玫瑰金向來都有種魔力，唔少女性都俾佢嘅高貴深深吸引，自從 iPhone 出咗玫瑰金之後就變成新一代獻俾女神嘅祭品。但係如果屋企個個都同你講要部「玫瑰金」，你又會點做呢？為咗解決呢個令人頭痛嘅問題， Electrolux 就出咗呢部玫瑰金色吸塵機，咁屋企個個又得到佢想要嘅「玫瑰金」，你又可以坐定定享受乾淨嘅屋企。
呢部玫瑰金色吸塵機除咗色靚，機身流線型設計非常高貴，應該可以吸引到少婦勤力做家務。纖細長柄不但優雅，仲唔洗彎身都可以打掃地面，而且可以直立擺放，就算屋企幾細，放埋一邊都唔踢腳。如果想清潔桌上、傢俱隙縫甚至車廂內嘅灰塵，可以從機身上分拆出小巧嘅手提吸塵機慢慢吸，一物二用。
▲ 其實除咗玫瑰金，仲有鋼鐵灰、冰雪白 同 酒紅色。不過我都係對玫瑰金情有獨中。
▲ 吸塵機可以按清潔位置，分拆成手提吸塵機，方便使用。
▲ 長柄上有兩個按鈕，分別係開關掣同模式轉換鍵。強力模式可以吸走一件餅碎，而靜音模式就可以降低嘈音。
▲ 拖頭上有 3盞燈，就算係暗角嘅灰塵都一樣睇得一清二楚。
▲ 吸頭設計非常特別，只要踩一踩拖頭嘅按鈕，毛髮就會慢慢被吸走，唔再怕有毛髮卡住而降低吸塵效能。
其實可拆式吸塵機早已經唔係新鮮事，Ergorapido 吸塵機亦都出到第 6 代，所以清潔力同續航能力就變得更重要。今次呢部比上一代電池壽命加長 2 倍，充 4小時電就可以用 45 分鐘，要無線清潔一個普通 3、400百呎單位總算綽綽有餘。
▲ 從手提吸塵機可以拆下並清空集塵器內嘅灰塵。
▲ 拉緊中間嘅濾網清潔捧就可以輕鬆清除濾網內嘅灰塵。
除咗性能有所提升，同時亦新出咗多件配件，為不同位置作深層清潔，例如：「迷你床褥吸扒」可以清除床上嘅頭髮、塵蟎、塵蟎排泄物等致敏源；「家具吸嘴」清潔沙發、窗簾、汽車座位等；「特長30cm窄縫吸嘴」清潔狹窄的縫隙如傢俱之間、廚櫃底等；「特長70cm軟喉」方便清潔車廂或家中難以觸及嘅角落。
▲ 「縫隙吸頭」配合「小毛刷吸頭」就可以輕鬆吸走家具嘅縫隙。
▲ 雖然多咗好多配件選擇，不過部份雖然額外購買。
雖然可拆式吸塵機早已經唔係新鮮事，呢部同上一代外型沒有太大分別，不過單是玫瑰金已經夠吸引。至於使用上，我幾鍾意拖頭上嘅 3盞燈，就算拖到暗角，灰塵都無所遁形，仲有特別吸頭設計，只要踩一踩拖頭嘅按鈕，毛髮就會慢慢被吸走，唔再怕有毛髮卡住，啱晒有長髮人士或者寵物嘅屋企。比起傳統大牛龜吸塵機，可拆式吸塵機又慳位 D ，又靜 D，應該可以提升到唔少少婦做家務嘅熱情。
售價：鋼鐵灰 (ZB3113AK) $2, 998 、玫瑰金 (ZB3114) $2, 698 、冰雪白/酒紅色 (ZB3104/ 3107) $1, 998
查詢：大昌貿易行有限公司 (2262 1623/2262 1988)
