今日 Letv 舉行記者會，終於正式宣佈取得 2016 至 2019 年連續 3 年的香港英超獨家轉播權。據 Letv 在記者會及新聞稿上表示，會自 2016 – 17 球季起，為香港球迷提供 4K 超高清的部分英超直播賽事，而且還會提供多路信號、多個場次、多個終端、多語解說、多種互動等的直播形式。但究竟播 4K 英超，Letv 嘅 server 頂唔頂得順？睇個時理論上會唔會窒？呢個係好多 unwire 讀者關心的問題，而今日記招上終於首次有提到當中的技術。
其實很多時候欣賞串流內容（streaming）時要等，是因為 cache 時間十分長，導致影響載入時間。尤其是好似播英超咁，咁多用戶同一時間睇同一場比賽，耗用頻寬肯定會十分高，如果所有用戶都係直接從同一地域的 Letv 主伺服器擷取訊號，近 Server 的用戶當然流順，但在其他國家或地區，訊號傳送可能要經過很多中途站 (HOPS) ，有可能導致睇個時「窒下窒下」。要解決問題好簡單，就會全球都放一台 Server 係你左近，真係好似 7-11 咁樣梗有一間係左近。
呢個 7-11 concept 就係 CDN 的概念， Letv 採用全球多達 600 個 CDN（Content Delivery / Distribution Network；內容傳遞網路）節點，它的總承載量比單一骨幹最大的頻寬還要大，而且有異地備援，萬一某個伺服器出現故障，系統就會自動調用其他鄰近地區的伺服器資源，所以可靠度極之接近 100%；就算沒有故障時，樂視香港的 CDN 網絡亦可有效回避繁忙擠塞的網絡，並自動尋找距離用家最接近的快取伺服器接收內容，因此可以改善內容存取速度，大大縮短下載時間。所以大家都唔洗太擔心睇 4K 英超賽事個時會窒下窒下，錯過精彩嘅入球時刻啦。
另外，Letv 方面表示，直播嘅英超賽事，最少都會有 1080p 解像度質素（即係同而家 now TV 播嘅質素差唔多），而部分賽事更會提供 4K 質素供球迷們欣賞。為咗令賽事播放保持暢順，所以 Letv 設有 10T 頻寬播放 Letv 內容。究竟 10T 有幾多？其實之前 HKTV 開台個時，我哋都做過技術解構，當時 HKTV 表示共有 220 Gbps 頻寬連接香港互聯網交換中心（HKIX），另有 130 Gbps 直駁 Boardband 及 手機的服務供應商，足以容納 30 萬至 40 萬觀眾同時收看節目；而 1Tbps 就等於 1000 Gbps，10Tbps 簡單啲講即係 10,000Gbps，係 HKTV 當時所用頻寬的接近 28.5 倍，如果當時 HKTV 所用頻寬已足夠 30 萬至 40 萬觀眾同時收看，Letv 嘅英超直播，理論上可足夠讓 900 萬至 1,200 萬觀眾同時收看！
當然，10Tbps 係講緊所有 Letv 內容共享，而非單純作 4K 英超直播，而且呢個理論觀眾人數，可能講緊係 1080p 質素嘅情況，如果 4K，筆者當打個折除一半（即只以一半頻寬播英超），再除以 4 左右，即係理論上都足夠 113 萬至 150 萬觀眾同時收看，其實都已經好多！如果一切係咁理想嘅話，應該點計都唔會窒掛？
另外，Letv 方面都表示，直播英超會提供多訊號方式，官方解釋話呢個係指未來直播英超球賽，會同而家 Letv 串流播放香港 UI 版上嘅影片或電視劇咁，可以俾用家自行決定解像度同埋 bitrate，咁用家就可以因應屋企寬頻嘅寬頻作出調整，以獲得最佳最流暢嘅直播欣賞享受。
英超曼城推生成式 AI 球衣設計工具 舉行比賽優勝作品可成 26/27 球季第三球衣
