籮文：「可換鏡入門無反 啱晒新手」Canon EOS M10 入門細無反相機評測

今日 Canon 於香港一口氣推出三部機，包括固定式鏡頭的 G9X 及 G5X  與 可換鏡入門無反 EOS M10。值得留意的是今次 M 系列相機型號直接由 M3 跳至 M10，如果依部唔係 M3 嘅升級版，反而係一款較入門級的機款，想知多啲 EOS M10 嘅詳情就請留意以下內容啦。

外型的骰 手細都可以揸得穩

由 M3 跳到 M10，原來 M10 係一部入門級無反，擁有三隻色，包括黑色、白色、灰色，除咗黑色機會配石墨色 Kit 鏡，其餘兩色都會配銀色 Kit 鏡。機身闊108mm x 高66.6mm x 厚35mm，比其他無反如 Sony α7 系列或者 Canon M3 都輕巧得多，似乎 M10 想打女性市場喎，籮文拎咗上手試，有幾隻手指都係冇位放，只好放喺機底托住部機，雖然機身連電池都只係重 300 克左右，裝埋 15-45mm f/3.5-6.3 IS STM Kit 鏡後雖然重心都算平衡，未有頭重尾輕情況，但機身連鏡頭整體黎講都唔算輕，嗰幾隻不知所措嘅手指托多十幾分鐘都會有酸軟情況出現，睇黎女仔用就 Perfect，但男士或者手比較大嘅人操作就會有少少吃力。

▲Model 姐姐揸得好輕鬆

▲外型好的骰

個人化配件 幫相機扮靚靚

除咗機身輕巧，啱晒送俾女朋友仔，男士們仲要預多少少彈藥，因為 Canon 今次同時為 M10 推出一系列個性化配件，包括相機面蓋、相機套、手柄同埋頸帶，俾女孩子幫相機扮靚靚。不過要留意下如果裝咗面蓋或相機套就會佔據相機底下的腳架孔。

▲Canon 今次同時為 M10 推出一系列個性化配件，包括相機面蓋、相機套、手柄同埋頸帶，俾女孩子同相機扮靚靚

按鈕寥寥可數 操作用 Touch Screen 啦！

籮文發現今次 M10 按鈕數量特少，原來 Canon 有意將操作簡化並移到 Touch Screen 上進行，入門用家或平時用開 Smart Phone 拍照嘅用家都可以超快上手。機頂開關制外圍係一個轉盤，分別俾你選擇拍片、影相及全自動影相模式。另外機頂亦有快門、快門轉盤及錄影制。而機背就更加簡潔，只有 Menu 制、Playback 制、上下左右及確認制。而最特別嘅係機側都有粒制，見粒制個標誌係一部手機，就知依一個係分享相片到手機嘅快捷鍵，對於喜歡第一時間 Share 相片上 Facebook、Instagram 嘅靚仔靚女的確方便得多。部機咁少制，其實好多時只要用 Touch Screen 就可以搞掂 Setting。

▲機頂開關制外圍係一個轉盤，分別俾你選擇拍片、影相及全自動影相模式。另外機頂亦有快門、快門轉盤及錄影制

▲機背就更加簡潔，只有一個180度可摺 Touch Screen 、Menu 制、Playback 制、上下左右及確認制

▲最特別嘅係機側都有粒制，見粒制個標誌係一部手機，就知依一個係分享相片到手機嘅快捷鍵啦

▲只要手機安裝左 Canon 嘅 App 就可以輕易地過相

自拍 Mode ＋ 180度上摺式 Touch Screen ＝可換鏡的自拍神器？！

頭先講到 EOS M10 按鈕好少，操作時自然多數要用到 3吋 104萬點嘅 Touch Screen。心血來潮想自拍時，用家只要將屏幕180度向上揭，同時自拍模式就會啓動，內置美肌及模糊背景（假嘅淺景深）功能。咦，咁未拍得住自拍神器！？咁又未必，因為美肌功能只有弱、中、強三個程度可供選擇，又冇得變大眼又冇得改膚色，都係拍馬都追唔上自拍神器嘅威力，所以想買黎齋玩自拍嘅朋友仔就要注意啦！

▲血來潮想自拍時，用家只要將屏幕180度向上揭，同時自拍模式就會啓動，內置美肌及模糊背景（假嘅淺景深）功能。

▲除咗將屏幕向上揭後啓動自拍 Mode，仲可以喺選項入面揀

▲籮文用咗「中度」美肌，美得都算自然，不過程度可以強返少少，不過一開到「強」，效果又太誇張，所以只有三級可供選擇係太少。BTW 點解對眼都係咁細？

▲見到 Model 姐姐自拍時揸機揸得好舒服，但手大的籮文實在有啲唔知點揸。

CA Mode 新手超快上手

除咗自拍 Mode，當然仲有好多 Mode 啦！留意返，一㩒模式選單，所有模式都有牛龜咁大個 Icon 顯示出黎，就算唔識睇字都知咩 Mode 打咩 Mode ，咁簡單嘅介面設計真係企鵝都識啦。云云 Mode 當中，Creative Assist 模式對新手黎講最實用，依個模式用最簡單嘅景深、光暗、對比等等 Setting 代替光圈、快門、ISO 等，讓新手可以容易掌握到自己想要嘅影像。其他 Mode 當然唔少得「玩具相機」、「黑白」等等啦！

▲所有模式都有牛龜咁大個 Icon 顯示出黎，就算唔識睇字都知咩 Mode 打咩 Mode ，咁簡單嘅介面設計真係企鵝都識啦

▲Creative Assist 模式對新手黎講最實用，依個模式用最簡單嘅景深、光暗、對比等等 Setting 代替光圈、快門、ISO 等，讓新手可以容易掌握到自己想要嘅影像

▲玩具相機 Mode

▲粗糙黑白 Mode

▲水彩畫效果

其他測試相片：

籮文：「可以用 USB 叉電 成件事超輕便」

話說依部 Canon EOS M10 機身輕巧之餘，仲可以用 MircoUSB 叉電，出街時影相影到冇電嘅話用尿袋叉亦得，籮文覺得依樣野係十分方便。雖然文章一開始我就話男士手大操作 M10 時會比較吃力，但由於機身實在太輕巧，便攜性的好 打敗咗 手感的缺憾，價錢亦都好可觀，依部真係無論送禮定自用都可以一試。不過要注意 M10 有內閃但冇熱靴位亦冇得插 Mic In，都係當玩味性質好啦。

EOS M10 可換鏡數碼相機 連 EF-M 15-45mm f/3.5-6.3 IS STM 鏡頭套裝

售價：＄3,480

EOS M10 可換鏡數碼相機 連 EF-M 15-45mm f/3.5-6.3 IS STM 及 EF-M 55-200mm f/4.5-6.3 IS STM 鏡頭套裝

售價：＄5,480