。依家係要幫佢命令你要將骸骨駁番好，唔喺就將你變成木乃伊陪葬。

禍蟲口入

喺呢個攤位可以免費換拎曱甴爆谷一杯。少蟲、中蟲、多蟲任君選擇，不過，Sorry，不設「走蟲」!

 

依莉詩點評

如果想被嚇嘅就可能有少少失望啦！嚴格嚟講呢間唔算喺鬼屋，反而似「逃出密室」啲 friend，挑戰心魔多過真喺有人扮鬼嚇你。不過佢免費入場，好啱膽小鬼一嘗萬聖節滋味。

驚嚇度 ★★☆☆☆
必玩指數 ★★★☆☆

 

籮文點評

叫得心戰室，其實唔係咁多彈出黎嚇你嘅嘢，反而係多令你好驚「會唔會有野彈出黎呢」不過又冇彈出黎嘅嘢，依種驚係更加有深度，成功令籮文有心底裡緊張出黎嘅感覺。而整體上都唔似一個鬼屋，比較似一個密室脫逃遊戲，有啲位影相都好靚。如果抱著一個免費入場有得玩逃出遊戲仲可以影靚相嘅心態去，係好好玩！

驚嚇度 ★★★☆☆
必玩指數 ★★★★★

相關影片﹕