近來多份報紙雜誌先後倒閉，其實自從網上媒體（網媒）出現，對於靠「賣紙」維生嘅傳統媒體影響好大，而且呢個更加係國際性現象，業界都喺度攪盡腦汁想轉型，由 Offline 轉做 Online。做網媒嘅好處在於可以將讀者嘅行為化成可靠嘅數據，不但可以更容易了解讀者嘅口味，更可以有效咁改善網頁內容，喺調配人手亦都起到作用，能夠更加善用資源。原來香港網媒 LifeHack 一早已投入呢方面嘅發展，利用大數據行先再定內容，睇嚟已經係全球網媒嘅大趨勢。
隨住讀者嘅閱讀習慣改變，香港的網媒便應運而生，現在隨便數數都有十幾間。但係其實香港讀者人數有限，究竟係咪可以容納咁多網媒呢？網媒開業門檻相對較低，只要識得用 WordPress，整靚個網頁，再揼內容出嚟，基本上就已經可以同人自我介紹係網媒。每個科技爆破一開始嘅時候永遠都會有好多公司走出來，但係每個市場只能承載有限嘅業務，所以佢地會慢慢合併然後自然流失，如果內容夠勁夠特別，生存空間就會較大，所以網媒一開始就應該做好定位，首先了解自己讀者嘅口味同興趣，提供適合嘅內容，咁就可以抓緊網頁流量喇。
喺電話上，相信大家不會隨意上 Facebook 睇 Link，因為要另開新頁；要你 Share Post 就更難，因為會佔用大家 Facebook 版面，㩒之前梗係要諗過度過。小編身同感受，因為每次分享都要考慮埋「朋友」會點睇，咁樣算喺自我審查嗎？放喺自己 Facebook ，「朋友」就可以喺我個 Post 了解我嘅取向，我所關心嘅事，從而對我嘅形象下判斷。但 Click、Like、Share 呢 D 行為正正反映讀者係咪真正鍾意你嘅文章，而家網媒已經不再係主導讀者嘅資訊來源，但佢地可以從數據知道文章嘅受歡迎程度，然後調整日後寫文章嘅手法、角度、形式等等，做到多D人 Like & Share。
既然程式軟件可以作為超強分析工具，人嘅重要性好似變低咗，咁網媒仲需要編輯嗎？當然今時今日嘅 Machine-Learning 未去到咁神通廣大，仍然需要「人肉」分析讀者嘅行為，LifeHack 創辦人 Leon 指出「Machine-Learning 好難應用喺分析文章，因為背後太過複雜，要知道點解讀者會分享嘅話，仲係需要醒目嘅人去進行分析，好難設計出一個通用嘅模組去「學習」。」原來大數據分析軟件只係可以用嚟輔助編輯發掘靈感，從而了解各大網站受歡迎嘅文章，幫助編輯度題寫稿。小編深信人嘅靈活性、頭腦，今時今日都仲係無可取替，如果電腦識得寫文，一切都會變得自動化，到時成個行業就可能就會消失喇！
小編非常好奇，如果香港新媒體想突圍而出，究竟需要咩條件呢？Leon 就話需要『矽谷鐵三角』！簡單嚟講就係 Project manager（網媒來說就是編輯）, Engineer （工程師） 同 Designer（設計師）。編輯唔再只係起題改文，而要識得分析數據，了解讀者口味；工程師就要製作出一 D工具幫助編輯分析數據做決定；而設計師就要配合編輯改善網頁內容，從而進行測試同埋收集數據。聽起上嚟完全不似做媒體係咪？不過網媒就偏偏要配合大數據先可以突出自己嘅優勢，咁先可以喺競爭激烈嘅環境存活！