唔知大家有冇睇過上年上映嘅電影《觸不到的她》（HER）呢？戲中嘅主角活喺科技全盛時期，仲同電話/電腦（已經密不可分）裡面嘅 OS （作業系統）談戀愛，但係最後因為太過虛無而無疾而終。喺現實生活入面，我地暫時只係得 Siri，仲未神通廣大到可以雙向溝通，但隨住 Wearable Devices（穿戴式裝置）越嚟越貼身發展，電影中的情節真係可能喺某年某日發生架！
最近小編睇咗一份 Research Paper，講到穿戴式裝置喺未來 10 年嘅發展方向，內容大概係話而家嘅 Google Glass、Apple Watch、戴喺身嘅感應器仲有好大嘅改進空間，例如：電池壽命、用戶介面、價錢等等。而呢 D 裝置更可以進一步結合人工智能（類似 Facebook 而家研究緊個 D），以及大數據應用，用嚟預測用戶行為同埋各種數據嘅關係，從而有望可以做到以下 8 大用途：
1．身體保健
現有嘅傳感器其實已經可以量度到大部份身體數據，例如:心跳、體溫、步數、睡眠模式等等，但係隨身攜帶/穿戴式裝置始終無辦法量度體內嘅指標，好似血液、尿液等，所以未來大可發展呢方面可以用喺病人身上嘅儀器，再適時發出提示或警報，令病人可以及早就醫。如果可以成事，醫學研究方法就可能會有重大改變，仲可以利用埋大數據精準分析到同病源相關嘅問題添！
2．飲食管理
在物聯網應用普及後，身體上嘅傳感器將可以喺雲端同屋企入面唔同嘅家電（例如：雪櫃、爐具）資料作整合比對，仲可以向你建議飲食，令你同埋你嘅家庭飲食習慣更加健康呢！
3．駕駛安全
如司機揸車嘅時候戴咗智能眼鏡，除咗可以將全個駕駛過程錄低之外，萬一發生任何意外，就可以更清楚了解事發經過，視點更加可以由司機角度出發添！另外，當偵測到意外發生，裝置亦可以自動發出報警或者通知救護車等等，都可以有效提高駕駛安全。
4．社會保安
戴上智能黑超嘅警察先生大可以透過人面辨識技術清楚知道眼前人喺咪比人通緝緊，既可以一邊影低佢個樣，一邊將影像 Send 去雲端資料庫作比對，雖然聽起上嚟好似好科幻，不過其實技術要求唔係好高，好大機會可能實現呢！
5．戶外導航
而家我地成日用 Google Map 搵路，但實際上 Google Map 只可以覆蓋馬路同埋大部分行人路，仲有好多地方覆蓋唔到。小編知道 Google 內部有一隊人（Google Adventure Team)專門到世界唔同地方，上山下海拍低景像，等更多熱愛挑戰自己嘅旅行家，又或者足不出戶嘅你同我可以好好咁睇吓呢個世界的景色，而且去到荒山野嶺都可以提供導航功能添！
6．運動訓練
其實而家好多唔同嘅 Apps 同隨身裝置都提供咗運動訓練記錄功能，而當配合咗人工智能同埋大數據分析之後就可以提供專業嘅建議比用家，提示同埋調整你每日嘅訓練，咁樣做運動就有效得多啦！
7．商業應用
自從有咗智能手機之後，大家有冇覺得我地嘅生活好似變咗有返工冇放工呢？而且好似仲多咗好多野做，做極唔完咁，係咪好想有個人可以幫輕吓你？當人工智能發展再成熟 D 同普及 D，我諗到時就可以對住隻錶講野(好似吩咐秘書姐姐咁)，等佢成為你嘅私人助手，提高工作效率。
8．資訊整理
人腦雖然有排都未開發得晒，不過我地都會有「記憶堆填區」，用嚟 off-load 一吓個腦。我地日日都接收咁多資訊，有咩可能全部都記得晒？希望未來可以做到只需要對住隻錶講野，A.I 就可以全自動幫你執手尾。例如今朝去咗個活動收到好多卡片，用智能眼鏡 Scan 卡片然後輸入系統；要用果陣就隨時落 Order 搵返出嚟，咁就夠晒方便喇！
唔睇 Paper 小編真係唔知道原來穿戴式裝置咁有發展潛力，而且上述唔少 Idea 好似植入式 Sensor 其實已經有人做緊，仲要係香港公司嚟添；小編亦有聽過有人發明咗一個可以充氣嘅 SmarTee ，對於缺乏安全感又或者需要一個擁抱嘅朋友嚟講就好啱用喇，哈哈。呢 D 應用聽落好似「十劃都未有一撇」，但係科技從來都係發展一日千里，要做到天馬行空想像出嚟嘅事其實唔難， Iron Man 入面嘅科技睇嚟好有可能成真呢！
分享到 :
最新影片