另外，Letv 係記者會表示，Letv 體育會提供多訊號、多場次、多裝置、多語言、多種互動等方式直播球賽。首先多場次、多裝置、多語言嘛，其實而家 nowTV 都做緊：nowTV 都可以俾大家揀睇邊一場波，亦可以揀係電視睇，定係手機 / 平板上面用 now 隨身睇 APP 睇直播，亦同樣可以揀聽廣東話旁述，定係英語現場旁述。不過 Letv 體育似乎做得更盡，唔止可以盒子、Letv 超級電視或者用佢哋超級手機睇直播，語言上亦提供普通話、廣東話、英語選擇，當中廣東話據官方表示，會用番港人聽慣嘅人名、地名、球會名、足球用語等，呢個都算係大家最想聽到嘅好消息掛？另外，官方更表示會有一條「球迷」頻道，預計應係由兩隊球迷講波，類似外國電視台嘅 fans zone 節目，呢個算係香港英超直播入面比較新穎嘅嘗試。
就咁睇，Letv 播英超，好似幾完滿，但俗語話：魔鬼在細節裡，如此美好，但究竟有冇「暗藏危機」？就等 Edward 而家同大家分析一下。
正如大家要過甜蜜情人節就首先要有個男 / 女朋友，要流暢睇 4K 英超直播，屋企寬頻條「水管」自然一定要夠大！據之前 Letv 表示，現時以串流模式播放香港 UI 版上嘅 4K 影片，只要有 10Mbps 頻寬就可以流暢播放，但穩陣起見其實有 20Mbps 會比較好。但有啲人屋企（例如：住村屋），真係隨時連 10Mbps 都未必有！同埋大家要記住，屋企寬頻唔係單用來睇英超，仲有手機、平板、電腦、甚至電視統統都要上網，如果你屋企個寬頻 plan 無番 100Mbps 或以上，筆者都建議大家唔好諗睇 4K 英超啦。
大家可能一睇到：嘩，有 4K 英超睇喎！正！但大家唔好太開心住，因為 Letv 新聞稿都寫到明只係「部份」英超直播賽事有 4K 質素，以筆者睇多年英超嘅經驗，應該俗稱「大波」，即係利物浦對曼聯、車路士對阿仙奴、曼聯對曼城呢類「重頭戲」先會提供 4K 直播，如果係比較無咁重要嘅賽事，例如：諾域治對紐卡素、史篤城對李斯特城呢類比賽，應該都係得番 1080p 質素俾大家睇。而事實上，有冇 4K 其實都係視乎英超賽會當地有否提供相關訊號，如果該場賽事，英超個邊根本無提供 4K 直播訊號嘅話，香港呢邊又點會提供到呢？不過估計一個賽季幾百場波入面，應該點都會幾十場有 4K 直播掛？
英超曼城推生成式 AI 球衣設計工具 舉行比賽優勝作品可成 26/27 球季第三球衣
Letv 表示，他們播放英超賽事，係有「多裝置」模式，即係話可以係 Letv 超級電視上又得、原有電視駁住樂視 4K 盒子睇亦得、甚至係 Letv 超級手機嘅 LIVE 直播頻道上面睇都得！係屋企用 Wi-Fi 睇，自然睇 1080p 定係 4K 直播都唔驚啦，但出到街好多時都係用 4G 網絡睇波，如果你用自己嘅有限數據 plan 睇 4K 英超直播，數據用量肯定直線上升！到時大家因住睇一、兩場波就爆流量呀！所以，就算係街，都建議去到有穩定 Wi-Fi 網絡嘅地方先好睇呀。
最後一個危機，就係 Letv 直至今日都未公佈所有 plan 細節。當然，站在 Letv 立場來講，下年先至開始英超直播，確實未有急切性係而家公佈睇波 plan（據路邊社消息指會係每月 $99 任睇英超仲送埋一個樂視盒子，但係咪 4K 質素就唔知）。不過以 Letv 用天價投得香港英超獨家轉播權來講，在商言商筆者估計最終 plan 月費就算平過而家 nowTV，相差都未必會誇張地多。所以，大家（包括筆者）都係等 Letv 公佈出機 plan 先至再決定係咪值得「興奮」啦。
最後一個貼士俾大家，就係如果大家而家已經 join 緊 nowTV 嘅英超或者體育頻道，睇緊英超比賽直播，而去到下年球季都仲未完約嘅話，都唔洗擔心到時無得睇！因為 nowTV 今日已經宣佈已與 Letv 達成協議，即使下年失去咗獨家英超轉播權，但都仲可以係英超同埋體育頻道欣賞英超直播賽事！各位 nowTV 用戶，咁就唔洗驚啦！
最新消息：在 nowTV 宣佈此消息之後，Letv 方面發表官方回應，指「未與任何方面就英超轉播權達成任何共識」！究竟事件發展如何？係 nowTV 方面放流料？係 Letv 其實未同 nowTV 傾好合作細節？定係其他原因？今次真係「羅生門」了……
英超曼城推生成式 AI 球衣設計工具 舉行比賽優勝作品可成 26/27 球季第三球衣
